قۇرىلىس كودەكسىن ساپالى ءارى ۋاقتىلى ازىرلەۋ كەرەك - ءاليحان سمايىلوۆ
بۇل تۋرالى پرەمەر-مينيستر ءاليحان سمايىلوۆ ايتتى، دەپ حابارلايدى قازاقپارات ءتىلشىسى.
«قۇرىلىس جانە تۇرعىن ءۇي-كوممۋنالدىق شارۋاشىلىق سالاسىن دامىتۋعا باسا نازار اۋدارۋ قاجەت. پرەزيدەنتتىڭ سايلاۋالدى باعدارلاماسىنا سايكەس، الداعى 7 جىل ىشىندە 111 ميلليون شارشى مەتر تۇرعىن ءۇيدى پايدالانۋعا بەرۋ جوسپارلانىپ وتىر. ونىڭ 15,3 ميلليون شارشى مەترىن بيىل اياقتاۋىمىز قاجەت. الايدا، وتكەن جىلدىڭ ناتيجەسىن الىپ قارايتىن بولساق، وڭىرلەردە تۇرعىن ءۇي قۇرىلىسىنىڭ قارقىنى تومەندەپ كەتكەنى بايقالادى»، - دەدى ءاليحان سمايىلوۆ يندۋستريا جانە ينفراقۇرىلىمدىق دامۋ مينيسترلىگىنىڭ كەڭەيتىلگەن القا وتىرىسىندا.
وسىعان بايلانىستى ۇكىمەت باسشىسى مينيسترلىك باقىلاۋدى كۇشەيتىپ، جوسپارلانعان كورسەتكىشتەردى قامتاماسىز ەتۋى تيىستىگىن باسا ايتتى. سونىمەن بىرگە جەرگىلىكتى اتقارۋشى ورگاندار دا ءوز تاراپىنان ءتيىستى ينفراقۇرىلىم تارتۋ ماسەلەسىن تولىعىمەن شەشۋى قاجەتتىگىن ەسكەرتتى.
«سونىمەن قاتار، ۇكىمەتكە جاڭا قۇرىلىس كودەكسىن ازىرلەۋ تاپسىرىلدى. اتالعان قۇجاتتى ساپالى جانە ۋاقتىلى ازىرلەۋ كەرەك. وتكەن جىلى تۇرعىن-ءۇي كوممۋنالدىق شارۋاشىلىق جەلىلەرىن سالۋ جانە جاڭعىرتۋ جۇمىستارىنىڭ ارقاسىندا ولاردىڭ توزۋ دەڭگەيى 51 پايىزدان اسقان جوق. مەملەكەت باسشىسىنىڭ سايلاۋالدى باعدارلاماسىنا سايكەس، بۇل كورسەتكىشتى 2029-جىلدىڭ سوڭىنا قاراي 40 پايىزعا دەيىن تومەندەتۋىمىز كەرەك»، - دەدى پرەمەر-مينيستر.
