ءاليحان سمايىلوۆ تاۋ-كەن سالاسىنداعى ءوندىرىس كولەمىن قالپىنا كەلتىرۋدى تاپسىردى
«مەملەكەت باسشىسى قاسىم-جومارت كەمەل ۇلى توقايەۆ ۇكىمەتتىڭ الدىنا قازىرگى ۋاقىتتىڭ تالاپتارى مەن سىناقتارىنا جاۋاپ بەرەتىن جاڭا ماقسات-مىندەتتەردى قويىپ وتىر. ولار پرەزيدەنتتىڭ سايلاۋالدى باعدارلاماسىندا، قازاقستان حالقىنا جولداۋىندا جانە ۇكىمەتتىڭ كەڭەيتىلگەن ماجىلىسىندە بەرىلگەن. يندۋستريا مينيسترلىگى - ەلىمىزدەگى اسا ماڭىزدى جوبالاردى جۇزەگە اسىراتىن نەگىزگى مەملەكەتتىك ورگاننىڭ ءبىرى. بۇل سىزدەردىڭ ۇجىمدارىڭىزعا زور جاۋاپكەرشىلىك جۇكتەيدى»، - دەدى ءاليحان سمايىلوۆ يندۋستريا جانە ينفراقۇرىلىمدىق دامۋ مينيسترلىگىنىڭ كەڭەيتىلگەن القا وتىرىسىندا.
وسى ورايدا، ۇكىمەت باسشىسى مينيسترلىك نازار اۋدارۋى ءتيىس باعىتتارعا توقتالدى.
«2022 -جىلدىڭ قورىتىندىسى بويىنشا وڭدەۋ ونەركاسىبىندەگى ءوندىرىس كولەمى 3,4 پايىزعا ءوستى. دەگەنمەن، 2021-جىلعا قاراعاندا بىلتىر تاۋ-كەن ءوندىرۋ سالاسىنىڭ دامۋ قارقىنى ءبىرشاما باياۋلاپ كەتتى. وعان الەمدەگى كۇردەلى گەوساياسي جاعداي، جاھاندىق لوگيستيكالىق باعىتتاردىڭ بۇزىلۋى سياقتى كوپتەگەن فاكتورلار اسەر ەتكەنى بەلگىلى. سوعان قاراماستان، تاۋ-كەن سالاسىنداعى ءوندىرىس كولەمىن قالپىنا كەلتىرىپ، تۇراقتى ءوسۋدى قامتاماسىز ەتۋ وتە ماڭىزدى»، - دەدى ۇكىمەت باسشىسى.
