جاڭا ادامدار قوزعالىسى «جاڭا قازاقستاننىڭ» جارشىسىنا اينالماقشى - فوتو

بۇگىندە قۇرامىنا 250 جاس توپتاسىپ ۇلگەرىپتى. بەلسەندى توپتىڭ وزدەرىن «جاڭا ادامدار» دەپ ايرىقشا اتايتىنداي قانداي ەرەكشەلىگى بار ەكەنىن ءبىلۋ ءۇشىن از- كەم سۇحبات قۇرعان ەدىك.

جارتى جىل بۇرىن قۇرىلعان ۇيىمنىڭ كەڭسەسى اسا جايلى كورىندى. «ەكسپو» قالاشىعىنداعى عيماراتتىڭ ءبىر بۇرىشىنان اۋدانى 100 شارشى مەتردەن اساتىن كامپۋس اشىپ العان. وزدەرىنىڭ ايتۋىنشا، بۇل كەڭسەنىڭ جالداۋ اقىسىن دەمەۋشىلەرى تولەپ وتىر. ءبىراق دەمەۋشىلەرىنىڭ كىم ەكەنىن اتاۋدان باس تارتتى. «جاستارعا جاساعان جاقسىلىعىمدى جارناماسىز-اق اتقارايىن»، - دەپ ءوتىنىش ايتقان كورىنەدى.

قويعان سۇراعىمىزعا قىسقا عانا جاۋاپ قايىرىپ وتىرعاندارىنا قاراپ، سىلدىر سوزبەن ۋاقىت وتكىزۋدەن ابدەن جالىققان، اڭگىمەدەن گورى ارەكەتكە باسىمدىق بەرگەن جاستار شىعار دەگەن وي كەلگەن. بۇگىنگە دەيىن ىسكە اسىرىپ ۇلگەرگەن بىرنەشە جوبانى بايىپپەن تۇسىندىرۋگە تىرىستى. دەگەنمەن، ەڭ سۇيەكتى دەگەن جوبالارى ازىرگە ىسكە اسپاپتى.

«جاڭا ادامداردىڭ» استارىندا «جاڭا قازاقستان» باستاماسى جاتىر-اۋ دەگەن تۇسپالىمىز راسقا اينالدى.

«ۇيىمنىڭ تۋعان كۇنى - پرەزيدەنتپەن كەزدەسكەن كۇنىمىز. ول ءبىر ەرەكشە كەزدەسۋ بولعان ەدى»، - دەپ باستادى اڭگىمەسىن توپ بەلسەندىسى، قوزعالىس ۇيىمداستىرۋشىسى الپامىس ءابىلوۆ.

تامىزدا قۇرىلعان قوزعالىستىڭ اياق الىسى ۇناسا كەرەك، كەيىن مەملەكەت باسشىسى ارنايى ۋاقىت ءبولىپ، ۇيىم وكىلدەرىمەن كەزدەسكەن ەكەن.

«بىلتىر تامىزدا ءبىر توپ ستۋدەنت جينالىپ پرەزيدەنت قاسىم- جومارت توقايەۆتىڭ «جاڭا قازاقستاندى» قۇرۋ جايىندا ايتقان تەزيستەرىن تالقىلاي باستادىق. بۇل قازاقستان قوعامى ءۇشىن جاڭا ۇعىم، جاڭا باعىت بولعاندىقتان كوپ دۇنيەنى باق- تان ىزدەپ تابۋعا تۋرا كەلدى. سوندا بايقاعانىمىز، «جاڭا قازاقستاندى» ءتىپتى جاۋاپتى قىزمەتتەگى اعا بۋىن وكىلدەرىنىڭ ءوزى اركەلكى ءتۇسىندىرىپ جاتتى. ءتىپتى ءبىرىنىڭ ايتقان ءۋاجى ەكىنشى ايتىلعان ۋاجگە قايشى كەلەتىن تۇستار كەزدەستى. وسىلايشا «جاڭا قازاقستان» دەگەننىڭ نە ەكەنىنە ءوز جاۋابىمىزدى بەرۋ كەرەك دەپ شەشتىك. ءوز ورتامىزدا ءتۇرلى پايىمدار ايتىلىپ، سونىڭ نەگىزىندە قالىپتاسقان ورتاق تۇسىنىكتەر ءبارىمىزدى قوزعالىس جەتەكشىسى اسەل بادەنوۆانىڭ ماڭايىنا توپتاستىردى. قازىر ويلاپ وتىرساق، ءبىزدىڭ قوزعالىس سول كەزدە پايدا بولعان ەكەن»، - دەيدى الپامىس ءابىلوۆ.

