قازاقستاندا وتكەن جىلى جول اپاتىنان قانشا بالا مەرت بولدى

«تالداۋ كورسەتكەندەي، بالالارمەن بولعان جول-كولىك وقيعالارىنىڭ 90 پايىزعا جۋىعى جۇرگىزۋشىلەردىڭ كىناسىنەن جاسالادى. كوپ جاعدايدا زارداپ شەككەن بالالاردى ەرەسەكتەر اۆتوموبيلدەردە تاسىمالداۋ ەرەجەلەرىن بۇزا وتىرىپ، ارنايى ۇستاعىش قۇرىلعىلارسىز نەمەسە قاۋىپسىزدىك بەلدىكتەرىن پايدالانباي تاسىمالدايدى.

سونىمەن قاتار كوبىنەسە جولداردىڭ جانىندا ابايسىزدىقتان (ۇيالى تەلەفونداردى، قۇلاققاپتاردى جانە تاعى باسقاسىن پايدالانۋ) جولدىڭ بەلگىلەنبەگەن جەرىنەن، باعدارشامنىڭ تىيىم سالىنعان بەلگىسىنە نەمەسە جاقىن كەلە جاتقان كولىكتىڭ الدىنان ءوتۋ سەبەپتەرى بويىنشا بالالار جول-كولىك وقيعاسىنىڭ كىنالىلەرىنە اينالادى»، - دەپ اتاپ وتەدى ءبىرىنشى ۆيتسە-پرەمەر جاۋابىندا.

ونىڭ دەرەگىنشە، 2022-جىلى كامەلەتكە تولماعاندارمەن بولعان جول-كولىك وقيعالارىنىڭ سانى 15 پايىزعا (2939 دان 3385 كە دەيىن) ارتقان. سونىڭ سالدارىنان قايتىس بولعان بالالار سانى 24 پايىزعا (200 دەن 248 گە دەيىن) جانە جارالانعاندار سانى 20 پايىزعا (3333 تەن 3989 عا دەيىن) ۇلعايعان.

«ىشكى ىستەر مينيسترلىگى مۇددەلى مەملەكەتتىك ورگاندارمەن بىرلەسىپ، جۇيەلى نەگىزدە جولدارداعى بالالار ءولىمىن ازايتۋ، ونىڭ ىشىندە ءبىلىم بەرۋ ۇيىمدارىنىڭ جانىندا ءتيىستى قاۋىپسىز ينفراقۇرىلىمدى قامتاماسىز ەتۋ جونىندە ءىس-شارالار قابىلداۋدا. بالالار ءبىلىم بەرۋ مەكەمەلەرى ورنالاسقان اۋداندارىندا 6 مىڭعا جۋىق جاياۋ جۇرگىنشىلەر وتكەلى، ونىڭ ىشىندە 1,3 مىڭ رەتتەلەتىن، سونداي-اق لابيرينتتىك ۇلگىدەگى 5,6 مىڭ جاياۋ جۇرگىنشىلەر قورشاۋى، 3 مىڭنان استام كولىك تۇراعى ۇيىمداستىرىلعان. ءبىلىم بەرۋ ۇيىمدارىنىڭ جانىندا 4 مىڭنان استام جاساندى جول بۇدىرلارى، 11 مىڭنان استام «بالالار» جول بەلگىلەرى ورناتىلعان»، - دەدى ول.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى