باتالار
ەل-جۇرتىڭ قادىر تۇتار -
حالقىڭا باعاڭ بولسىن!
سۇرىنسەڭ، سۇيەپ قالار
الدىندا - اعاڭ بولسىن!
جىعىلساڭ - تىرەپ قالار
ارتىڭدا - بالاڭ بولسىن!
اداسساڭ، اقىل ايتار
اۋلىڭدا - داناڭ بولسىن!
اماندىق-ساۋلىق سۇرار
جاقىن مەن جاران بولسىن!
دوستارىڭ كوبەيسىن دە،
دۇشپانىڭ تامام بولسىن!
باقىتتىڭ قۇسى بولسا -
ۇشىپ كەپ، ساعان قونسىن!
دەنساۋلىق- باستى بايلىق،
اۋرۋ-سىرقاۋلاردان
وتباسىڭ امان بولسىن!
ءاۋمين!
* * *
كۇندەرىڭ - كۇمىس بولسىن!
تۇندەرىڭ - پۇلىش بولسىن!
قىدىردىڭ ءبىرى دارىپ،
ۇيىڭە ۇلىس قونسىن!
زامانا - قۇبىلمالى،
دۇنيە تىنىش بولسىن!
اقىل - دوس!
اشۋ - دۇشپان!
كوڭىل-كۇي دۇرىس بولسىن!
جينالماي داستارقانىڭ
ۇستىنە - ىرىس تولسىن!
ءاۋمين!
***
داستارقانىڭا بەرەكە بەرسىن،
باستارىڭا مەرەكە بەرسىن،
استارىڭا ادالدىق بەرسىن،
باستارىڭا اماندىق بەرسىن،
دەندەرىڭە ساۋلىق بەرسىن!
ءاۋمين!
***
اشىپ تاستاپ پەيىلدى
داستارقانىڭ جايىلدى.
قاسيەتتى نان ۇلىق
بەرەكەڭ تۇر ناق ۇيىپ.
اسىل سوزدەر ءشاشىلدى،
بار ابىروي باق ورناپ
ەل سىيلاسىن باسىڭدى.
اڭىز بولىپ وتاۋىڭ
ايتا ءجۇرسىن اسىڭدى.
سۇيگەن جارىڭ،
بالا-شاعاڭ امان بوپ،
بۇتىندەسىن اسىلدى.
نيەتىڭە ءبىز تويدىق.
راحمەت شايىڭا،
ريزا ەتكەن ءبىر قويلىق!
ءاۋمين!
تۇساۋكەسەر باتاسى
قاز-قاز، بالام، قاز بالام،
قادام باسساڭ ءماز بولام.
كۇرمەۋىڭدى شەشەيىن،
تۇساۋىڭدى كەسەيىن.
قاز-قاز، بالام، قاز، بالام،
تاقىمىڭدى جاز، بالام.
قادامىڭا قارايىق،
باسقانىڭدى سانايىق.
قاز-قاز، بالام، جۇرە عوي،
بالتىرىڭدى تۇرە عوي.
تاي-قۇلىن بوپ شابا عوي،
وزىپ بايگە الا عوي.
قاز باسا عوي، قاراعىم،
قۇتتى بولسىن قادامىڭ!
ومىرگە اياق باسا بەر،
اسۋلاردان اسا بەر.
جۇگىرە قويشى، قۇلىنىم،
جەلبىرەسىن تۇلىمىڭ.
ەلگەزەك بول، ەرىنبە،
ىلگەرى باس، شەگىنبە.
ءاۋمين!
* * *
تۇساۋىڭ كەسىلدى، قۇلاما،
تىزەڭدى جارالاپ جىلاما.
قۇلىنداي قۇلدىراپ جۇگىرشى،
كانىكي، ءوزىڭدى سىنا دا.
سەكىرسەڭ قۇزداردان سۇرىنبە،
شىڭدارعا شىققاندا بۇگىلمە.
بولاتتاي قابىرعاڭ قاتايىپ،
وت ۇشقىن ويناسىن تۇرىڭدە،
ۇزاق بوپ ينشااللاه ءومىرىڭ،
تاسىسىن شاتتىقتان كوڭىلىڭ.
جارقىراپ كۇن ساناپ وسە بەر،
جارقىراپ سەمسەردەي سەنىمىڭ.
ءاۋمين!
***
شىلدەحانا باتاسى
كوتەرەيىك بىلەكتى،
نۇرعا بولەپ جۇرەكتى.
بوبەككە باتا بەرەيىك،
اعىنان ايتىپ تىلەكتى:
ءسابيىمىز سۇيكىمدى بولسىن،
ونەر-بىلىمگە يكەمدى بولسىن،
بايتەرەكتەي بويشاڭدانىپ،
ورەن، ءورشىل، وركەندى بولسىن!
جاقسى جولدى تاڭداسىن،
جاماندىق ءتالىم الماسىن!
دانالاردىڭ ءداستۇرىن،
جاڭالاسىن، جالعاسىن،
شۇعىلالى شۋاقتى كۇن كەشسىن،
باسىن سۇر بۇلت شالماسىن،
قوس توپشىسى تالماسىن،
قىرانداي بيىك سامعاسىن!
ءاۋمين!
* * *
اناسىنىڭ اياۋلى
جارىپ شىققان كەمەرىن،
قادام باسىپ ومىرگە،
جاس شىبىقتاي ءبۇر جارىپ،
جاڭا جايعان جەلىگىن،
تورسىق شەكە، اق ماڭداي،
وسە بەرسىن بوبەگىڭ.
ءومىرى ۇزاق بولسىن دەپ،
كوڭىلى نۇرعا تولسىن دەپ،
اق باتامدى بەرەمىن.
ازامات بوپ ەر جەتسىن،
قيىن كەزدە جولداستان
ايامايتىن كومەگىن.
تويىڭ تويعا ۇلاسسىن،
بولا بەرسىن دەگەنىڭ!
اللاهۋ اقپار!
* * *
ازامات بولىپ ەر جەتسىن،
اقساقال بولىپ تورلەتسىن،
ازامات بولىپ كورىكتى،
عۇمىرى بولسىن بەرىكتى.
ازامات بولسىن ارداقتى،
مىنەزى بولسىن سالماقتى،
ونەرى بولسىن جان-جاقتى،
وسى ايتقاننىڭ ءبارى
قابىل بولىپ،
اللا بەرسىن زور باقتى!
ءاۋمين!
***
ءجۇسىپتىڭ ديدارىن بەرسىن،
يبراهيمنىڭ يمانىن بەرسىن،
پايعامباردىڭ كەڭدىگىن بەرسىن،
ازىرەت ءالىنىڭ ەرلىگىن بەرسىن!
ابىلايدىڭ بايراعىن بەرسىن،
باتىر باۋىرجاننىڭ ايبارىن بەرسىن!
ەلىنە ىرىس-قۇت ورناسىن،
جەرىنە تىنىشتىق ورناسىن!
كولدەنەڭ كەلەر قازادان،
جازىقسىز تونەر جازادان
اللا تاعالا قورعاسىن،
ابىرويىن اسىرىپ قولداسىن!
ءاۋمين!
* *
ۇل بالاعا باتا
جورىتقاندا، بالام، جولىڭ بولسىن،
قالتاڭ بايلىققا تولسىن،
ءبىر تولماسىن، جىلدا تولسىن،
ءومىر جاسىڭ ۇزاق بولسىن!
قاتارىڭنان وزعان ورەن بول،
قىز كوزىندەي تەرەڭ بول،
سىناي قالسا - قۇلاق سال،
ماقتاي قالسا - كەرەڭ بول!
ءاۋمين!
* *
ءبىر ءۇيدىڭ بالاسى بولما،
بۇكىل ەلدىڭ ساناسى بول!
