اۋعانستان العاش رەت ءوزى جاساپ شىعارعان سپورتكاردى كورسەتتى
اۆتوكولىك Mada 9 دەپ اتالادى جانە كاتاردا كورمەگە قويىلادى، دەپ حابارلايدى قازاقپارات ءتىلشىسى ToloNews اگەنتتىگىنە سىلتەمە جاساپ.
Entop اۆتوموبيل ديزاينى كومپانياسىنىڭ قىزمەتكەرى جانە ينجەنەر-جاساۋشى مۋحامماد ريزا احماديدىڭ ايتۋىنشا، Mada 9 دى اۋعانستاننىڭ اقپاراتتىق تەحنولوگيالار مينيسترلىگى مەن اۋعانستاننىڭ يننوۆاتسيا ورتالىعىنىڭ قارجىلاي قولداۋىمەن جانە ىقپالىمەن بەس جىل بويى 30 ادامنان قۇرالعان توپ «ناۋۆاري» تەحنيكالىق جانە كاسىپتىك ءبىلىم ورتالىعىندا جاساپ شىعارعان.
بۇل كولىكتى جاساۋ ءۇشىن احمادي «Toyota Corolla» كولىگىنىڭ قوزعالتقىشىن پايدالانعان، ونى جارىستا قولدانار الدىندا جاڭارتۋ قاجەت.
احمادي ونىڭ ونەرتابىسى كاتارداعى Doha Expo 2023 كورمەسىندە تانىستىرىلادى دەپ ۇمىتتەنىپ وتىر.
ول كولىككە كوپتەگەن ۇسىنىستار العانىن، ءبىراق كولىك ساتىلمايتىنىن اتاپ ءوتتى. ونىڭ باعالاۋىنشا، ماشينا حالىقارالىق باسەكەگە قابىلەتتى.
«بۇل ماشينانىڭ ەرەكشەلىگى - اۋعانستاندا جاسالعان جانە الەمدە باسقا مۇنداي ماشينا جوق دەۋگە بولادى. اۋعانستان سوعىسپەن، قاقتىعىستارمەن جانە كەدەيلىكپەن تانىمال ەل بولدى، ءبىراق ەندى مۇندا وسىنداي دۇنيەلەر دە بار، - دەدى ول. - ەكىنشىدەن، ونىڭ ديزاينى بىرەگەي، ۇشىنشىدەن، اۆتوموبيل مىقتى جانە جەڭىل».
«اۆتوكولىكتى ساتىپ الۋعا دەگەن قىزىعۋشىلىق ۇلتتىق جانە حالىقارالىق دەڭگەيدە بارشىلىق، ءبىراق ءبىز الاتىن ۇسىنىستار ستاندارتتى ەمەس. ءبىز ونى حالىقارالىق نارىقتاعى باسەكە ءۇشىن شىعاردىق جانە ءتيىستى ۇسىنىستار بولادى دەپ ۇمىتتەنەمىز»، - دەدى احمادي.
اۋعانستاننىڭ كاسىپتىك-تەحنيكالىق ءبىلىم جانە يننوۆاتسيالار ورتالىعىنىڭ ديرەكتورى ماۆلاۆي گۋلام حايدار شاحاماتتىڭ ايتۋىنشا، اۆتوموبيلدىڭ سۋرەتتەرى ينتەرنەتتە تاراعان.
ونىڭ اۋعانستاندا شىعارىلعانىن ەستىگەن الەم تاڭ-تاماشا بولعان كورىنەدى.
كولىك ءالى تولىق جاسالىپ بىتكەن جوق جانە ول ەلدىڭ بۇكىل پروۆينتسيالارىندا تانىستىرىلادى دەپ بولجانىپ وتىر.
سپورتكار العاش رەت 2022-جىلدىڭ جەلتوقسانىندا العاشقى قار جاۋعاندا كورسەتىلدى.
الەۋمەتتىك جەلىلەردە سپورتتىق كولىككە «بۋگاتتيدىڭ ۇلتتىق بالاماسى» دەگەن اتاۋ بەرىلدى.
