اۋىزدان جاعىمسىز ءيىس شىعۋ. باۋىر قىزمەتىنىڭ بۇزىلعانىن قايدان بىلەمىز؟
باۋىردىڭ نەگىزگى قىزمەتى:
- باۋىردىڭ ماڭىزدى قىزمەتىنىڭ بىرىنە زات الماسۋ جاتادى. بۇل قىزمەتتى ونىڭ جاسۋشالارى ورىندايدى. بۇل ورگان مەتابوليزمنىڭ بارلىق تۇرلەرىن، مايلار، اقۋىزدار، كومىرسۋلار جانە بيولوگيالىق بەلسەندى زاتتاردى رەتتەيدى؛
- باۋىر اسقورىتۋ بەزى رەتىندە تاماقتى قورىتاتىن ءوت بولەدى؛
- تاعى ءبىر ماڭىزدى قىزمەتى - ۋىتسىزداندىرۋ. بۇل ورگان ۋىتتى زاتتاردى، سونىڭ ىشىندە، الكوگول، ءدارى جانە باسقا دا زاتتاردى بەيتاراپتاندىرادى؛
- بەز - اقۋىز سينتەزدەيتىن ناعىز زاۋىت. وندا ارتەريالىق قىسىمدى رەتتەۋگە قاجەتتى اقۋىزدار تۇزىلەدى؛
- باۋىر كوپتەگەن دارۋمەندەر مەن ميكروەلەمەنتتەر قورىنىڭ تولۋىنا جاۋاپ بەرەدى.
ءبىر قيىنى، ادام باۋىر اۋرۋىن بىلمەي جۇرە بەرەدى. سەبەبى ول اۋىرمايدى. بۇل ورگاندا جۇيكە ۇشتارى جوق. پاتولوگيا اسقىنعان كەزدە عانا ادام قاتتى اۋىرسىنۋدى سەزۋى مۇمكىن.
باۋىر قىزمەتىنىڭ بۇزىلۋ سەبەپتەرى - ناشار ەكولوگيا، دۇرىس تاماقتانباۋ، فيزيكالىق بەلسەندىلىكتىڭ بولماۋى، ارتىق سالماق، الكوگول ءىشۋ، ۆيرۋستار، دارىلىك پرەپراتتار ءىشۋ، گەنەتيكالىق جانە يممۋندى بۇزىلىستار.
باۋىر قىزمەتىنىڭ بۇزىلعانىن قالاي بىلۋگە بولادى؟
وڭ جاق قابىرعا استىنىڭ اۋىرۋى
باۋىر كاپسۋلا دەپ اتالاتىن قابىرشاقپەن قورشالعان. ول ورگان ولشەمىنىڭ وزگەرۋىنە اسەر بەرەدى. الكوگولدەن نەمەسە مايلاردىڭ كوپ مولشەرىنەن بولاتىن قابىنۋ بەزدىڭ ۇلكەيۋىنە اكەلەدى. وعان جاۋاپ رەتىندە كاپسۋلا سوزىلادى، سوندىقتان ول اۋىرادى، اۋىرلىق نەمەسە قانداي دا ءبىر جاعىمسىزدىق سەزۋىڭىز مۇمكىن.
سالماق قوسۋ
باۋىر كومىرسۋلار مەن مايلاردىڭ الماسۋىنا قاتىسادى. فيزيكالىق بەلسەندىلىك جەتكىلىكسىز بولسا جانە كالوريالى تاماقتار كوپ جەسەڭىز، باۋىر مايلار مەن كومىرسۋلاردى وڭدەۋگە ۇلگەرمەۋى مۇمكىن. سوندىقتان ارتىق قالعانى باۋىردا جانە تەرى استى مايلى جاسۇنىقتا ماي تۇرىندە جينالا بەرەدى. اسىرەسە، ءىش جانە سان تۇسىنا جينالادى. بۇلار ارتىق سالماققا اكەلەدى.
جۇرەك اينۋ نەمەسە قۇسۋ
باۋىر ۋىتتارعا كۇشى جەتپەسە، ولاردىڭ قانداعى مولشەرى ارتادى. ەندوگەندى جانە ەكزوگەندى ۋىتتاردىڭ ارتىق مولشەرى جۇرەك اينۋ جانە قۇسۋ سەكىلدى جاعىمسىز بەلگىلەرگە اكەلەدى.