ءبىر ەلدىڭ بالاسى بولما،
بار ەلدىڭ داناسى بول!
ءبىر توننىڭ جاعاسى بولما،
كوپ قولدىڭ اعاسى بول!
اقتى اق دەپ باعالا،
قارانى قارا دەپ قارالا!
وزەگىڭ تولسا، ەلدىڭ ءىشىن ارالا.
باسىڭا ءىس تۇسسە، كوپشىلىكتى ساعالا.
ءاۋمين!
* * *
الامان بولىپ ەر جەتسىن،
اقساقال بولىپ تورلەتسىن!
قاس باتىرداي كورىكتى،
عۇمىرى بولسىن بەرىكتى!
ازامات بولسىن ارۋاقتى،
مىنەزى بولسىن سالماقتى.
ونەرى بولسىن جان-جاقتى،
وسى ايتقاننىڭ ءبارى قابىل بولىپ،
اللاه تاعالا بەرسىن زور باقتى!
ءاۋمين!
* * *
توي جاساعان ءۇي يەسىنە بەرىلەتىن باتا
قۇرمەتتى توي يەسى،
ءىسىڭدى تاعدىر وڭداسىن،
قايدا جۇرسەڭ قولتىقتاپ،
قىدىر باباڭ قولداسىن!
جامبىلعا ۇقساپ كوپ جاسا،
دەنەڭدە دەرت بولماسىن،
تويىڭ تويعا ۇلاسىپ،
جان-جۇرەگىڭ تولعانسىن،
كۇننەن-كۇنگە كوبەيسىن،
دوس-جارانىڭ، جولداسىڭ.
باقىتىڭ تاسسىن ءاماندا،
بەرگەنىن ءتاڭىرى الماسىن!
ءومىرىڭدى ۇزارتىپ،
بالاڭ مەنەن نەمەرەڭ،
شوبەرەڭ مەن شوپشەگىڭ،
تۋاجاتتار جالعاسسىن!
ءاۋمين!
* * *
جاس بالانىڭ كۇلكىسىن بەر،
جاس انانىڭ ۇيقىسىن بەر.
جومارتتىڭ قولىن بەر،
جورتقاننىڭ جولىن بەر.
قىزدىڭ قىلىعىن بەر،
سۋدىڭ تۇنىعىن بەر،
اساۋدىڭ ارىنىن بەر،
تۇنگى وتتىڭ جارىعىن بەر.
اسقار تاۋدىڭ پاڭدىعىن بەر،
بۇلبۇل قۇستىڭ تاڭعى ءۇنىن بەر.
دالانىڭ جازىقتىعىن بەر،
گۇلدىڭ نازىكتىگىن بەر.
تەڭىزدىڭ تەرەڭدىگىن بەر،
قىراننىڭ كورەگەندىگىن بەر.
ەردىڭ كوڭىلىن بەر،
بۇركىتتىڭ جىگەرىن بەر.
لاشىننىڭ جۇرەگىن بەر،
ناعىز دوستىڭ تىلەگىن بەر.
ءاۋمين!
* * *
قىز بالاعا باتا
تالداي بوي بەرسىن،
زەرەك وي بەرسىن،
جازداي جامال بەرسىن،
قارداي جانار بەرسىن!
اناعا شۋاق بولسىن،
اعاعا قۋات بولسىن،
نازىك جانى بولسىن،
ەلىنىڭ ارى بولسىن،
باسىنا ونەردىڭ باعى قونسىن،
اق وردانىڭ شامى بولسىن!
ءاۋمين!
* * *
بەسىككە سالار باتا
قۇتتى بولسىن بەسىگىڭ،
ارتىق بولىپ نەسىبىڭ،
داستارقانىڭ جايىلىپ،
اشىق بولسىن ەسىگىڭ،
ورە بەرسىن بالالار،
دۇشپاندارىڭ بولماسىن،
كۇنشىلدىكپەن تابالار.
