قازاقستاندا بىلتىر سۋسىندار مەن تەمەكى كوپ وندىرىلگەن
بۇل تۋرالى ۇلتتىق ستاتيستيكا بيۋروسىنان ءمالىم ەتتى، دەپ حابارلايدى قازاقپارات.
ونەركاسىپ ءوندىرىسىنىڭ يندەكسى 2022-جىلعى قاڭتار-جەلتوقسان ايلارىندا 101,1 پايىزدى قۇرادى.
«2022-جىلعى قاڭتار-جەلتوقساندا ونەركاسىپ ءونىمى 48 007 ميلليارد تەڭگەگە ءوندىرىلدى، ونىڭ ىشىندە تاۋ-كەن ءوندىرۋ ونەركاسىبى سالاسىندا - 24644 ميلليارد تەڭگە (جالپى كولەمنەن 51,3 پايىز)، وڭدەۋ ونەركاسىبىندە - 20 697 ميلليارد تەڭگە (43,1 پايىز).
تاۋ-كەن ءوندىرۋ ونەركاسىبى مەن كارەرلەردى قازۋدا ونەركاسىپ ءوندىرىسىنىڭ يندەكسى 99 پايىز قۇرادى. بۇل شيكى مۇناي (98,1 پايىز)، تابيعي گاز (99 پايىز) بەن تەمىر كەنى (79,4 پايىز) ءوندىرىسىنىڭ ازايۋىنا بايلانىستى بولدى.
وڭدەۋ ونەركاسىبىندە ءوندىرىس 3,4 پايىز ۇلعايدى. سۋسىندار (111,2 پايىز)، تەمەكى ونىمدەرى (107,9 پايىز)، مۇناي وڭدەۋ ونىمدەرى (101,8 پايىز)، حيميا ونەركاسىبىنىڭ ونىمدەرى (110,2 پايىز)، رەزەڭكە جانە پلاستماسسا بۇيىمدارى (102,1 پايىز)، نەگىزگى اسىل جانە ءتۇستى مەتالدار (105,5 پايىز)، اۆتوكولىك قۇرالدارىنىڭ (119,1 پايىز) ءوندىرىسى ارتتى.
ءوندىرىس كولەمىنىڭ ءوسۋى رەسپۋبليكانىڭ 13 وڭىرىندە تىركەلدى، ايتارلىقتاي ءوسىم اقمولا (13,4 پايىز)، جامبىل (10,2 پايىز)، اباي (9,7 پايىز) وبلىستارىندا جانە الماتى قالاسىندا (9,6 پايىز) بايقالدى.
تومەندەۋ تۇركىستان (6,3 پايىز)، قوستاناي (5,5 پايىز)، اتىراۋ (2,1 پايىز)، قىزىلوردا (1,8 پايىز) باتىس قازاقستان (1 پايىز) جانە پاۆلودار (0,5 پايىز) وبلىستارىندا بايقالدى.
