قازاقتىڭ دومبىرا ساباعى الەمدىك گيننەسس رەكوردتار كىتابىنا ەندى
2022 -جىلدىڭ مامىر ايىندا ەلورداداعى فيزيكا-ماتەماتيكا باعىتىنداعى زياتكەرلىك مەكتەپتە وقۋ جىلىن اياقتاعان ەڭ اۋقىمدى دومبىرا ساباعى گيننەسس رەكوردتار كىتابىنا ەندى.
NIS-تەگى دومبىرا ساباعى - ءبىر مەكتەپتىڭ مىڭعا جۋىق وقۋشىسى ۇلتتىق مۋزىكالىق اسپاپتى جەتىك مەڭگەرىپ، بىرگە كۇي ورىنداعان الەمدەگى تۇڭعىش وقيعا. ەڭ اۋقىمدى دومبىرا ساباعىنا قوسىمشا ءبىلىم بەرۋ پەداگوگى، قازاقستان رەسپۋبليكاسىنىڭ ەڭبەك سىڭىرگەن مادەنيەت قايراتكەرى ايتجان توقتاعان ديريجەرلىك ەتتى. زياتكەرلەردىڭ ورىنداۋىندا «سارىارقا»، «بالبىراۋىن»، «ەركەم- اي»، «كەڭەس»، «جاستار ءبيى» سىندى اتاقتى كۇيلەر كۇمبىرلەپ، تۋىندىلاردىڭ شىعۋ تاريحى باياندالدى.
گيننەسس رەكوردتار كىتابىنىڭ تالاپتارى بويىنشا اۋقىمدى ساباقتى 25-تەن استام ستيۋارد پەن 2 كۋاگەر قاداعالادى. تاۋەلسىز ستيۋاردتار 50 قاتىسۋشىدان جينالعان بەلگىلى ءبىر توپتى باقىلادى. كۋاگەرلەر GWR-دىڭ سەنىمدى وكىلى رەتىندە قىزمەت اتقارىپ، رەكوردتىڭ ورناۋى مەن كىتاپتىڭ بارلىق كريتەرييىنىڭ تولىق ساقتالۋىن قامتاماسىز ەتتى.
Guinness World Records ەرەجەلەرىنە سايكەس اۋقىمدى ساباق باستالار الدىندا بارلىق قاتىسۋشى ەكى تىركەۋ پۋنكتىنەن ءوتتى: ءبىرىنشىسى - جەكە بەيدجدەرىن سكانەرلەدى جانە «كانديدات- ماركەر» باعدارلاماسى ارقىلى ايماققا كىردى، ەكىنشىسى - كەزەكشى قاتىسۋشىلاردىڭ مەحانيكالىق ەسەبىن جۇرگىزدى.
قازاق حالقىنىڭ باستى ۇلتتىق اسپابى - دومبىرا نازاربايەۆ زياتكەرلىك مەكتەپتەرىنىڭ سيمۆولىنا اينالدى. بۇگىنگى تاڭدا ەلىمىزدەگى بارلىق NIS-تە دومبىرا ءپانىنىڭ ەلەكتيۆتى كۋرستارى ەنگىزىلىپ، ونىڭ اياسىندا قۇرمانعازى ساعىرباي ۇلى، تاتتىمبەت قازانعاپ ۇلى، نۇرعيسا تىلەنديەۆتىڭ اتاقتى كۇيلەرىنىڭ تاريحى مىندەتتى تۇردە وقىتىلادى، ال ەڭ تانىمال جوبالاردىڭ قاتارىندا «100 كۇيدىڭ تاريحى» جوباسى بار، بارلىق مەكتەپتە دومبىرا انسامبلدەرى مەن ستۋديالارى جۇمىس ىستەيدى، دومبىرا ساباقتارى ماتەماتيكا، فيزيكا، شەت ءتىلى ساباقتارىمەن ۇشتاستىرىلۋدا، جاس مۋزىكانتتار «ۇلى دالا مۇراگەرلەرى» ءداستۇرلى فلەشموبىندا جىل سايىن ەل ساحنالارىن باعىندىرىپ ءجۇر. دومبىرا مەن ۇلتتىق مۋزىكاعا دەگەن قىزىعۋشىلىقتى ارتتىرۋ بويىنشا جۇيەلى جۇمىس NIS-تىڭ حالىقتىق قۇندىلىقتار مەن داستۇرلەردى ساقتاۋ بويىنشا اۋقىمدى باعدارلاماسى اياسىندا ىسكە اسىرىلىپ كەلەدى.
