ۇلى بريتانيادا ەنەرگەتيكا داعدارىسى: ۇكىمەت ۇنەمدەۋگە ىنتالاندىرىپ جاتىر
بۇعان قوسا ەۋروپادان سۋاستى كابەلدەرى ارقىلى اكەلىنەتىن جارىق تاسىمالدانباي قالادى دەگەن قاۋىپ بار. حالىقتى ۇنەمدەۋگە ىنتالاندىرۋ ماقساتىندا ۇكىمەت ءتۇرلى ارەكەتتەرگە بارىپ جاتىر، دەپ حابارلايدى قازاقپارات ءتىلشىسى.
لوندوندا شاعىن ەكى بولمەلى پاتەر يەلەرى ەلەكتر ەنەرگياسى مەن كوگىلدىر وتىن ءۇشىن ايىنا تەڭگەمەن 200 مىڭ تولەۋگە ءماجبۇر.
پەشتى كۇنىنە ەكى مەزگىل عانا قوسىپ، جارىقتى ۇنەمدەگەننىڭ وزىندە وسىنداي باعا شىعادى.
ءتىپتى ۇكىمەتتىڭ كومۋنالدىق تولەمگە دەپ اي سايىن جاردەماقى رەتىندە بەرەتىن 38 مىڭ تەڭگەسى كومەكتەسپەي جاتىر.
ناتيجەسىندە ءۇي دۇرىس جىلىمايدى، وتباسى مۇشەلەرى اۋىرا باستايدى. قابىرعالاردى زەڭ باسىپ، ول دا دەنساۋلىققا زيان كەلتىرەدى.
مەري وبومەزە جەرگىلىكتى بيلىك جالعا بەرگەن ارەندالىق پاتەردە تۇرادى. اي سايىنعى تابىسى 900 مىڭ تەڭگەمەن بۇكىل وتباسىن اسىراپ وتىر. ەكى بالاسى وقۋشى، كۇيەۋى - تۇراقتى تابىسى جوق جۋرناليست- فريلانسەر.
دەمالىس كۇندەرى تاڭ اتىسىمەن 52 جاستاعى ايەل لوندوننىڭ وڭتۇستىك شىعىسىندا ورنالاسقان ۆۋلۆيچ ورتالىعىنىڭ كىتاپحاناسىنا بەت الادى. ماقساتى - رۋحاني بايۋ ەمەس، ەكى ساعاتقا بولسا دا جىلىنىپ قايتۋ.
«ءبىز بۇل ايدا جىلۋدىڭ اقىسىن تولەي المايمىز. وتكەن ايدا دا كەيىنگە قالدىرا تۇرۋ جونىندە ءوتىنىش بىلدىردىك. بالالارىم توڭىپ قالعانىن ايتقاندا جانىم اۋىرادى. سوندىقتان جىلۋدى جارتى ساعاتقا قوسىپ، قايتا وشىرۋگە تۋرا كەلەدى»، - دەيدى مەري وبومەزە.
مۇنداي جىلى ۇيالاردى بۇكىل قالا بويىنشا تابۋعا بولادى. ولاردى اۋداندىق مەريالار شىركەۋ، كىتاپحانا سياقتى قوعامدىق ورىنداردا كوپتەپ اشىپ تاستاعان.
كەيبىرى ءتىپتى تەگىن ۆاي- فاي، تاماق پەن سۋسىندى دا ۇسىنادى. ءبىراق كوپشىلىك مۇندا كەلۋگە قىسىلادى ەكەن.
«ورتالىعىمىزداعى جىلى ۇيانى حالىق اراسىندا كەڭىنەن ناسيحاتتاۋعا تىرىسىپ جاتىرمىز. ءبىراق، مەنىڭ ويىمشا، كوبى، وكىنىشكە قاراي، مۇندا كەلۋگە ازداپ ۇيالادى. ايتقىم كەلگەنى، قازىرگى زاماندا بۇل البەتتە ۇيات جاعداي، ءبىراق باسقا امالىمىز جوق»، - دەيدى كىتاپحانا قىزمەتكەرى ەمي دجەكسون.
بۇل اپتادا تۇماندى البيوندا كۇن سالقىنداپ، ەلەكتر ەنەرگياسىن پايدالانۋشىلار قاتارى ارتادى دەگەن قاۋىپ بار.
ەۋروپادان سۋاستى كابەلدەرى ارقىلى تاسىمالداناتىن جارىق تا جەتپەۋى مۇمكىن.
وعان دەگەن سۇرانىستى تومەندەتۋ ءۇشىن ۇلتتىق ەلەكتر جەلىلەرى وپەراتورى جاڭا باستامانى قولعا الدى.
بۇدان بىلاي كەشكى ۋاقىتتا، ماسەلەن، كىر جۋۋ جانە كەپتىرۋ ماشيناسىن قوسپاعان تۇتىنۋشىلار تولەم بويىنشا جەڭىلدىكتەرگە يە بولا الادى.
«وسىلايشا ءبىز جارىقتى ەڭ كوپ تۇتىناتىن كەزدە وعان دەگەن سۇرانىستى ازايتۋعا تىرىسامىز. ادەتتە قىستا ەلەكتر جەلىلەرىنە سالماق كەشكى 5 پەن 6 اراسىندا تۇسەدى. سمارت ەسەپتەگىش قۇرالدارى بار تۇرعىنداردىڭ ءبىر جىلدا 100 فۋنتقا دەيىن اقشا ۇنەمدەۋگە مۇمكىندىگى بار»، - دەيدى ۇلىبريتانيانىڭ ۇلتتىق ەلەكتر جەلىلەرى وپەراتورىنىڭ اتقارۋشى ديرەكتورى فينتان سلاي.
ەلدە قازىر كۇن سالقىن بولعانىمەن، قاتتى جەل جوق. جاڭارتىلمالى قۋات كوزى سانالاتىن جەل ديىرمەنلەرى كادەگە اسپاي تۇر. سوندىقتان ءۇش كومىر ەلەكتر ستانتسياسى قاجەت بولعان جاعدايدا قوسىلۋعا ساقاداي ساي تۇر.
نەگىزى ۋكرايناداعى جاعداي ۇلى بريتانياداعى تابيعي گازدىڭ باعاسىن كۇرت كوتەرىپ، ءومىر ءسۇرۋ قۇنىن قىمباتتاتىپ جىبەردى.
ينفلياتسيا ەۋروپا ەلدەرى اراسىندا بۇرىن- سوڭدى بولماعان دەڭگەيگە جەتىپ، حالىقتى ابىگەرگە سالۋدا.