قۇرامىندا 250 مۇشەسى بار ۇيىمعا استاناداعى جوعارى وقۋ ورىندارىنىڭ بارىنەن ستۋدەنتتەر تارتىلعان. ءبىراق وزدەرى قاتارلارىنا ەڭبەكتەگەن بالادان ەڭكەيگەن قارتقا دەيىنگى ادامداردىڭ ءبارىن قابىلداۋعا دايىن ەكەندەرىن ايتادى.

«14-قاراشادا پرەزيدەنت بىزبەن كەزدەستى. ءبىز سول كەزدەسۋدە «جاڭا قازاقستاننىڭ» جاڭا ادامدارى تۋرالى كەڭىنەن اڭگىمە وربىتتىك. «جاڭا قازاقستان» ءارقايسىمىزدىڭ ءوزىمىزدى جاڭارتۋىمىزدان باستالادى. ياعني، اركىم ونى وزىنەن باستاۋى كەرەك. ءوز ويىڭدى وزگەرتىپ، ماسىلدىقتان ارىلماساڭ، ەڭبەكسۇيگىشتىككە ۇمتىلماساڭ، ءبىلىم كۋلتىن تۋ ەتپەسەڭ، «جاڭا قازاقستان» تۋرالى ايتۋدىڭ ءوزى ارتىق. سوندىقتان ءار بەلسەندى ءبىرىنشى كەزەكتە وزىمەن جۇمىس ىستەۋى كەرەك. وسى ويىمىزدى پرەزيدەنتكە ايتىپ ەدىك. ول دا قۇپتادى. ونىڭ ءبىز اتاعان تەزيستەردى 100 پايىز قۋاتتاعانىن كورىپ، ودان بەتەر جىگەرلەندىك. سول ءۇشىن دە 14-قاراشانى قوزعالىسىمىزدىڭ رەسمي تۋعان كۇنى دەپ بەلگىلەدىك»، - دەيدى الپامىس.

بۇل يدەيالارى قوعامعا قانشالىقتى ءوتىمدى ەكەنىن ءبىلۋ ءۇشىن جاستار كوشە ارالاپ، بىرنەشە ساۋالناما جۇرگىزىپ كورىپتى. سونىڭ ءبىرى استانالىقتاردىڭ ماسىلدىققا قانشالىقتى بەيىم ەكەنىن انىقتاۋعا ارنالعان كورىنەدى.

«ءبىز «MEGA Silk Way» سياقتى كەشەندەردە، كوشەلەردە ساۋالناما جۇرگىزدىك. ءبىرىنشى «ماسىلدىققا» كوزقاراسىڭىز قالاي؟»، - دەپ سۇرادىق. ءبارى ءبىراۋىزدان «ول جامان» دەپ جاۋاپ بەردى. «ال ەگەر تابىسىنا، جۇمىسىنىڭ بار- جوعىنا قاراماستان. ءاربىر قازاقستاندىققا بازالىق كومەك رەتىندە 100 مىڭ تەڭگە تولەنۋى كەرەك» دەگەن رەفەرەندۋم وتسە، قولداپ داۋىس بەرەسىز بە»، - دەپ سۇرادىق. 94-95 پايىزى «ءيا، قولدايمىن» دەپ جاۋاپ بەردى. 2016 -جىلى شۆەيتساريادا وسىنداي رەفەرەندۋم وتكەن. ول ەلدە حالىقتىڭ 75 پايىزى بازالىق كومەكتەن باس تارتقان. سوندا قازاقستاندىقتار ماسىلدىقتى ءسوز جۇزىندە جازعىرادى، ال ءىس جۇزىندە مۇمكىندىك بولسا، «يگىلىگىن» پايدالانىپ قالۋعا قارسى ەمەس. سوعان قاراعاندا، ماسىلدىق بولعان جەردە دامۋ، جاسامپازدىق، العا جىلجۋ بولمايتىنىن تۇسىنە بەرمەيتىن سياقتىمىز»، - دەيدى ول.

