قىزىلوردا وبلىسىنىڭ تۇرعىنى كولىگىمەن ارال تەڭىزىنە باتىپ كەتتى

توتەنشە جاعدايلار قىزمەتىنە 10-قاڭتار ساعات 11.48 دە حابار ءتۇستى.

وندا ارال اۋدانىنا قاراستى اقەسپە ەلدى مەكەنىنەن 20-25 شاقىرىم جەردە ورنالاسقان شومىشكول بالىق اۋلاۋ ۋچاسكەسىندەگى كىشى ارال تەڭىزىنە ارال قالاسىندا تۇراتىن 1963 -جىلعى ازامات ۋاز اۆتوكولىگىمەن باتىپ كەتكەنى ايتىلعان.

«ارال اۋدانى قامىستىباس ەلدى مەكەنىندەگى جەدەل- قۇتقارۋ جاساعى بولىمشەسىنەن 4 قۇتقارۋشى ۇرلەمەلى موتورلى قايىق جانە 3 جيىنتىق سۇڭگۋىر قۇرال- جابدىعىمەن وقيعا ورنىنا جەتتى. وقيعا ورنى تەڭىز جاعاسىنان شامامەن 7 شاقىرىمداي جەردە. مۇز قالىڭدىعى شامامەن 35 سم بولسا، سۋ تەرەڭدىگى - 14 مەتر. اۋا رايىنىڭ قولايسىزدىعىنان ىزدەستىرۋ جۇمىستارى 11-قاڭتار كۇنى باستالدى. قۇتقارۋشىلار 14 مەتر تەرەڭدىكتەن ۋاز اۆتوكولىگىن تاپتى. الايدا كولىك ىشىندە سۋعا كەتكەن ادام جوق ەكەنى بەلگىلى بولدى»، - دەدى قىزىلوردا وبلىستىق توتەنشە جاعدايلار دەپارتامەنتى ءورت ءسوندىرۋ جانە اۆاريالىق- قۇتقارۋ جۇمىستارى قىزمەتىنىڭ باسپا ءسوز حاتشىسى ءاليا ەرەجەپوۆا.

ۆەدومستۆو مالىمەتىنشە، جەدەل قۇتقارۋ جاساعىنىڭ سۇڭگۋىرلەرى ىزدەۋ جۇمىسىن جالعاستىرىپ جاتىر.

ولارعا كومەك رەتىندە قىزىلوردا قالاسىنان كاماز كولىگىمەن 5 قۇتقارۋشى، شىمكەنت قالاسىنىڭ 2 قۇتقارۋشى جۇمىلدىرىلدى.

اتالعان ماماندار سۋ استى ىزدەستىرۋ جۇمىستارىنا ارنالعان «ەحولوت» قۇرالىمەن قامتاماسىز ەتىلگەن. سۋعا باتىپ كەتكەن ادامنىڭ دەنەسى بۇگىن ساعات 12.03 تە تابىلدى.

ەسكە سالساق، بۇدان بۇرىن ارالعا بالىق اۋلاۋعا شىعىپ جوعالىپ كەتكەن 2 ادام تابىلدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى