ق ر ىشكى ىستەر مينيسترلىگى جۇرگىزۋشىلەرگە قاتاڭ ەسكەرتۋ جاسادى
- قۇرمەتتى ازاماتتار! وزدەرىڭىز بىلەتىندەي، جاڭا جىل مەرەكەسىنەن باستاپ كۇن بۇزىلا باستادى، ەڭ قيىن كۇندەر قاڭتاردىڭ 3 مەن 4 نە كەلدى. ەلىمىزدىڭ 9 وڭىرىندە رەسپۋبليكالىق جانە وبلىستىق ماڭىزى بار اۆتوجولداردىڭ 79 ۋچاسكەسىندە كولىك قۇرالدارىنىڭ قوزعالىسىنا ۋاقىتشا شەكتەۋ ەنگىزىلدى. وسى جاعدايلاردا پوليتسيا قىزمەتكەرلەرى اۆاريالىق- قۇتقارۋ جانە جول قىزمەتتەرىمەن بىرلەسىپ، قاۋىپسىزدىكتى قامتاماسىز ەتۋ ءۇشىن اۆتوكولىكتەردىڭ قاۋىپتى جول ۋچاسكەلەرىنە شىعۋىنا جول بەرمەۋ بويىنشا شارالار قابىلدادى. ءوز كەزەگىندە جەكەلەگەن جۇرگىزۋشىلەر پوليتسيا بلوك- بەكەتتەرىندە ەنگىزىلگەن قوزعالىستى شەكتەۋ شارالارىن ەلەمەي، قاۋىپتى جول ۋچاسكەلەرىنە شىعىپ كەتىپ وتىردى. كوپ جاعدايلاردا وسى كولىك قۇرالدارى قالىڭ قاردان جۇرە الماي جولدا قالىپ، ولاردى ەۆاكۋاتسيالاۋ ءۇشىن پوليتسيا جانە توتەنشە جاعداي قىزمەتكەرلەرى باستارىن قاتەرگە تىگىپ، رەسۋرستاردى شىعىنداۋعا ءماجبۇر بولدى. جۇرگىزۋشىلەردىڭ كوبى وزدەرى ءۇشىن عانا ەمەس، جولاۋشىلار ءۇشىن دە جاۋاپتى ەكەندەرىن تۇسىنبەيدى»، - دەلىنگەن حابارلامادا.
ماسەلەن، 4-5-قاڭتاردا قاراعاندى وبلىسىنىڭ بالقاش قالاسى ماڭىندا جولدىڭ اۋا رايىنىڭ قولايسىزدىعىنا بايلانىستى جابىق ۋچاسكەسىندە 400 دەن استام كولىك قۇرالدارىندا 1,5 مىڭ ادام جينالعان. ءتىپتى، وسى ۋچاسكەدە 5 اۆتوكولىك قارعا باتىپ، كەرى قايتقان. وسىعان قاراماستان جەكەلەگەن جۇرگىزۋشىلەر پوليتسيا جانە اكىمدىك قىزمەتكەرلەرىنىڭ زاڭدى تالاپتارىنا باعىنباي، وزدەرىن دورەكىلىك تانىتىپ، بالاعاتتاۋعا جول بەرىپ، كۇش قولدانۋعا دەيىن باردى. جول جيەگى ارقىلى وتپەكشى بولعان Hyundai Creta اۆتوكولىگىنىڭ جۇرگىزۋشىسىنە قاتىستى پوليتسيا قىزمەتكەرلەرىنىڭ زاڭدى تالاپتارىنا باعىنباعانى ءۇشىن اكىمشىلىك كودەكستىڭ 667-بابى بويىنشا اكىمشىلىك حاتتاما تولتىرىلدى. قازىر ءىس اكىمشىلىك سوتقا جولدانعان. وسىعان ۇقساس جاعداي 4-قاڭتاردا رەسپۋبليكالىق ماڭىزى بار ومبى - مايقاپشاعاي اۆتوجولىندا اباي وبلىسىنىڭ بوعاس، كوكپەكتى اۋىلدارى ماڭىندا بولدى.
وندا پوليسيا قىزمەتكەرلەرىنىڭ زاڭدى تالاپتارىنا باعىنباعانى جانە قاۋىپتى جابىق ۋچاسكەگە شىققانى ءۇشىن Lada 21703 جانە Toyota Avalon ماركالى كولىك قۇرالدارىنىڭ ەكى جۇرگىزۋشىسىنە قاتىستى اكىمشىلىك كودەكستىڭ 667-بابى بويىنشا اكىمشىلىك حاتتاما تولتىرىلدى.
«كۇن بۇزىلعان كەزدە sms-حابارلامالار، ينتەرنەت- ارنالار جانە تەلەراديو حابارلارىن تاراتۋ ارقىلى تۇرعىنداردىڭ اۆتوجولدارداعى جاعدايلار تۋرالى ۋاقىتىلى حاباردار ەتىلەتىندىگىن اتاپ ءوتۋ قاجەت. ءسوز سوڭىندا كولىك قۇرالدارى جۇرگىزۋشىلەرىن تاسجولعا شىعابەرىستى جاپقان پوليتسيانىڭ زاڭدى تالاپتارىنا باعىنباعان كەزدە قازاقستان رەسپۋبليكاسىنىڭ قولدانىستاعى زاڭناماسىنا سايكەس 30 AEK نەمەسە 103500 تەڭگە ايىپپۇلدان 15 تاۋلىككە دەيىن اكىمشىلىك قاماققا الۋ جازاسى بار ەكەندىگىن ەسكەرتكىم كەلەدى، - دەدى سپيكەر.