الپامىستاي تاعى دا،
ۇل ارتىنان ۇل تاپقىن.
جارقىراعان شولپانداي،
قىز ارتىنان قىز تاپقىن
قۇتتى بولسىن بۇگىنگى،
شىلدەحانا تويلارىڭ.
تىلەكتەرىڭ قابىل بوپ،
ورىندالسىن ويلارىڭ.
ءاۋمين!
* * *
سۇندەت باتاسى
بيسميللاهير-راحمانير-راحيم
مۇسىلمان بولدىڭ، قاراعىم،
كانە بەرى قاراعىن.
شىراعىن جاعار ۇلىسىڭ،
اتا مەنەن انانىڭ.
تاۋداي بولسىن تالابىڭ،
التىن مەنەن كۇمىستەن،
جاسالسىن بارلىق جاراعىڭ.
كورىمدىگىڭ مىنەكي،
بار ما تاعى قالارىڭ؟
قوي سۇراساڭ، قوي بەرەم،
تاي سۇراساڭ، تاي بەرەم،
زات سۇراساڭ، زات بەرەم.
ات سۇراساڭ، ات بەرەم.
باتىرلىعىڭ بايقالسا.
ساۋىت بەرەم اقبەرەن.
مۇراتىڭا جەتە بەر،
كۇننەن-كۇنگە وسە بەر،
ۇزاق بولىپ ءومىرىڭ،
ءومىرىڭنىڭ ءتۇيىنىن،
ءوز قولىڭمەن شەشە بەر.
ءاۋمين!
***
جاس جۇبايلارعا باتا
شاڭىراقتارىڭ بيىك بولسىن،
بوساعالارىڭ بەرىك بولسىن.
باۋ-باقشالارىڭ ورىك بولسىن.
باسىڭدا دايىم،
قۇلپىرعان قۇندىز بورىك بولسىن.
اق جۇزىڭدە جارىڭنىڭ،
اق كيمەشەك كورىك بولسىن.
قۇداي قالاسا،
كوپ ۇزاماي جەرىك بولسىن.
تورسىق شەكەلى ۇل تاۋىپ،
ول وزىڭە سەرىك بولسىن.
ءاۋمين!
***
قۋانىش قايىرلى بولسىن،
جاستار ابىرويلى بولسىن.
ۋايىمدارى جوق بولسىن،
كوڭىلدەرى توق بولسىن،
ادال ەڭبەك ارقاسىندا
تابىستارى مول بولسىن.
الاقاندارى اشىق بولسىن،
ومىرگە ماشىق بولسىن!
كۇيبەڭ قالىپ كەيىن قالماي،
جاڭالىققا عاشىق بولسىن.
ۇرپاقتارى ەر بولسىن،
كەمەڭگەرلەرمەن تەڭ بولسىن.
ولاردى كورە الماعانداردىڭ
بەدەل-بەرەكەتى كەم بولسىن.
ءاۋمين!
* * *
جاستارىم، كوتەر قولىڭدى،
قايىر قىل قۇتتى جولىڭدى،
يەم بەرسىن مال مەن باس،
تولتىرسىن ول مەن سولىڭدى.
مەن بەرەيىن باتامدى،
كىشىپەيىل بولىپ كەلىنجان،
سىيلا ەنەڭ مەن اتاڭدى.
كەكشىل بولما، قاراعىم،
كەشىرەر اركىم قاتاڭدى.
بولا بەرسىن ويىن-توي،
قىزىقتاپ تويلاۋ - قۇرمەت قوي.
اقىل، ەستەن ايرىلماي،
جاستارىم، ەسكە الىپ قوي،
قايىرلى بولسىن تويىڭىز،
قۇدالار كەۋدە سوقتىرىپ،
قۇيرىق، باۋىرعا تويىڭىز.
ءاۋمين!
***
قوس اققۋداي كولدەگى،
قىزعالداقتاي بەلدەگى،
جاس جۇبايلار ەكەنسىڭ،
باتا بەرەم كەل بەرى.
