قاراعاندى وبلىسىندا ءار ۇيدە ەكى-ءۇش تازى وسىرەتىن ەرەكشە اۋىل بار
قازىر كەنشوقى ەلدى مەكەنىنىڭ ءار ءۇيىنىڭ اۋلاسىنان ەكى-ءۇش تازىنى كورۋگە بولادى.
نەگىزگى سەلەكتسيونەر - اسحات امانبايەۆ. 30 جىل بويى اسحات قازاقي تازى پوپۋلياتسياسىنا قامقورلىق جاساپ كەلەدى جانە ولارعا جايلى يەلەرىن تابۋدا.
«ءۇش-ءتورت جىل بۇرىن مەندە 80 تازى بولدى. كۇشىكتەرمەن بىرگە ولاردىڭ سانى 300 گە جەتتى. ۋاقىت وتە كەلە ولاردى دوستارىما، تۋىستارىما تاراتا باستادىم. اسىل تۇقىمدى تازىلار - ءبىزدىڭ جەتى قازىنامىزدىڭ ءبىرى. ولار ءار ۇيدە بولۋى كەرەك. قازىر مەندە تەك 30 تازى بار. ونىڭ بىرنەشەۋى - 2018-جىلى تارازدا وتكەن حالىقارالىق جارىستىڭ گران-پري يەگەرلەرى»، - دەيدى اسحات امانبايەۆ.
قازاق تازىسى ءوزىنىڭ ەرەكشە مىنەزىمەن تانىمال. تازىلار ءتىپتى وزىنەن ەكى ەسە ۇلكەن اڭداردان دا قورىقپايدى. ولار قويان مەن قاسقىردى وڭاي اۋلايدى.
اسحات اسىل تۇقىمدى يتتەردى ءوسىرۋ وڭاي ەمەس ەكەنىن مويىندايدى.
«بالا كۇنىمنەن وسى تازىعا قۇمارمىن. باياعىدا وسى اۋىلدا كەرەمەت اڭشىلار بولعان. سول كىسىلەرگە قاراپ ەلىكتەدىك، تازىلارىن كورىپ قىزىعاتىنبىز. «شىركىن، مەندە دە وسىنداي يتتەر بولسا» دەپ ارماندايتىنبىز. سول كىسىلەردەن تۇقىمىن الدىق. تازى ءوزى ەكى تۇرگە بولىنەدى عوي. شاشاق قۇلاقتى، جارعاق قۇلاقتى بولىپ. ءبىزدىڭ تازىلار شاشاق قۇلاقتىسىنا جاتادى. جەڭىل بولۋ كەرەك، تىقىر بولۋ كەرەك، قۇلاعى شاشاقتى، قۇيرىعى دوعال، كەۋدەسى كەڭ»، - دەيدى تازى ءوسىرۋشى.
كەنشوقى تۇرعىندارى تەك تازى وسىرۋمەن عانا ەمەس، ولاردى تانىمال ەتۋمەن دە اينالىسادى.
ول ءۇشىن جەرگىلىكتى تۇرعىن دياس مەيىرحانوۆ Instagram پاراقشاسىنان قازاق تازىسى جانكۇيەرلەرىنىڭ كلۋبىن اشتى. قازىر وعان ءتورت مىڭنان استام ادام قوسىلعان.
«بىزدە ميلليونعا جۋىق قارالىم بار. جازىلۋشىلار كەيبىر پاراقشالارداعىداي جالعان ەمەس. ءبىز ءوز پاراقشامىزدا اڭشىلىق بەينەجازبالاردى جاريالايمىز، تازىلارعا قالاي دۇرىس كۇتىم جاساۋ كەرەكتىگىن كورسەتەمىز. ءبىزدىڭ ماقساتىمىز - ۇلتتىق قۇندىلىقتاردى دارىپتەۋ»، - دەپ اتاپ ءوتتى دياس مەيىرحانوۆ.
