عىلىم مەملەكەتتىك قولداۋعا مۇقتاج - ۆيتسە-پرەمەر
«ءبىزدىڭ عىلىمي قوعامداستىق، جوعارى وقۋ ورىندارىنىڭ، ۋنيۆەرسيتەتتەردىڭ رەكتورلارى اۋقىمدى جۇمىس ىستەپ جاتىر. بۇگىن شەشىلۋى ءتيىس جوسپارلاردى تالقىلادىق. بۇل - سيفرلاندىرۋ، پەداگوگتارىمىزدىڭ بىلىكتىلىگىن ارتتىرۋ، بولاشاققا كادرلىق قاجەتتىلىكتى دۇرىس جوسپارلاۋ، بىزگە قاجەتتى جاڭا ماماندىقتار ماسەلەسى»، - دەدى ۇكىمەت باسشىسىنىڭ ورىنباسارى ق ر عىلىم جانە جوعارى ءبىلىم مينيسترلىگىنىڭ كەڭەيتىلگەن القا ماجىلىسىندە.
ونىڭ اتاپ وتۋىنشە، الدا كوپ جۇمىس كۇتىپ تۇر.
«باسەكەگە توتەپ بەرۋ ءۇشىن بىزگە وتە كوپ جۇمىس ىستەۋ قاجەت. ەڭ باستىسى عىلىمي زەرتتەۋلەر ءىس جۇزىندە قولدانىسقا يە بولۋى كەرەك. وسىعان جاعداي جاساۋعا ءتيىسپىز. مەملەكەت باسشىسىنىڭ ناقتى تاپسىرمالارى عىلىمدى دامىتۋعا باعىتتالعان. عىلىم مەملەكەتتىك قولداۋعا مۇقتاج»، - دەدى التاي كولگىنوۆ.
