تۇرسىنبەك قاباتوۆ جاڭا قىزمەتكە تاعايىندالدى
بۇل تۋرالى «حابار» اگەنتتىگى» ا ق باسقارما ءتوراعاسى بەرىك ءۋالي Facebook-پاراقشاسىندا حابارلادى.
«بەلگىلى ونەر قايراتكەرى تۇرسىنبەك قاباتوۆ بۇگىننەن باستاپ «حابار» اگەنتتىگى» ا ق-نىڭ كرەاتيۆتى پروديۋسەرى رەتىندە قىزمەتكە كىرىستى. بويىنداعى تالانتى مەن تىنىمسىز ەڭبەگىنىڭ ارقاسىندا حالىقتىڭ ىقىلاسىنا بولەنگەن تۇرسىنبەك امانعالي ۇلى قولعا العان كەز كەلگەن جوبا تابىستى بولىپ جاتادى. ول ادەمى قالجىڭى ارقىلى قوعامداعى وزەكتى ماسەلەلەردى قوزعاپ، ءاردايىم كوپشىلىكتىڭ كوكەيىندەگىنى ايتىپ جۇرەتىنى بەلگىلى. ونىڭ ىشىندە وتاندىق تەلەارنالارداعى «ءازىل الەمى»، «كوڭىلدى تاپقىرلار الاڭى» سياقتى جوبالارى كورەرمەن تاراپىنان ۇلكەن سۇرانىسقا يە»، - دەدى بەرىك ءۋالي.
ونىڭ سوزىنشە، تۇرسىنبەك قاباتوۆ جاڭا قىزمەتىندە كورەرمەننىڭ كوزايىمىنا اينالاتىن تىڭ، قىزىق جوبالاردى ازىرلەۋمەن جانە ۇيلەستىرۋمەن اينالىسادى.
