ەلىمىزدە بالالارعا پاپيللوما ۆيرۋسىنا قارسى ۆاكتسينا سالىنا باستايدى
بۇل تۋرالى اتالعان ۆەدومستۆونىڭ باسشىسى اجار عينيات ايتتى، دەپ حابارلايدى قازاقپارات ءتىلشىسى.
«قازىرگى كەزدە مينيسترلىك حالىققا ونكولوگيالىق كومەك كورسەتۋدى جاقسارتۋدىڭ 2023-2025-جىلدارعا ارنالعان كەشەندى جوسپارىن ازىرلەپ جاتىر. بۇل جوسپاردا ادام پاپيللوما ۆيرۋسىنا قارسى ۆاكسينا ەگۋ قاراستىرىلعان. سونىمەن قاتار، اتالعان ءىس-شارالار اياسىندا قاتەرلى ىسىك اۋرۋلارىنا قارسى ءتيىستى قادامدار ەسكەرىلگەن. اتاپ ايتقاندا، بۇل باعىتتا ءتيىستى جۇمىس اتقارىلادى جانە ونى اتا-انالاردىڭ كەلىسىمىن ەسكەرە وتىرىپ ىسكە اسىرامىز»، - دەدى ا. عينيات سەناتتىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.
ونىڭ ايتۋىنشا، بيىل اتالعان جوسپارعا قاتىستى دايىندىق جۇرگىزىلەدى.
«2023-جىلى ەگجەي-تەگجەيلى تالقىلاۋ، نورماتيۆتىك-قۇقىقتىق اكتىلەردى دايارلاۋ، بيۋجەتتى قورعاۋ جۇمىستارى ەسكەرىلگەن. بيۋدجەت بەكىتىلگەننەن كەيىن اتالعان ءىس-شارالار كەلەر جىلدان باستالادى. بۇل تۇرعىدا كامەلەتكە تولماعان بالالار قامتىلادى. ەگەر بۇل ءىس-شارالار ۇلتتىق كۇنتىزبەگە ەنگىزىلسە، ونىڭ بارلىعى اقىسىز بولادى»، - دەدى مينيستر.
ەسكە سالساق، 2013-جىلدىڭ قىركۇيەك ايىنان باستاپ جاس ءوسپىرىم قىزدارعا پاپيللوما ۆيرۋسىنا قارسى ۆاكسينا ەگىلەتىنى حابارلانعان ەدى.
اتالعان پاپيللوما ۆيرۋسىنا قارسى ەگۋ جۇمىستارى قاتەرلى ىسىكتىڭ الدىن الۋ ماقساتىندا جۇرگىزىلەدى.
