الماتىدا كولىك ۇرىسى وزىنە پىشاق سالدى
ونىڭ ۆيدەوسى الەۋمەتتىك جەلىدە تارادى.
بەينەجازبادان ەر ادامنىڭ قانعا بويالعان جەردە جاتقانىن جانە ونى پوليتسيا قىزمەتكەرلەرى ۇستاعانىن كورۋگە بولادى.
الماتى قالالىق پوليتسيا دەپارتامەنتى ءمالىم ەتكەندەي، 24-قاڭتاردا جەدەل باسقارۋ ورتالىعىنا ەر ادام قوڭىراۋ شالىپ، بەلگىسىز بىرەۋ ونىڭ «دەۋ» اۆتوكولىگىن ۇرلاماق بولعانىن جەتكىزدى.
قوڭىراۋ شالۋشى كەڭسە پىشاعىمەن قارۋلانعان كۇدىكتىنى جاياۋ اڭدىپ كەلە جاتقانىن ايتقان.
بىرنەشە مينۋتتان كەيىن پاترۋلدىك پوليتسيا قىزمەتكەرلەرى ەر ادامعا كومەككە كەلدى. ارتىنا تۇسكەن ءتارتىپ ساقشىلارىنان قاشىپ، جاسىرىنعىسى كەلگەن كۇدىكتى، وزىنە پىشاق جاراقاتىن سالدى.
مەديتسينالىق كومەك الۋ ءۇشىن ول قالاداعى اۋرۋحانالاردىڭ بىرىنە جەتكىزىلدى.
«ءىس جۇرگىزۋ بارىسىندا، كۇدىكتىنىڭ بوتەن ادامنىڭ كولىگىن «اقساي» شاعىن اۋدانىندا ۇرلاپ كەتكەنى انىقتالدى. سول جەردە ول جول- كولىك وقيعاسىن جاسادى. كولىك يەسى اپات ورنىنا جاياۋ جۇگىرىپ جەتىپ، كولىكتى ايداپ اكەتكەن ادامدى ۇستاۋعا ارەكەتتەنگەن. اتالعان دەرەك بويىنشا قىلمىستىق ءىس تىركەلدى. باسقا دا ءمان- جايلار انىقتالاتىن بولادى»، - دەدى، اۋەزوۆ اۋداندىق پوليتسيا باسقارماسىنىڭ باستىعى ۇلان ءابىلقايىر.
