ەكولوگيا ءمينيسترى كاسپي تەڭىزىنىڭ تارتىلۋى جايىندا پىكىر ءبىلدىردى
ءزۇلفيا سۇلەيمەنوۆانىڭ ايتۋىنشا، قورشاعان ورتا مەن حالىقتىڭ ءومىر ءسۇرۋ ساپاسىن جاقسارتۋعا قاتىستى مينيسترلىكتىڭ ءوز جوسپارى بار.
دەگەنمەن مينيستر مويىنداعانداي، اتالعان باعىتتاعى ماسەلەلەر كەشەندى ءارى كۇردەلى.
«جاقىندا كاسپي تەڭىزىنىڭ تارتىلۋى تۋرالى بەينەجازبا شىقتى. وتكەن جىلى قاراشادا جايىق وزەنىنىڭ تەڭىزگە قۇياتىن تۇسىن كورىپ، تارتىلۋ بارىسىنا ءوزىم كۋا بولدىم. سوندىقتان بۇل ماسەلە بويىنشا الدا وتە ۇلكەن مىندەت تۇر»، - دەدى ءزۇلفيا سۇلەيمەنوۆا Jibek Joly تەلەارناسىنىڭ ەفيرىندە.
ودان بولەك، ۆەدومستۆو باسشىسى ەكولوگيالىق جاعدايدى تۇراقتاندىرۋ، ەكوجۇيە دەگراداتسياسىن تەجەۋ، اۋا ساپاسىن جاقسارتۋ، قاتتى تۇرمىستىق جانە كوممۋنالدىق قالدىقتاردى باسقارۋ جۇيەسىنە قاتىستى اۋقىمدى ءىستىڭ كۇتىپ تۇرعانىن جەتكىزدى.
«جوعارىدا اتالعان مىندەتتەر بۇعان دەيىن دە بولدى. دەسەك تە ماسەلەنى شەشۋ جولىن جاڭاشا ءارى يننوۆاتسيالىق تۇرعىدان جانداندىراتىن بولامىز»، - دەپ تولىقتىردى ز. سۇلەيمەنوۆا.
بۇعان دەيىن مينيستر ەلىمىزدە ەكو- مادەنيەتتى دامىتۋ جوسپارىن بولىسكەن ەدى.
ودان بولەك، ەفير بارىسىندا قازاقستاندا اتوم ەلەكتر ستانساسىن سالۋدا قوعام پىكىرى ەسكەرىلەتىنى ايتىلدى.
اۆتور
داۋلەت ىزتىلەۋ