شارشاي بەرۋ
جۇمىسقا قابىلەتتىلىكتىڭ تومەن بولۋى جانە شارشاي بەرۋ باۋىر اۋرۋىمەن تىعىز بايلانىستى. بۇل باۋىر پاتولوگياسىنىڭ ەرتە بىلىنەتىن بەلگىسى. باۋىر جاسۋشالارىندا تۇزىلەتىن قابىنۋ زاتتارى ميعا جۇيكە بەلگىلەرىن تاسىمالداۋعا اسەر بەرە الادى. بۇل جوعارى شارشاڭقىلىققا جانە كوڭىل كۇيدىڭ ناشارلاۋىنا اكەلەدى.
اۋىزدان جاعىمسىز ءيىستىڭ شىعۋى
اۋىزدان شىعاتىن جاعىمسىز ءيىس اسقورىتۋ جۇمىسىنىڭ بۇزىلۋىن ءبىلدىرۋى مۇمكىن. باۋىر جاسۋشالارى ۋىتتى زاتتاردى وڭدەۋگە ۇلگەرمەگەن كەزدە اۋىزدان جاعىمسىز ءيىس شىعا باستايدى.
تەرىنىڭ جانە كوزدىڭ سارعايۋى
كوزدىڭ قالىپتى ءتۇسىنىڭ، تەرىنىڭ جانە شىرىشتى قابىقشانىڭ سارى تۇسكە وزگەرۋىن سارعايۋ (جەلتۋحا) دەپ اتايدى. بۇل جاعدايدى قانعا ءبيليرۋبيننىڭ كوپ تۇسۋىمەن تۇسىندىرەدى. سارعايۋ باۋىر اۋرۋلارىنىڭ ءبىر بەلگىسى بولۋى مۇمكىن.
ءزار مەن ءناجىس ءتۇسىنىڭ وزگەرۋى
سارى پيگمەنت - بيليرۋبين تەك قاندا ەمەس، زاردە دە، ناجىستە دە بولادى. بيليرۋبين وتتەن اش ىشەككە بولىنەدى جانە ىشەك باكتەريالارى سەبەبىنەن ءتۇسىن قوڭىرعا وزگەرتەدى. ال زاردە وعان اشىق سارى ءتۇس بەرەتىن باسقا ءونىم بار. كەي باۋىر پاتولوگيالارى ونىڭ ءبيليرۋبيندى وڭدەيتىن قابىلەتىن بۇزۋى مۇمكىن. سوندىقتان ونىڭ ءبىراز مولشەرى ءزار ارقىلى شىعارىلادى دا، ءتۇسى قويۋلانىپ كەتەدى. باسقا جاعىنان، ءوتتىڭ جەتكىلىكسىز جەتكىزىلۋى ءناجىستىڭ تۇسسىزدەنۋىنە اكەلەدى.
اياقتىڭ ءىسىنۋى
كەيدە باۋىر اۋرۋى ءوزى جايلى تەك سوڭعى ستاديالاردا، مىسالى تسيرروز كەزىندە بەلگى بەرەدى. بەز قان تامىرلارىنا قىسىمنىڭ كوپ تۇسۋىنەن جانە البۋمين اقۋىزىنىڭ جەتكىلىكسىز تۇزىلۋىنەن اياق ىسىنەدى.
تەرىنىڭ قىشۋى
تەرىنىڭ قىشۋى - اللەرگيالىق اۋرۋلاردىڭ جانە باۋىر پروبلەماسىنىڭ بەلگىسى. ءجيى تەرىنىڭ قىشۋى مەن سارعايۋى قاتار جۇرەدى.
بۇل بەلگىلەردىڭ قايسىسىن بولماسىن وزىڭىزدەن بايقاساڭىز، دارىگەرگە قارالىپ، تەكسەرىستەن ءوتۋىڭىز كەرەك. باۋىر رەگەنەراتسيا قابىلەتىنە يە. سوندىقتان ۋاقىتىندا قارالۋ ارقىلى ونىڭ جاسۋشالارىن تولىقتاي قالپىنا كەلتىرۋگە بولادى.
قازىر قۇرامىندا ءتۇرلى دارۋمەندەرى مەن ميكروەلەمەنتتەرى بار ب ب ق-لار (ب ا د) ساتىلادى. ولاردى وزدىگىنشە ءىشۋ باۋىرعا جاعىمسىز اسەر بەرۋى مۇمكىن. بۇعان قاتىستى دارىگەر جاۋابىن مىنا جەردەن وقىڭىز.
