ۋنيۆەرسيادا: قىسقى ۋنيۆەرسيادادا قازاقستان قورجىنى تاعى ەكى مەدالمەن تولىقتى
قازاقستاندىق حوككەيشىلەر 3-ورىن ءۇشىن سايىستا جاپونيامەن كەزدەستى.
قۇرامالار العاشقى بولىپ ەسەپ اشۋعا كۇش سالدى. ناتيجەسىندە 6-مينۋتتا قازاقستاندىق ماكسيم مۋحامەتوۆ قاقپانى ءدال كوزدەپ، ءوز قۇراماسىن العا شىعاردى. ءبىرىنشى كەزەڭدە ەسەپتى وزگەرتەتىن بىرنەشە مۇمكىندىك بولدى. ونى قۇرامالار پايدالانا العان جوق.
ەكىنشى كەزەڭدە قازاقستاندىق حوككەيشىلەر قاتارىنان ءۇش شايبا سوقتى. ويىننىڭ 22-مينۋتىندا سايان دانيار ەسەپتى ۇلعايتسا، ودان كەيىن ماكسيم مۋحامەتوۆ – 24، ءاليحان ومىربەكوۆ – 25، باتىرلان مۇراتوۆ 38-مينۋتتا مەرگەندىك تانىتتى. وعان 39-مينۋتتا جاپونيالىق حوككەيشىلەر ءبىر شايبامەن جاۋاپ قايىردى.
ءۇشىنشى كەزەڭدە قازاقستاندىق ءالي قاسەنوۆ 42-مينۋتتا گول سوقسا، ماكسيم مۋحامەتوۆ 47-مينۋتتا حەت-تريكتىڭ اۆتورى اتاندى. ال 48-مينۋتتا دانيل بۋتەنكو ەسەپتى ۇستەمەلەي ءتۇستى.
وسىلايشا قازاقستاندىق حوككەيشىلەر قارسىلاسىنان 8:1 ەسەبىمەن باسىم ءتۇسىپ، قولا جۇلدەگە يە بولدى.
ايتا كەتەيىك، توپتىق كەزەڭدە ەل قۇراماسى وڭتۇستىك كورەيانى - 5:1، ۆەنگريانى 9:1، ۇلى بريتانيانى 15:1، سلوۆاكيانى 4:0 ەسەبىمەن جەڭىپ، ا ق ش قۇراماسىنا 1:4 ەسەبىمەن ەسە جىبەردى. ال جارتىلاي فينالدا كانادا قۇراماسىنان 1:4 ەسەبىمەن جەڭىلىپ قالدى.
ۋنيۆەرسيادا فينالىندا 23-قاڭتار كۇنى، ەلوردا ۋاقىتىمەن 04:10-دا كانادا مەن ا ق ش قۇرامالارى كەزدەسەدى.
شايبالى حوككەيدەن قازاقستان ستۋدەنتتەر قۇراماسى ءدۇبىرلى دوداعا توعىز مارتە قاتىسقان بولاتىن - 1995 -جىلى چەمپيوندىق تۇعىرعا كوتەرىلدى، ال 1993، 2013، 2015، 2017 -جىلداردا كۇمىس، 2007 -جىلى قولا مەدال يەگەرى اتاندى.
سونداي-اق، قىسقى ۋنيۆەرسيادادا قازاقستان قورجىنى تاعى ءبىر مەدالمەن تولىقتى.
استانا. قازاقپارات – ا ق ش-تىڭ لەيك- پلەسيد قالاسىندا ءوتىپ جاتقان قىسقى ۋنيۆەرسيادادا شاڭعىشىلار اراسىندا 15 شاقىرىمعا جاپپاي ستارت ءوتتى، دەپ حابارلايدى قازاقپارات Sports.kz-كە سىلتەمە جاساپ.
قازاقستان نامىسىن 6 شاڭعىشى قىز قورعادى: كسەنيا شالىگينا، نادەجدا ستەپاشكينا، لاۋرا قينىبايەۆا، ايشا راقىشيەۆا، اناستاسيا روتوۆا جانە ماريا ليۋفت.
ولاردىڭ اراسىندا ۇزدىك ناتيجەنى كسەنيا شالىگينا كورسەتتى. ول ديستانتسيا كوشباسشىسىنان 11,7 سەكۋند ارتتا قالىپ، «قولاعا» قاناعات تۇتتى. التىن جۇلدەنى ەستونيالىق شاڭعىشى ماريەل پۋللەس جەڭىپ الدى. كۇمىس مەدال امەريكا سپورتشىسى كەندالل كرامەرگە بۇيىردى (+0.4 سەكۋند).
ايتا كەتەيىك، بۇل كسەنيا شالىگينا ءۇشىن ۋنيۆەرسيادا-2023-تەگى ەكىنشى مەدال. ول ايشا راقىشيەۆا، نادەجدا ستەپاشكينا ەنگەن قۇراممەن ەستافەتادا «قولاعا» قول جەتكىزگەن ەدى.
