اتىراۋ وبلىسىنداعى يندەر كولىنە ساراپتامالىق زەرتتەۋ جۇرگىزىلەدى
اتىراۋ وبلىستىق كاسىپكەرلىك جانە تۋريزم باسقارماسىنىڭ ءبولىم باسشىسى جاننات سابىرعاليەۆانىڭ ايتۋىنشا، 2025 -جىلعا دەيىن ءتۋريزمدى دامىتۋ ءۇشىن 10,8 ميلليارد تەڭگەنىڭ 9 ينۆەستيتسيالىق جوباسى ىسكە اسىرىلادى. بۇل جوبالاردا 338 جاڭا جۇمىس ورنى اشىلادى.
«ونىڭ ىشىندە «سارايشىق» ۆيزيت ورتالىعىن سالۋعا بيۋدجەتتەن قارجى ءبولىندى. ال، 8 جوبا جەكە ينۆەستيتسيا ەسەبىنەن سالىنادى دەپ جوسپارلانىپ وتىر. قازىر 4 جوبا ىسكە اسىرىلدى. بۇلار - «نۇرلى تال» ەتنو- پاركى، قۇرمانعازى اۋدانىنداعى ەكى تۋريستىك- دەمالىس بازاسى مەن ماقات اۋدانىنداعى كەمپينگ. بيىل وبلىستىڭ قولونەرشىلەرى مەن ديزاينەرلەرىنە قولداۋ كورسەتۋ ماقساتىندا حالىقارالىق ءىس- شارالار ۇيىمداستىرىلادى. قۇرمانعازى اۋدانىنداعى لوتوس القابىنىڭ تانىمالدىعىن ارتتىرۋ ءۇشىن ۆيدەوروليك ازىرلەۋ، يندەر كولىنىڭ قۇقىقتىق مارتەبەسىن ايقىنداۋ ماقساتىندا ساراپتامالىق زەرتتەۋ جۇمىستارى جۇرگىزىلەدى»، - دەيدى جاننات سابىرعاليەۆا.
ونىڭ دەرەگىنە قاراعاندا، بىلتىر ىشكى جانە كىرۋ ءتۋريزمى بويىنشا كەلۋشىلەردىڭ سانى 108158 ادامدى قۇراعان. بۇل - الدىڭعى جىلعى كورسەتكىشپەن سالىستىرعاندا 3 ەسەگە كوپ. سونداي- اق، وتكەن جىلى 6 تۋريستىك نىسانعا QR كود ورناتىلعان. وسىلايشا، تۋريستەر 5 تىلدە اقپارات الىپ، 3D تۋر جاساۋ مۇمكىندىگىنە يە بولعان.
ال، كوپبالالى، از قامتىلعان وتباسىلاردىڭ بالالارىنا «ءوز ەلىڭدى تانىپ ءبىل» جوباسى اياسىندا استانا، الماتى، اقتاۋ قالالارىنا ەكسكۋرسيالار ۇيىمداستىرىلعان.
ەسكە سالا كەتەلىك، بۇعان دەيىن پرەزيدەنت تاپسىرماسىنا سايكەس اتىراۋدا قۇرىلىسى توقتاعان كونسەرت زالىنىڭ ورنىنا مادەنيەت ورتالىعى سالىناتىنىن حابارلاعان ەدىك.
