ازاماتتىڭ جاسىرىن اكتيۆتەرى انىقتالسا، قارىزى قايتا موينىنا ىلىنەدى - ۆيتسە-مينيستر بانكروتتىق جايلى
ەلوردا تۇرعىندارىمەن كەزدەسكەن قارجى ۆيتسە-ءمينيسترى ەرجان ءبىرجانوۆ وسىلاي مالىمدەدى، دەپ حابارلايدى قازاقپارات ءتىلشىسى.
«ماسەلەن، ءبىز ازاماتتى بانكروت دەپ تانىدىق دەيىك. كەيىن ول 1-2 ايدا جۇمىسقا ورنالاسادى، تابىسى ارتادى. ءبىز وعان ەشقانداي كەدەرگى بولا المايمىز. ەگەر وسى بانكروتتىق راسىمدەپ الىپ، سودان سوڭ جاسىرعان مۇلكىن شىعارسا، وندا ءبىز بانكروتتىقتى قايتارىپ الامىز. ونى ادەيى جاسالعان سحەما رەتىندە كورسەتەمىز. ال بانكروت دەپ تانىلىپ، كەيىن تابىسى ارتسا، بۇل ازاماتتىڭ ءوزى ءۇشىن جاقسى. بۇل زاڭ ادامداردىڭ تولەم قابىلەتىن ارتتىرۋ ءۇشىن جاسالعان»، - دەپ ءمالىم ەتتى ەرجان ءبىرجانوۆ.
ۆيتسە-مينيستر بانكروتتىق راسىمدەگەندەرگە 3 جىل جۇرگىزىلەتىن مونيتورنينگ كەزىندە ونىڭ وزگە اكتيۆتەرى بار ەكەنى انىقتالسا، ءتيىستى شەشىم كۇشىن جوياتىنىن مالىمدەدى. ول جاعدايدا جەكە تۇلعانىڭ بۇرىنعى قارىزى تولىق كولەمدە قايتا وزىنە جۇكتەلەدى.
«ەگەر ازامات ءتۇرلى سحەمالاردى قولدانىپ، بانكروتتىق راسىمدەپ السا جانە كەيىن ونىڭ بۇل ارەكەتى اشكەرە بولسا، وندا بارلىق باستاپقى قارىزى قايتا موينىنا ىلىنەدى»، - دەپ ءتۇسىندىردى ۆيتسە-مينيستر.
سونىمەن قاتار، استانا قالاسىنىڭ تۇرعىندارىمەن كەزدەسىپ، زاڭدى تۇسىندىرگەن ۆيتسە-مينيستر ازاماتتاردى بانكروت دەپ تانۋ - قارىزدى كەشىرۋ اكسياسى ەمەس ەكەندىگىن باسا ايتتى. سەبەبى مۇنىڭ زاڭمەن رەتتەلەتىن سالدارى بار.
