كوكونىسى ءۇسىپ كەتكەن تۇركىستاندىق شارۋالارعا كومەك كورسەتىلەدى

ماسەلەنىڭ ءمان- جايىن ءوڭىر اكىمى دارحان ساتىبالدى ايتىپ بەردى، دەپ حابارلايدى قازاقپارات ءتىلشىسى.

«سوڭعى كۇندەرى كۇن قاتتى سۋىتىپ كەتتى، وڭتۇستىك وڭىرلەردە سوڭعى 50 جىلدا مۇنداي تومەن تەمپەراتۋرا بولماعان. وڭىردە كومىرگە سۇرانىس ەسەلەپ ارتتى. سۋىقتان 43 گەكتار كولەمىندەگى جىلىجايعا زالال كەلدى. انىقتالعانداي، 33 گەكتاردى قۇرايتىن جىلىجاي ءتيىستى قۇجاتسىز، ءوز بەتىنشە جۇمىس ىستەپ تۇرعان جانە وندا ءونىم بولماعان. ياعني جىلىجاي بوس بولعان»، - دەدى دارحان ساتىبالدى ۇكىمەت وتىرىسىنان كەيىن ب ا ق وكىلدەرىنىڭ ساۋالىنا جاۋاپ بەرە تۇرىپ.

اكىم بەرگەن مالىمەتكە سايكەس 3,7 گ ا جەرگە قيار، قىزاناق جانە قۇلپىناي كوشەتى وتىرعىزىلدى.

«ءبىز جىلىجاي يەلەرىمەن سويلەستىك. كىمدە كرەديت بار، تولەۋ مەرزىمىن شەگەرتكىمىز كەلىپ وتىر. قۇجاتى جوق جىلىجاي يەلەرىنە دە قول ۇشىن سوزباقپىز. جالپى زارداپ شەككەن جىلىجايلاردىڭ باستى پروبلەماسى - جىلۋ تاپشىلىعى. قازاندىق ىستەن شىعىپ، سۋ قۇبىرى قاتىپ قالعان، سالدارىنان كوشەتتەر ءۇسىپ كەتتى»، - دەيدى ءوڭىر باسشىسى.

ايتا كەتسەك، بۇعان دەيىن ب ا ق بەتتەرىندە شىمكەنت قالاسى مەن تۇركىستان وبلىسىنداعى جىلىجايلاردا ونداعان توننا كوكونىستىڭ ءۇسىپ كەتكەنى جازىلعان ەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى