تۇركىستان وبلىسىنىڭ شارۋالارى بۇرىشتىڭ جاڭا ءتۇرىن وسىرە باستادى
تۇركىستان وبلىسىنداعى كەلەس اۋدانىنىڭ تۇرعىنى نۇرجان ۋماروۆ العاش رەت جارتىلاي اشى جانە ءتاتتى بۇرىشتىڭ بۋدانداسقان ءتۇرىن كوشەت كۇيىندە ءوندىرىپ، ودان ءونىم الۋدى قولعا الدى. ول بۇل ءونىمنىڭ اتاۋىن «كەلەس» دەپ اتاعان. جيىرما جىلدان بەرى اۋىل شارۋاشىلىعى سالاسىندا ەڭبەك ەتىپ جۇرگەن كاسىپكەردىڭ ايتۋىنشا، جاڭا كوشەتتىڭ ءتۇرى ءوڭىرىمىزدىڭ كليماتىنا بەيىمدىلىگى تەكسەرىلىپ، تاجىريبەدەن وتكىزىلگەن.
«مەنشىگىمدە 8 گەكتار اۋماقتا ورنالاسقان جىلىجايىم بار. ونىڭ 2 گەكتارىنا كوشەت ءوسىرىپ ءجۇرمىن. بۇگىندە جىلىجايدا 40 ادام ەڭبەك ەتۋدە. سونىمەن قاتار قيار، قىزاناق، اسقاباق سەكىلدى ونىمدەردىڭ تۇقىمدارىن بۋدانداستىرىپ، ءونىمنىڭ جاڭا ءتۇرىن شىعارۋعا باسىمدىق بەرىپ كەلەمىز»، - دەيدى جەكە كاسىپكەر.
مۇنان بولەك، وندا قاربىز، قۇلپىناي، قىرىققابات، قيار، قىزاناق كوشەتتەرى دايىندالۋدا. بۇل ونىمدەرگە قىزىعۋشىلىق تانىتاتىن شارۋالار دا كوپ. اسىرەسە، كورشىلەس سارىاعاش جانە ماقتاارال، قازىعۇرت، شاردارا اۋداندارىنىڭ تۇرعىندارى ءجيى تاپسىرىس بەرىپ وتىرادى.
اۆتور
قايرات زاينيشيەۆ
