شىمكەنتتىڭ «جۇمساق كۇشىن» ۇلگى ەتكەن تەحنولوگيالىق كىتاپ جارىق كوردى
تۋىندىدا قازاقستان قالالارى مەن وڭىرلەرىنە ءتان برەندەردى ءتيىمدى باسقارۋ مەن ىلگەرىلەتۋدىڭ جولدارى شىمكەنت قالاسىنىڭ مىسالىندا بەرىلگەن.
كىتاپ اۆتورى - فيلوسوف، PhD دوكتارانت ابىلايحان قالنازاروۆ. ال تولىق اتاۋى - «شىمكەنتتىڭ جۇمساق كۇشى. شىمكەنت قالاسىنىڭ برەندىن ءتيىمدى باسقارۋ مەن يميدج-يدەولوگياسىن ىلگەرىلەتۋ بويىنشا كوممۋنيكاتيۆتىك ستراتەگيا (تالداۋلار مەن ۇسىنىستار)».
اۆتوردىڭ ايتۋىنشا، بۇل اناليتيكالىق-ۇسىنىمدىق زەرتتەۋ ەڭبەك مەملەكەتتىك قىزمەتتە جۇرگەن بارلىق دەڭگەيدەگى باسشىلار مەن يدەولوگتارعا نۇسقاۋلىق- قويىن كىتاپشا رەتىندە ازىرلەنگەن.
ەڭبەكتىڭ العاشقى تارالىمى 100 دانا بولماق، 5 تاراۋ، 432 بەتتەن تۇرادى. تەوريالىق بازاسى ۇلىبريتانيا ۇكىمەتىنىڭ كەڭەسشىسى، ەۋروپا پارلامەنتىنىڭ دەپۋتاتى، اعىلشىن عالىمى سايمون انحولت كونتسەپتسياسىنا نەگىزدەلگەن.
«بۇل ءوزى ەل يدەولوگتارى ءالى ويعا دا الىپ ۇلگەرمەگەن تىڭ دا اكتۋالدى جوبا. ەڭبەك ءۇش قاباتتى قامتىعان. ءبىرىنشىسى - برەندتىك-يميدجدىك، ەكىنشىسى - يدەولوگيالىق جانە ءۇشىنشىسى - ۇلتتىق قۇندىلىقتار ءورىسى. تاپ مۇنداي باسقارۋشىلىققا ارنالعان جۇمىستار ءبىر وڭتۇستىك ءوڭىرى ەمەس، ەلىمىزدىڭ ءار ايماعىنا لايىقتالىپ ىستەلۋگە ءتيىس. ولاردىڭ جالپى جيىنىنان ەلدىك اۋقىمداعى ورتاق يدەولوگيا سومدالىپ شىعادى. ابىلايحان باۋىرىمىز ەندى رەسپۋبليكا ماسشتابىنداعى ساياسي-ەكونوميكالىق تۋىندىسىن دۇنيەگە الىپ كەلسە، نۇر ۇستىنە نۇر» دەدى «قازاقستان ءماسليحاتتارى دەپۋتاتتارىنىڭ بىرلەستىگى» ر ق ب ءتوراعاسى تولەۋبەك مۇقاشەۆ كىتاپتىڭ تۇساۋىپ كەسىپ تۇرىپ.
اۆتوردىڭ ءوزى كىتاپ بىلتىر باسىلىپ قويعانىن ايتادى.
«كىتاپ بىلتىرعى اقپاندا دايىن بولعان ەدى. الايدا بەلگىلى ءبىر سەبەپتەرمەن اراعا 1 جىل سالىپ، ەندى عانا تانىستىرۋدىڭ رەتى كەلىپ وتىر. ونىڭ سۇيەگى «ءۇشىنشى مەگاپوليس» اتانعان شىمكەنت قالاسىنىڭ برەندىن ءتيىمدى باسقارۋ مەن يميدج-يدەولوگياسىن ىلگەرىلەتۋ بويىنشا كوممۋنيكاتيۆتىك ستراتەگيا رەتىندە تىكەلەي تۇزىلگەن. دەسە دە قازاق رەاليلەرىنىڭ جالپى ەلدىك اۋقىمدا ۇقساستىعىنا وراي استانا، الماتى مەن تۇركىستان احۋالدارىن سالىستىرۋ ارقىلى بارلىق ايماققا ءتان ىشكى پروبلەمالاردى كوتەرىپ، ءتيىمدى شەشىمدەر ۇسىنىلدى»، - دەيدى ابىلاي قالنازاروۆ.
بۇعان دەيىن اۆتوردىڭ «بالۋان تاس» اتتى ەكى تومدىق كىتابى جارىق كورگەن بولاتىن.
