ادام نەگە بور جەگىسى كەلەدى؟
دارىگەرلەر ادامنىڭ بور جەگىسى كەلۋىن ونىڭ دەنساۋلىق جاعدايىمەن بايلانىستىرادى: كالتسي نەمەسە تەمىر جەتىسپەۋى، قالقانشا بەز اۋرۋى. بور جەۋدىڭ زيانى قانداي؟
كەيدە ساۋ ادامدار دا بور جەگىسى كەلە بەرەدى. ونىڭ سەبەبى ءالى تولىقتاي انىقتالماعان. بور، كەسەك جانە توپىراق جەۋدىڭ عىلىمي اتاۋى گەوفاگيا دەپ اتالادى. يندونەزيالىق تايپالاردا ءالى كۇنگە دەيىن تانىمال امپو - توپىراقتان دايىندالاتىن تاماق ءتۇرى بار.
وزدەرىن بورجەگىشتەر دەپ اتايتىن ادامداردىڭ بارىن ءبىلدىڭىز بە؟ ولار بىرىگىپ، بور تۇرلەرىنىڭ دامدەرىن تالقىلايدى جانە ولاردى كامەراعا قاراپ جەيدى. قىتىرلاتىپ داۋىسىن ەستىتۋگە تىرىسادى. مۇنداي ۆيدەولار ميلليونداعان كورىلىم مەن لايك جينايدى. ءبىر جاعىنان، بۇل ASMR- ۆيدەوعا جاتادى. الايدا بوردى بۇلاي كوپ جەۋ دەنساۋلىققا قاۋىپتى.
ارنايى ساۋدا ورىندارىندا تاعامدىق بور بولادى. ەگەر قاتتى بور جەگىڭىز كەلسە، وسىنداي جەۋگە جارامدى بور العان دۇرىس. اك نەمەسە مەكتەپتەگى بوردى جەمەڭىز. ءبىراق اسپازدىق بوردىڭ ءوزىن كوپ جەۋگە بولمايدى. ەگەر بوردى ءجيى جەگىڭىز كەلەتىنىن بايقاساڭىز، دارىگەرگە قارالىپ، اناليزدەر تاپسىرۋ كەرەك.
بوردى كوپ جانە ءجيى جەۋ مىنا پروبلەمالارعا اكەلۋى مۇمكىن:
- اسقازان-ىشەك جولى جۇمىسىنىڭ بۇزىلۋى (ءىش قاتۋ، قىجىل جانە ت. ب)؛
- ورگاندارعا (وكپە، باۋىر، بۇيرەك) كالتسيناتتاردىڭ ءتۇزىلۋى؛
- قانت ديابەتىنىڭ دامۋى؛
- قان تامىرلار تەسىگىنىڭ تارىلۋى.
massaget.kz