بۇل جاستار قازاقستاندىقتاردىڭ بويىنا ەڭبەكقورلىقتى بالا كەزىنەن ءسىڭىرۋ كەرەك دەپ ەسەپتەيدى. سول ءۇشىن «جاڭا قازاقستاننىڭ» قۇندىلىقتارىن بالانىڭ زەيىنىنە لايىقتالعان بويالاتىن سۋرەتتى البوم قۇراستىرىپتى.

«البومنىڭ ءار بەتىندە ەڭبەكقورلىق، ءبىلىمنىڭ قۇدىرەتى تۋرالى بالاڭ تۇسىنىكتەر قالىپتاستىراتىن سۋرەتتەر بەرىلگەن. بالا سونى بوياپ وتىرىپ، «جاڭا قازاقستاننىڭ» قۇندىلىقتارىن ساناسىنا ءبىرتىندىپ سىڭىرە باستايدى»، - دەپ ءتۇسىندىردى قوزعالىس بەلسەندىسى ناربەك قوجاحمەتوۆ.

بۇلار قولعا العان تاعى ءبىر جوبا - «جاڭا قازاقستان ورناتۋشىنىڭ كۇندەلىگى» دەيتىن قويىن كىتاپ.

«ونىڭ العاشقى تيراجىن وسى جولى جاڭادان تاعايىندالعان مينيسترلەر، وزگە دە ورتالىق مەملەكەتتىك ورگان باسشىلارىنا تاراتتىق. مادەنيەت، ەكولوگيا، ءبىلىم، يندۋستريا سالاسىنا سالىستىرمالى تۇردە جاس مينيسترلەر تاعايىندالعانىن بىلەسىزدەر. مىنە سونداي ادامدارعا وزدەرىنىڭ «جاڭا قازاقستان» فورماتىنداعى باسشىلار بولۋى كەرەكتىگىن كۇندەلىكتى ەستەرىنە سالۋ ءۇشىن وسى كۇندەلىكتى تابىستادىق. ونىڭ ءار بەتى كۇنتىزبەنىڭ ءبىر كۇنىنە ارنالعان. ءار پاراققا پرەزيدەنتتىڭ «جاڭا قازاقستان، «ەكىنشى رەسپۋبليكا» تۋرالى ايتقان تۇجىرىمدارىن قىسقارتىپ بەردىك. ەندىگى تيراجدارىن كىمگە تاپسىراتىنىمىزدى الەۋمەتتىك جەلى ارقىلى حالىقپەن اقىلداسىپ وتىرىپ ىرىكتەيمىز. جەلىدە تاستاعان ساۋالداردارىمىزعا قالدىرعان پىكىرلەر نەگىزىندە لايىقتى تۇلعالاردى ىرىكتەپ، سولارعا تاراتامىز. بۇل ءبىر جاعىنان «جاڭا ادامدار» يدەياسىنىڭ قوعام ىشىندە تارالۋىنا ىقپال ەتسە، ەكىنشى جاعىنان ىرىكتەلگەن تۇلعالارعا «جاڭا ادام» ستاتۋسىن حالىقتىڭ بەرگەنىن ەسكەرتىپ تۇرادى»، - دەيدى ناربەك.

ال «ەڭ باستى كۇنتىزبە» دەيتىن كۇنپاراقتىڭ ءار بەتىنە «جاڭا ادامدار» جاستار قوزعالىسىنىڭ بەلسەندى وكىلدەرىنىڭ سۋرەتىمەن بىرگە پرەزيدەنتتىڭ بيىلعى جولداۋدا ايتقان ويلارى، باستامالارى تۋرالى قاراپايىم حالىقتىڭ پىكىرى، پايىمى بەرىلگەن.

ءبىز كامپۋسقا كەشكى ساعات 18.00-دەن كەيىن باس سۇققان بولاتىنبىز. ساباقتان بوساعان ستۋدەنتتەر لەك- لەگىمەن كەلىپ، قاۋقىلداسىپ جاتتى. ءبىر توپ جاس يدەيالارىن شاي ۇستىندە تالقىلاپ جاتسا، ەندى ءبىر توپ تەننيس ۇستەلىنىڭ باسىندا پىسىقتاپ تۇرعاندارىن ايتتى. قولىنا قىلقالام الىپ، ويىن بوياۋمەن كەستەلەپ جاتقان بىرنەشە جاس ءوز الدىنا بولەك ءجۇر. كومپيۋتەر الدىنداعى بىرنەشە جاس ينتەرنەتتەن ستاتيستيكا الىپ، سوعان تالداۋ جاساپ جاتقانداي كورىندى. ءبىر بۇرىشتا كينو كورىپ، مۋزىكا تىڭداپ وتىرعان بىرنەشە جاستى دا كوزىمىز شالىپ قالدى.

«باسىندا بۇل ۇيىمنىڭ اتىنا قاراپ، سكەپتيكالىق كوزقاراسپەن قابىلدادىق. ءبىراق باستاماشىل توپپەن تانىسىپ، ىستەپ جۇرگەن جۇمىستارىن كورگەن سوڭ باعىتتارى ۇنادى. بۇل جەردە مۇمكىندىكتەر كوپ. جاستاردى قولداۋدىڭ جاڭا ءبىر ارناسى ەكەنىن ۇقتىق. ءوزىمىزدى دامىتا وتىرىپ، ەلگە پايدالى ىسكە اتسالىسۋ مۇمكىندىگى بار. سول مۇمكىندىك اقىرى مەنى دە وسى قوزعالىستىڭ مۇشەسىنە اينالدىردى»، - دەيدى ساياجان قايدار.

ساياجان قايدار مەن بوتا انۋاربەك قازىر ۋنيۆەرسيتەت قابىرعاسىندا باسپا ءىسىن مەڭگەرىپ ءجۇر.

«ءوز سالامىزدى ايتساق، قازىر جاستار اراسىندا ساۋاتتى سويلەۋ، جازۋ، پىكىر الماسۋ كادىمگىدەي پروبلەماعا اينالىپ بارا جاتىر. باسىندا سلەنگ رەتىندە كىرگەن «نەستيەۆاتسىن - كينوقاراۆاتىرق»، دەگەن سياقتى سوزدەر نورماعا اينالىپ بارادى. وسى قوزعالىس اياسىندا سوعان توسقاۋىل قويساق دەپ، ءبىر جوبا باستادىق. ازىرگە بۇگە- شىگەسىن ايتپاي- اق قويايىق. ارىق سويلەپ، سەمىز شىققىمىز كەلەدى. جالپى سلەنگتىڭ ءبارىن تىلگە نورما رەتىندە قابىلداي بەرۋ «جاڭا قازاقستاننىڭ» جاڭا ادامدارىنا جات قىلىق بولۋى كەرەك»، - دەدى بوتا انۋاربەك.

اڭگىمە اياعىندا جاستار ءوز قاتارلارىنا «جاڭا قازاقستان» قۇرۋعا ىسپەن ۇلەس قوسقىسى كەلەتىن كەز كەلگەن ادامدى، جاسىنا، قىزمەتىنە قاراماستان قابىلداۋعا ءازىر ەكەندەرىن ايتتى.

«ازىرگە استانا جاستارىن «جاڭا قازاقستان» باستاماسىن ىسكە اسىرۋعا جۇمىلدىرساق دەيمىز. بۇل تالپىنىسىمىز جەمىس بەرىپ جاتسا، ءساتتى تاجريبەمىزدى بۇكىل رەسپۋبليكاعا تاراتقىمىز كەلەدى»، - دەيدى الپامىس ءابىلوۆ.

اۆتور

ەسىمجان ناقتىباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى