الاياقتار «پرەزيدەنت اكىمشىلىگىنەن» قوڭىراۋ شالىپ، زارداپ شەگۋشىلەرگە ماسكي- شوۋ ۇيىمداستىرعان
وسىنداي الاياقتىق جاساعان 5 ادامعا سوت ۇكىمى شىقتى. الايدا ولار جازامەن كەلىسپەي، اپەللياتسياعا بەرگەن. قازاقپارات بۇل تۋرالى استانا قالالىق سوتىنا سىلتەمە جاساپ حابارلايدى.
استانا قالاسىنىڭ اپەللياتسيالىق سوتى 2022 -جىلدىڭ 21- قاراشاسىندا سارىارقا اۋدانىنىڭ №2 سوتى شىعارعان ۇكىمدى وزگەرىسسىز قالدىردى.
اتالعان ۇكىممەن ەكى ەپيزود بويىنشا (الاياقتىق جانە اسا ءىرى كولەمدە الاياقتىق جاساۋعا وقتالۋ) 5 ادام جاۋاپقا تارتىلعان بولاتىن. ءبىرىنشى ەپيزودتا سوما كولەمى - 250 مىڭ دوللار، ەكىنشىسى بويىنشا - 500 مىڭ دوللار.
انىقتالعانداي، اقتوبە قالاسىندا جۇرگەن ازامات ك. زارداپ شەگۋشىلەرگە قوڭىراۋ شالىپ، ءوزىن قازاقستان پرەزيدەنتى اكىمشىلىگىنىڭ لاۋازىمدى شەنەۋنىگى رەتىندە تانىستىرعان. ول مەملەكەت باسشىسى قاڭتار وقيعاسىنان كەيىن كەلەشەگىنەن زور ءۇمىت كۇتتىرەتىن جاس باسشىلار كومانداسىن جيناپ جاتقانىن ايتقان.
كەيىن استاناداعى قىمبات قوناقۇيلەردە زارداپ شەگۋشىلەردىڭ كەزدەسۋىن ۇيىمداستىرىپ، ولاردى جوعارى لاۋازىمدى قىزمەتتەر - اقتوبە قالاسىنىڭ اكىمى جانە اقتوبە وبلىسى اكىمىنىڭ ورىنباسارى ەتىپ تاعايىنداۋ ماسەلەسىن تالقىلاعان.
ك. مەن س. اتىنان جوعارى لاۋازىمدى شەنەۋنىكتەر ءرولىن ت. جانە ب. ويناعان.
ت. مەن ب. استانانىڭ قىمبات قوناقۇيلەرىندەگى كەزدەسۋگە جالعا الىنعان ليۋكس ساناتتاعى كولىكتەرمەن، جالدانعان وققاعارلارمەن بارىپ وتىرعان. قىلمىستىڭ تاعى ءبىر قاتىسۋشىسى - ب. ءوزىن ولاردىڭ جۇرگىزۋشىسى رەتىندە تانىستىرىپ، ءبىرىنشى ەپيزود بويىنشا 250 مىڭ دوللار اقشا العان.
كەلەسى ءبىر قاتىسۋشى - م. پاتەردى بىرنەشە تاۋلىككە جالعا الۋ، وزگە قالالاردان ۇشاقپەن كەلىپ- كەتۋ، ليۋكس ساناتتاعى كولىكتەردى جالعا الۋ، ەكى وققاراعاردى جالداۋ ماسەلەرىن ۇيىمداستىرعان.
2022 -جىلدىڭ 4- ناۋرىزىندا 300 مىڭ تەڭگە جانە 28 ميلليون تەڭگە كولەمىندەگى اقشانىڭ مۋلياجىن زارداپ شەگۋشىدەن الۋ بارىسىندا ازامات ب. -نى پوليتسيا قىزمەتكەرلەرى ۇستادى.
«ءارقايسىسىنىڭ ءرولى جانە ولاردىڭ كامەلەتكە تولماعان بالالارىنىڭ بارى ەسكەرىلە وتىرىپ، سوت 5-تەن 7 جىلعا دەيىن ءارتۇرلى جازا تاعايىندادى. ال دەلدالدىڭ قىلمىستىڭ اشىلۋىنا بەلسەندى اتسالىسقانى ەسكەرىلىپ، وعان 5 جىلعا شارتتى مەرزىم بەلگىلەندى»، - دەلىنگەن سوت حابارلاماسىندا.
سوتتالعانداردىڭ ۇكىمدى قايتا قاراۋ تۋرالى اپەللياتسيالىق شاعىمىن سوت قاناعاتتاندىرۋسىز قالدىردى.
فوتو: ortcom.kz
