وتكەن جىلى قانشا مىڭ بوزبالا اسكەر قاتارىنا الىندى

قورعانىس ۆەدومستۆوسىندا 2022-جىلى ازاماتتاردى مەرزىمدى اسكەري قىزمەتكە شاقىرۋدىڭ ناتيجەلەرى قارالىپ، بيىلعى جىلدىڭ نەگىزگى مىندەتتەرىن ايقىنداۋعا ارنالعان كەڭەس ءوتتى.

قارۋلى كۇشتەر باس شتابىنىڭ باستىعى، گەنەرال-لەيتەنانت مارات قۇسايىنوۆ جالپى اسكەرگە شاقىرۋ مىندەتتەرى ورىندالعانىن جانە شاقىرۋ ناۋقانى ۇيىمداسقان تۇردە وتكەنىن العا تارتتى. 2022-جىلى 35 مىڭعا جۋىق جاس قارۋلى كۇشتەر، مەملەكەتتىك كۇزەت قىزمەتى، شەكارا قىزمەتى، ۇلتتىق ۇلان، توتەنشە جاعدايلار مينيسترلىگى بولىمشەلەرىنىڭ قاتارىن تولىقتىردى. قازىر ولار اسكەري ءىستىڭ قىر-سىرىن ۇيرەنىپ، وتان الدىندا بورىشىن لايىقتى اتقارىپ ءجۇر.

«جىل سايىن وتان الدىندا وزدەرىنىڭ كونستيتۋتسيالىق مىندەتتەرىن ورىندايتىن مىڭداعان ورەندەر اسكەرگە شاقىرۋ كوميسسيالارىنان وتەدى. ال، اسكەري ەسەپكە الۋ پروتسەستەرىن سيفرلاندىرۋ، قورعانىس مينيسترلىگىنىڭ eGov.kz پلاتفورماسى ارقىلى قىزمەتتەر كورسەتۋى شاقىرۋ ناۋقانى بارىسىندا ارتىق بيۋروكراتيانى، قاعازباستىلىقتى قىسقارتۋعا جانە سىبايلاس جەمقورلىق تاۋەكەلدەرىن ازايتۋعا مۇمكىندىك بەردى»، - دەدى گەنەرال- لەيتەنانت مارات قۇسايىنوۆ.

وتكەن جىلى قارۋلى كۇشتەردىڭ قوعامدىق ۇيىمدارمەن، ونىڭ ىشىندە جيناۋ پۋنكتەرى مەن اسكەري بولىمدەرگە بارۋ مۇمكىندىگى بار وكىلدەرمەن، ساربازدار انالارىنىڭ كوميتەتىمەن ءوزارا ءىس-قيمىل جولعا قويىلعان. بۇل ساربازداردىڭ تۋىستارى مەن جاقىندارىنا، ولاردىڭ اسكەرگە شاقىرىلۋىنان باستاپ، اسكەري ۇجىمداردا ەرەجە مەن ءتارتىپتىڭ بار ەكەندىگىنە جەكە كوز جەتكىزۋگە، سونداي-اق قازاقستان اسكەرىنىڭ احۋالى جايلى تەرىس بولجامدار مەن دەسترۋكتيۆتى قاۋەسەتتەردىڭ الدىن الۋعا مۇمكىندىك بەردى.

اسكەرگە شاقىرۋدى ۇيىمداستىرۋدىڭ وزەكتى ماسەلەلەرى تالقىلاندى. جەتىلدىرۋدى جانە بىرلەسكەن جۇيەلى جۇمىستى قاجەت ەتەتىن اسپەكتىلەرگە ەرەكشە نازار اۋدارىلماق. اتاپ ايتقاندا، بۇل - اسكەرگە شاقىرىلۋشىلاردىڭ دەنساۋلىعىن ولاردى سپورتتىق جانە اسكەري-پاتريوتتىق قىزمەتكە تارتۋ ارقىلى مەكتەپ كەزىنەن باستاپ نىعايتۋ.

ايتا كەتەيىك، قورعانىس مينيسترلىگى عىلىم جانە جوعارى ءبىلىم مينيسترلىگىمەن بىرلەسىپ اسكەري قىزمەتتىڭ بەدەلىن ارتتىرۋدى كوزدەپ وتىر.

اسكەري بورىشىن وتەگەندەر ەندى جوعارى وقۋ ورىندارىندا تەگىن ءبىلىم الادى.

قورعانىس مينيسترلىگىندە ۆەدومستۆوارالىق كەڭەس ءوتىپ، وندا تەگىن جوعارى ءبىلىم الاتىن مەرزىمدى قىزمەتتەگى اسكەري قىزمەتشىلەردى ىرىكتەۋ جونىندەگى رەگلامەنتتىڭ جوباسى قارالدى.

قازاقستانداعى 50 گە جۋىق ۋنيۆەرسيتەت مەرزىمدى اسكەري قىزمەتىن اتقارعانداردىڭ ۇ ب ت ناتيجەسىنسىز، ءوز ەسەبىنەن وقىتۋعا نيەت ءبىلدىردى.

سونداي-اق، اسكەرگە بارۋ مەرزىمىن قانداي جاعدايلاردا كەيىنگە قالدىرۋعا بولاتىنى تۋرالى وقي وتىرىڭىز.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى