قوستاناي وبلىسىندا ۇشەم دۇنيەگە كەلدى

بۇل تۋرالى وڭىرلىك دەنساۋلىق ساقتاۋ باسقارماسىنىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات ءتىلشىسى.

مەڭدىقارا اۋدانى حاركوۆسكي اۋىلىنىڭ تۇرعىنى الەنا پەتروۆانىڭ بوسانۋى مەرزىمىنەن بۇرىن باستالعان. ارتىنشا جولداسى جەدەل جاردەم شاقىرماي، ايەلىن اۋدان ورتالىعىنداعى اۋرۋحاناعا دوسىنىڭ كولىگىمەن اپارىپتى.

«تاڭعى 06:00 دە 2 ۇل (سالماعى 2070 گرام جانە 1860 گرام) جانە 1 قىز (1680 گرام) دۇنيەگە كەلدى. جاڭا تۋعان نارەستەلەردىڭ جاعدايى تەكسەرىلىپ، قاجەتتى پروتسەدۋرالار جاسالعاننان كەيىن بىردەن كۇتىم جاساۋ ءۇشىن كيۋۆەزدەرگە ورنالاستىرىلدى. ال ءبىر تاۋلىكتەن كەيىن سانيتارلىق اۆياتسيا ۇشاعىمەن اۋداندىق دارىگەرلەر بالالاردى قوستاناي وبلىستىق اۋرۋحاناسىنىڭ پەريناتالدىق ورتالىعىنا ەمدەۋگە جىبەردى. ەر بالالار بىردەن بولىمگە ورنالاستىرىلدى، قىز ەكى كۇن جانساقتاۋ بولىمىندە بولدى»، - دەپ ءمالىم ەتتى باسقارمانىڭ باسپا ءسوز قىزمەتىنەن.

مەڭدىقارالىق پەتروۆتار وتباسىندا ەندى 7 بالا. الەنا پەتروۆانىڭ ايتۋىنشا، ۇلكەن باۋىرلارى سابيلەردى اسىعا كۇتىپ ءجۇر.

«ءبىز وتباسىمىزبەن قۋانىشتىمىز. دارىگەرلەرگە العىسىم شەكسىز. بالالار ۇيدە باۋىرلارىن كۇتىپ ءجۇر. ۇلكەن ۇلىمىز ەندىگى ەرەسەك، بىزدەن بولەك تۇرادى. قالعاندارى بىزبەن بىرگە. ولار بالا كۇتىمى بويىنشا ماعان كومەكتەسەدى. قازىر بالالارىم سالماق قوسسا، وندا ۇيگە شىعامىز»، - دەيدى كوپبالالى انا.

وبلىستىق پەريناتالدىق ورتالىقتاعى بالالار ءبولىمىنىڭ مەڭگەرۋشىسى يگور بويكونىڭ ايتۋىنشا، قازىر سابيلەرگە قاجەتتى تەراپيا كورسەتىلىپ، ولار سالماق قوسىپ جاتىر. دەگەنمەن ءبىرشاما ۋاقىت ايرىقشا كۇتىمدى تالاپ ەتەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى