ۇكىمەت باسشىسى: مينيسترلەر مەن اكىمدەر «بيۋجەتتى باسقارۋ» تاسىلىنەن «ناتيجەلەردى باسقارۋ» تاسىلىنە كوشۋى كەرەك
ق ر پرەمەر-ءمينيسترى ءاليحان سمايىلوۆ قارجى ۆەدومستۆونىڭ كەڭەيتىلگەن القا ماجىلىسىندە وسىنداي مىندەتتەر قويدى، دەپ حابارلايدى قازاقپارات ءتىلشىسى.
«بيۋجەت پروتسەسىن جاقسارتىپ، جەڭىلدەتۋ - ماڭىزدى جۇيەلىك مىندەت بولىپ وتىر. بيۋجەت جۇيەسىنىڭ اشىقتىعىن ارتتىرۋ قاجەت. مەملەكەتتىك جوسپارلاۋدى بيۋجەت شىعىستارىنا ناقتى بايلانىستىرۋ كەرەك.
تيىمدىلىكتى ارتتىرىپ، ءتيىمسىز شىعىستاردى قىسقارتۋ ءۇشىن بيۋجەتتىك باعدارلامالار اكىمشىلەرىنىڭ قارجىلىق ءتارتىبىن كۇشەيتۋ قاجەت»، - دەدى پرەمەر-مينيستر.
ونىڭ ايتۋىنا قاراعاندا بۇل ماسەلەدە ءبىرىنشى باسشىلاردىڭ جاۋاپكەرشىلىگى ماڭىزدى.
«ورتالىق جانە جەرگىلىكتى اتقارۋشى ورگانداردىڭ ءبىرىنشى باسشىلارىنىڭ ۇلكەن جەدەل دەربەستىگىن قامتاماسىز ەتۋ، ەڭ ۇلكەن الەۋمەتتىك-ەكونوميكالىق ناتيجە الۋ ماقساتىندا بيۋجەت قاراجاتىن ءتيىمدى يگەرۋ جانە ءبولۋ ءۇشىن ولاردىڭ جاۋاپكەرشىلىگىن ارتتىرۋ قاجەت.
نەگىزگى ماقسات - «بيۋجەت قاراجاتىن باسقارۋدان» «ناتيجەلەردى باسقارۋعا» كوشۋ. بيۋجەت شىعىستارىنىڭ تيىمدىلىگى مەن ەكونوميكالىق قايتارىمىن اۆتوماتتاندىرۋ جانە سيفرلاندىرۋ ەسەبىنەن دە ارتتىرۋ قاجەت. مۇنىڭ ءبارىن جاڭا بيۋجەت كودەكسى شەڭبەرىندە قاراستىرۋ قاجەت»، - دەدى ءاليحان سمايىلوۆ.
