قىتاي قازاقستاندىقتار ءۇشىن ۆيزا رەجيمىن جەڭىلدەتپەك
بۇل ماسەلەلەر قازاقستاننىڭ قىتايداعى ەلشىسى شاحرات نۇرىشيەۆتىڭ ق ح ر سىرتقى ىستەر ءمينيسترىنىڭ ورىنباسارى (مينيستر دەڭگەيىندە) ما چجاوسيۋيمەن كەزدەسۋىندە ايتىلدى، دەپ حابارلايدى قازاقپارات ق ر سىرتقى ىستەر مينيسترلىگىنىڭ باسپا ءسوز قىزمەتىنە سىلتەمە جاساپ.
كەزدەسۋ بارىسىندا تاراپتار ءتۇرلى سالالارداعى قازاقستان-قىتاي ىنتىماقتاستىعىنىڭ تولىق اۋقىمدى وزەكتى ماسەلەلەرىن تالقىلادى، سونداي-اق ونى ودان ءارى دامىتۋ پەرسپەكتيۆالارى تۋرالى پىكىر الماستى.
سۇحبات بارىسىندا بيىلعا جوسپارلانعان جوعارى جانە جوعارعى دەڭگەيدەگى ەكىجاقتى ساپارلار مەن ءىس-شارالار كەستەسىنە، سونداي-اق كوپجاقتى قۇرىلىمدار شەڭبەرىندەگى ەكى ەلدىڭ ءوزارا ىقپالداسۋىنا باستى نازار اۋدارىلدى.
ش. نۇرىشيەۆ قىتاي تاراپىنا قازاقستان-قىتاي قاتىناستارىنا قوسىمشا «سەرپىن» بەرۋ جانە شارت-قۇقىقتىق بازانى جەتىلدىرۋ ماقساتىندا ق ر جانە ق ح ر مەملەكەتتىك ورگاندارىنىڭ قاراۋىندا جاتقان ەكىجاقتى قۇجاتتاردىڭ جوبالارىن كەلىستىرۋدى بەلسەندەتۋدى ۇسىندى.
سونىمەن بىرگە، قازاقستان ەلشىسى ساۋدا-ەكونوميكالىق بايلانىستاردى ارتتىرۋ، قازاقستان-قىتاي شەكاراسىنداعى وتكىزۋ بەكەتتەرىندە ءوزارا ارەكەتتەسۋ جانە تىعىز ىقپالداسۋدى نىعايتۋ، جولاۋشىلار اۋەرەيستەرىنىڭ سانىن «پاندەمياعا دەيىنگى» دەڭگەيگە دەيىن قالپىنا كەلتىرۋ جانە قازاقستاندىقتار ءۇشىن ق ح ر ۆيزا رەجيمىن جەڭىلدەتۋ ماسەلەلەرى بويىنشا بىرلەسكەن كۇش-جىگەرگە ەرەكشە نازار اۋداردى.
ءوز تاراپىنان، ما چجاوسيۋي كوتەرىلگەن ماسەلەلەردىڭ ماڭىزدىلىعىن ايتىپ، قىتاي تاراپىنىڭ اتالعان ماسەلەلەر بويىنشا بەلسەندى ءوزارا ىقپالداسۋعا دايىن ەكەنىن ءبىلدىردى. سونداي-اق، ول قىتايدىڭ سىرتقى ساياسي مەكەمەسى بيىل جوسپارلانعان ءىس-شارالاردى ويداعىداي ۇيىمداستىرۋ ماقساتىندا ق ر- دىڭ ق ح ر- داعى ەلشىلىگىمەن تىعىز ارەكەتتەسۋگە ءازىر ەكەنىن حابارلادى.
«كەزدەسۋدىڭ سوڭىندا سۇحباتتاستار ەكىجاقتى ىنتىماقتاستىقتىڭ اعىمداعى جانە وزەكتى ماسەلەلەرى بويىنشا تۇراقتى بايلانىستاردى ساقتاۋعا ۋاعدالاستى»، - دەلىنگەن حابارلامادا.