داۋلەتتى، مالدى بولىڭدار،
جۇقارماس جالدى بولىڭدار،
ەل-جۇرتىڭ ماقتان تۇتاتىن،
جاستاردىڭ الدى بولىڭدار.
تۇتاتقان شىراقتارىڭدى،
باستالعان مۇراتتارىڭدى،
ءبىر اللا قولداپ ءاردايىم،
جايقالتسىن قۇراقتارىڭدى.
وتاۋلارىڭ وردا بولسىن،
اتتارىڭ جورعا بولسىن.
قىمىزىڭ قىمىزىق تاتىپ،
مەستەرىڭ قوردا بولسىن.
ءاۋمين!
***
سىرتىڭنان دۇشپان جۇرمەسىن،
كوڭىلىڭە ۇرەي كىرمەسىن.
كورە الماعان كۇنشىلدەر،
كۇشىكتەي شۋلاپ ۇرمەسىن.
سىيلى ەتىپ اللا باسىڭدى،
عۇمىرلى قىلسىن جاسىڭدى.
ارۋاق قولداپ ءور، شىڭعا،
دومالاتسىن تاسىڭدى.
قادىرىن بىلگىن اناڭنىڭ،
قىزىعىن كورگىن بالاڭنىڭ.
كۇنىڭ مەن ءىسىڭ تۇسپەسىن،
قولىنا توپاس ساراڭنىڭ.
اسقاق بولىپ ارمانىڭ،
ارايلاپ اتسىن تاڭدارىڭ.
ماقساتىڭا جەتە بەر،
امان بولىپ مال-جانىڭ.
ءاۋمين!
***
جەتەگىڭ بۇيدا بولسىن،
ارقانىڭ شۋدا بولسىن.
بەرەتىن اسىڭ بولسىن،
كورەتىن جاسىڭ بولسىن.
بەسىگىڭ الدىڭنان تۇسپەسىن،
باسىڭنان جاقسىلىق كەتپەسىن،
جاماندىق ساعان جەتپەسىن.
ءاۋمين!
***
جاس كەلىننىڭ قونعان جەرى
قۇتتى قونىس، تۇعىر بولسىن.
بىرەۋى شال، ءبىرى كەمپىر -
قوسا اعارعان عۇمىر بولسىن.
بالاپانمەن، بالاقانمەن
بەسىك ءىشى جىبىر بولسىن.
قۇلىن تايدىڭ اسىرىمەن
وتتىڭ باسى ءدۇبىر بولسىن.
سۇيىسپەندىك ماحابباتپەن
ءتاتتى كۇلكى، سىبىر بولسىن.
كارى كۇتىپ، بالا باعىپ،
مول قىزىقتان ىعىر بولسىن.
كارىلەرگە مەيىرىمدى،
كەلىندەرگە ادەپ بولسىن.
اتا كۇتۋ، انا باعۋ،
اتا جولى ادەت بولسىن!
ءاۋمين!
***
ەلىڭە ەلەۋلى بول،
حالقىڭا قالاۋلى بول،
اتا-ەنەڭە جاعىمدى بول،
قايىناعا، قاينىڭا قايىرىمدى بول.
اۋىلىڭا ايبارلى بول،
كۇيەۋىڭە جايدارلى بول.
ءاۋمين!
* * *
ساپار باتا
جولىڭدى اللا قولداسىن،
جامانشىلىق بولماسىن.
سەنىمدى بولسىن جولداسىڭ،
جولىڭدى كەسكەن وڭباسىن.
ءساتتى بولسىن ىستەرىڭ،
جاقسى بولسىن تۇستەرىڭ،
جۇمساق بولسىن ىشكەنىڭ.
كورمەگەن جەردى كورىپ قايت،
ىرزىعىڭدى تەرىپ قايت.
ايدارىڭنان جەل ەسىپ،
جەلىپ بارىپ، جەلىپ قايت.
ءاۋمين!
