پرەزيدەنت تەلەراديوكەشەنىنىڭ «قاڭتار وقيعاسى. ءبىر جىل» دەرەكتى فيلمى كورسەتىلەدى
دەرەكتى فيلم ەل ءۇشىن تەڭدەسى جوق سىناققا اينالعان قاڭتار وقيعاسىنا ارنالعان، دەپ حابارلايدى قازاقپارات ءتىلشىسى.
فيلمدە قاڭتار وقيعاسىنىڭ حرونولوگياسى، جاعدايدىڭ بەيبىت شەرۋدەن باستالىپ، جاپپاي تارتىپسىزدىككە ۇلاسۋ سەبەبى مەن تۇرعىنداردى قالاي، كىمدەر ارانداتقانى تۋرالى باياندالادى.
سونىمەن قاتار، دەرەكتى فيلمدە بۇعان دەيىن جاريالانباعان مالىمەتتەر، وقيعا كۋاگەرلەرى مەن سول كۇندەرى جاپپاي تارتىپسىزدىككە قاتىسىپ، جازا ارقالاعان ادامداردىڭ ەكسكليۋزيۆ سۇحباتتارى قامتىلعان.
باس پروكۋراتۋرا قاڭتار وقيعاسىنداعى قىلمىستى ۇشكە ءبولىپ قاراستىرىپ، تالداۋ جاساعان. قۇزىرلى ورگان مالىمەتىنە قاراعاندا، 1600 دەن اسا ازامات كۇدىكتى دەپ تانىلدى. ونىڭ ىشىندە 1312 ادامنىڭ ءىسى تەرگەلىپ، بۇگىندە سوتقا جولدانعان. قاڭتار وقيعاسىن ۇيىمداستىرۋشىلاردىڭ قىلمىستىق ىستەرى ءالى زەردەلەنىپ جاتىر. كەيبىرىنە قاتىستى قىلمىستىق ىستەر سوتتا جابىق ەسىك جاعدايىندا قارالۋدا.
ۇكىمەت ءبىر جىل ىشىندە بيزنەسكە كەلگەن شىعىندى وتەدى. بۇلىنگەن عيماراتتار بۇتىندەلىپ جاتىر. الايدا، سول كەزدەرى ۇرلانعان قارۋلار تولىق تابىلعان جوق. دەرەكتى فيلمدە ىشكى ىستەر ورگاندارىنىڭ قارۋلاردى ىزدەستىرۋ باعىتىندا اتقارىپ جاتقان جۇمىستارى دا جان-جاقتى باياندالادى.
ق ر پرەزيدەنتىنىڭ تەلەراديوكەشەنى ۇسىناتىن «قاڭتار وقيعاسى. ءبىر جىل» دەرەكتى فيلمى Jibek Joly تەلەارناسىنىڭ ەفيرىنەن بۇگىن، 5- قاڭتاردا ساعات 20.30 دا كورسەتىلەدى.
ەسكە سالايىق، بۇعان دەيىن 4- قاڭتاردا Jibek Joly تەلەارناسى «ءبارىن وزگەرتكەن قاڭتار» دەرەكتى فيلمىن كورسەتكەن بولاتىن. كارتينانى قازاقستان رەسپۋبليكاسى پرەزيدەنتىنىڭ تەلەراديوكەشەنىنىڭ Youtube-تەگى رەسمي ارناسىنان كورۋگە بولادى.
