فرانسيا فۋتبول فەدەراتسياسى پرەزيدەنتىنىڭ زينەدين زيدانعا قاتىستى سوزىنەن داۋ شىقتى

لە گرە ۇزاق ۋاقىت بويى فرانتسيا قۇراماسىنىڭ باس باپكەرلىگىنە ۇمىتكەر بولىپ ەسەپتەلگەن اتاقتى فۋتبولشى زينەدين زيدانعا قاتىستى پىكىر بىلدىرگەن.

زينەدين زيداننىڭ برازيليا قۇراماسىنىڭ تىزگىنىن ۇستاۋى مۇمكىن دەگەن اقپاراتقا وراي لە گرە: «زيداننىڭ برازيليا قۇراماسىنا باسشىلىق ەتۋى مۇمكىن بە؟ ماعان ءبارىبىر! ەگەر ول مەنىمەن بايلانىسقا شىقپاق بولىپ ارەكەت جاساسا شە؟ بۇل ەش مۇمكىن ەمەس، مەن ونىڭ ءتىپتى قوڭىراۋىنا جاۋاپ بەرمەس ەدىم» ، دەگەن.

لە گرەنىڭ سوزىنە الدىمەن فرانسيا قۇراماسىنىڭ شابۋىلشىسى كيليان مباپپە جاۋاپ بەردى.

«زيدان دەگەنىمىز - فرانسيا، مۇنداي اڭىزعا اينالعان ويىنشىنى سىيلاماۋ ورىنسىز» ، دەپ جازدى ول ءوزىنىڭ الەۋمەتتىك جەلىدەگى پاراقشاسىندا.

ز. زيدان باپكەر ەسەبىندە دە ۇلكەن تابىستارعا قول جەتكىزدى. ونىڭ باسشىلىعىمەن «رەال» (مادريد) كلۋبى قاتارىنان ءۇش رەت چەمپيوندار ليگاسىندا ۇزدىك شىقتى، ەكى رەت يسپانيا جەڭىمپازى اتاندى. 2021 -جىلدىڭ 27 - مامىرىندا ول مادريدتىك كلۋبتان كەتكەن بولاتىن.

«رەال» كلۋبى دا ءۇنسىز قالماي، فرانسيا فۋتبول فەدەراتسياسىنىڭ پرەزيدەنتى نوەل لە گرەنىڭ الەمدىك سپورت جۇلدىزدارىنىڭ ءبىرى زينەدين زيدانعا قاتىستى سوزىنە وراي قىنجىلىس ءبىلدىردى.

«ەلىنىڭ نامىسىن قورعاپ، الەم جانە ەۋروپا چەمپيونى اتانىپ، باسقا دا كوپتەگەن تابىستارعا قول جەتكىزگەن زينەدين زيدان بۇكىل سپورتتىق مانسابىندا ويىنشى ەسەبىندە دە، باپكەر ەسەبىندە دە ءوزىن تانىتا ءبىلدى. FFF پرەزيدەنتىنىڭ مالىمدەمەسى ونىڭ اتقارىپ وتىرعان قىزمەتىنە ساي كەلمەيدى. ول ءبىزدىڭ كوماندانىڭ كاپيتانى، «التىن دوپ» يەگەرى، 2021 -جىلى فرانتسيا قۇراماسىمەن بىرگە ۇلتتار ليگاسىنىڭ چەمپيونى، بەس دۇركىن چەمپيوندار ليگاسىنىڭ جەڭىمپازى اتانعان، باسقا دا اتاقتارى بار كاريم بەنزەماعا قاتىستى دا سونداي پىكىر بىلدىرگەن بولاتىن» ، دەلىنگەن «رەالدىڭ» رەسمي مالىمدەمەسىندە.

L'Equipe باسىلىمىنىڭ حابارلاۋىنشا، زينەدين زيدان لە گرەنىڭ سوزىنە جاۋاپ بەرۋدى جوسپارلاپ وتىرعان جوق.

ەسكە سالا كەتەيىك، بۇدان بۇرىن ديدە دەشامنىڭ فرانسيا قۇراماسىن 2026 -جىلعا دەيىن جاتتىقتىراتىنىن جازعان ەدىك.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى