بيۋجەتتىڭ شىعىسىن قىسقارتۋدى جوسپارلاپ وتىرمىز - ەرۇلان جاماۋبايەۆ
بۇل تۋرالى ق ر پرەمەر-ءمينيسترىنىڭ ورىنباسارى - قارجى ءمينيسترى ەرۇلان جاماۋبايەۆ ايتتى، دەپ حابارلايدى قازاقپارات ءتىلشىسى.
«بيۋجەتتى جوسپارلاۋ پروتسەسىندە شىعىندار وڭتايلاندىرىلادى جانە بيۋجەتتىڭ تەڭگەرىمدىلىگىن قامتاماسىز ەتۋدى كوزدەپ وتىرمىز. جاقىن ارادا ءبىز بيىلعا ارنالعان رەسپۋبليكالىق بيۋجەتتىڭ شىعىس پارامەترلەرى مەن باعىتتارىن ناقتىلايمىز. بۇل رەتتە پرەزيدەنتتىڭ سايلاۋالدى باعدارلاماسى مەن قازاقستان حالقىنا جولداۋىندا ايتىلعان باستامالارى مەن تاپسىرمالارىنا باسا نازار اۋدارىلادى»، - دەدى ول ۆەدومستۆونىڭ كەڭەيتىلگەن القا ماجىلىسىندە.
سونداي-اق، الداعى 3 جىلدىڭ بيۋجەتىن قالىپتاستىرۋ جۇمىسى جالعاساتىنىن ايتتى.
«بۇل جەردە بيۋجەت تيىمدىلىگىن ارتتىرۋ جانە مەملەكەت قارجىسىنىڭ تۇراقتىلىعىن نىعايتۋ جونىندەگى تاپسىرمالار ەسكەرىلەدى. بۇل باعىتتاعى بيۋجەت كودەكسىنىڭ جاڭا جوباسىندا بارىنشا جۇيەلى شەشىمدەر كورىنىس تاباتىن بولادى. بۇل بيۋجەت پروتسەسىن وڭايلاتۋ جانە فيسكالدىق شارالاردى ورتالىقسىزداندىرۋ، ماڭىزدى الەۋمەتتىك ماڭىزى بار، جالپىحالىقتىق جوبالاردى ىسكە اسىرۋعا مەملەكەت باسشىسىنىڭ شەشىمىمەن عانا نىسانالى ترانسفەرتتەر ءبولۋ، مەملەكەتتىك ورگاندار مەن كۆازيمەملەكەتتىك كومپانيالار قىزمەتىنىڭ ەسەپتىلىگى مەن اشىقتىعىن قامتاماسىز ەتۋ جانە بيۋجەتتىك جانە ستراتەگيالىق جوسپارلاۋدى تولىق سيفرلاندىرۋ ماسەلەلەرىن قوزعايدى»، - دەپ ءتۇسىندىردى ەرۇلان جاماۋبايەۆ.
