باس پروكۋراتۋرا وكىلى فرانسيادان ءابليازوۆتى قايتارۋعا قاتىستى پىكىر ءبىلدىردى

ايتا كەتەيىك، بۇگىن پارلامەنت ءماجىلىسىنىڭ جالپى وتىرىسىندا «قازاقستان مەن فرانسيا اراسىنداعى قىلمىستىق ىستەر بويىنشا ءوزارا قۇقىقتىق كومەك تۋرالى شارتتى راتيفيكاتسيالاۋ تۋرالى» زاڭى قابىلدادى.

وسى ورايدا تىلشىلەر باس پروكۋروردىڭ ورىنباسارىنان اتالعان قۇجات ارقىلى مۇحتار ءابليازوۆتى قازاقستانعا ەكستراديتسيالاۋ مۇمكىندىگى تۋرالى سۇرادى.

ءوز كەزەگىندە ءا. شىنداليەۆ بۇل قۇجاتتا ءىستى بولعان ادامداردى بەرۋ نەمەسە ەكستراديتسيالاۋ ەسكەرىلمەگەنىن ايتتى.

«شارت تەك قۇقىقتىق كومەك كورسەتۋدى قاراستىرىپ وتىر. بۇل تۇرعىدا تەرگەۋ امالدارىن جۇرگىزۋ، ءتىنتۋ سياقتى ءىس-شارالار ەسكەرىلگەن. سوندىقتان قىلمىستىق جاۋاپقا تارتۋ ءۇشىن ادامداردى ەكستراديتسيالاۋ اتالعان قۇجاتتا قامتىلماعان. اتاپ ايتقاندا، وسى شارت ابليازوۆكە قاتىستى ەمەس. مۇنداي قۇجاتتاردى وسىعان دەيىن 29 مەملەكەتپەن بەكىتكەن ەدىك. بۇل شارت ناقتى ءبىر ادامعا ارنالماعان»، - دەدى باس پروكۋروردىڭ ورىنباسارى.

وسى ورايدا ول ءىستى بولعان ادامداردى الدىرتۋعا قاتىستى جەكە شارتتار بار ەكەنىن ەسكە سالدى. بۇل قۇجات اياسىندا ەلگە قايتارۋ تالاپتارى بولادى

«مۇنداي شارتتى فرانسيامەن ارادا بەكىتپەدىك. ەگەر اتالعان شارتسىز ءبىز ەكستراديتسيا تۋرالى سۇراۋ جولداساق، ءوز كەزەگىندە فرانسيا بۇل سۇراۋعا قانداي جاۋاپ بەرەتىنىن ءوزى قاراستىرادى»، - دەدى ول.

بۇعان دەيىن باس پروكۋراتۋرا مۇحتار ءابليازوۆتى ەلگە قايتارۋعا بار كۇشىن سالاتىنىن ايتقان ەدى.

9- جەلتوقساندا فرانسيا مۇحتار ابليازوۆكە ساياسي باسساۋعا بولۋدان باس تارتتى.

امەريكا القابيلەر سوتى اقشا ۇرلاۋ فاكتىسى بويىنشا مۇحتار ءابليازوۆقا $218 ميلليون ايىپپۇل سالدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى