قازاقستاندا كافە-مەيرامحاناداعى باعا ءبىر جىلدا قانشا پايىز قىمباتتادى
وتكەن جىلدىڭ قاراشاسىندا قوعامدىق تاماقتانۋ ۇيىمدارىنىڭ قىزمەتى ءبىر ايدا 2,7 پايىزعا، ال ءبىر جىلدىڭ ىشىندە 23,4 پايىزعا قىمباتتادى.
اسىرەسە باعا ءوسىمىن جەتىسۋ وبلىسىنىڭ تۇرعىندارى قاتتى سەزىندى. اتالعان وڭىردە بىردەن 13,9 پايىزعا وسكەن.
سونداي-اق، ۇشتىككە شىمكەنت جانە الماتى وبلىسى دا كىردى. وندا ءبىر ايدا 9,9 پايىز جانە 7,3 پايىزعا ارتقان. جەتى وڭىردە ءبىر ايدىڭ ىشىندە باعا وزگەرمەگەن.
جىلدىق ديناميكادا باعانىڭ قاتتى ءوسىمى سول جەتىسۋ وبلىسىندا تىركەلدى. قىزمەت كورسەتۋ قۇنى بىردەن 44,7 پايىزعا ارتقان.
ودان بولەك، شىمكەنت (40,3 پايىز) پەن استانادا (38,5 پايىز) باعا ايتارلىقتاي وسكەن. ەڭ تومەن باعا پاۆلودار وبلىسىندا بايقالدى، جىل ىشىندە 6,2 پايىزعا ارتقان.
قوعامدىق تاماقتانۋ وبەكتىلەرى اراسىندا اسحانا قىزمەتى ءبىر جىلدا 26,6 پايىزعا، جىلدام تاماقتانۋ ورىندارىندا 17,1 پايىزعا، مەيرامحانا، ءدامحانا جانە سوعان ۇقساس مەكەمەلەردە 20,6 پايىزعا قىمباتتادى.
ونىڭ ىشىندە مەيرامحانادا تۇسكى اس قۇنى 19 پايىزعا، ال اسحانادا 26,6 پايىزعا ءوستى.
مەيرامحانا مەن ءدامحانادا قىزمەت كورسەتۋ باعاسىنىڭ ەڭ جوعارى جىلدىق ءوسىمى جەتىسۋ وبلىسىندا (44,4 پايىز)، ەڭ تومەنى الماتىدا (5,2 پايىز) تىركەلدى.
جىلدام تاماقتانۋ ورىندارىندا قىزمەت باعاسىنىڭ ەلەۋلى ءوسىمى اتىراۋ وبلىسىندا (38 پايىز)، ال ارزانشىلىق پاۆلودار وبلىسىندا (4,5 پايىز) بايقالدى.
اسحانا قىزمەتى بويىنشا جوعارى باعا جەتىسۋ وبلىسىندا (52 پايىز)، ەڭ تومەنگىسى پاۆلودار وبلىسىندا (7 پايىز).
سونىمەن قاتار، وتكەن جىلدىڭ ءۇشىنشى توقسانىنىڭ قورىتىندىسى بويىنشا مەيرامحانالار مەن قوعامدىق تاماقتاندىرۋ ورىندارىن جالعا الۋ قۇنى ءبىر جىلدا 5 پايىزعا ءوستى.
