قاڭتار وقيعاسىنىڭ سوڭى مەملەكەتتىك توڭكەرىسكە اينالا جازدادى - ابزال قۇسپان
«ءاۋ باستا بەيبىت ميتينگىدەن جاپپاي تارتىپسىزدىككە ۇلاسقان قاڭتار وقيعاسىنىڭ سوڭى مەملەكەتتىك توڭكەرىسكە اينالا جازدادى. ارادا ءبىر جىل ۋاقىت وتكەندە مۇددەلى توپتىڭ وسىنداي قىلمىستىق ماقساتى بولعانى انىق جانە ايقىن كورىنىس تابۋدا. ەڭ سوراقىسى سول، وسىندا ارەكەتتەردىڭ كەيىن دە جالعاسىن تاۋىپ جاتقاندىعى. وعان ءبىز كوميسسيا قۇرامىندا قاڭتار وقيعاسىمەن اينالىسقان ءبىر جىل مەرزىم ىشىندە كوز جەتكىزە تۇستىك»، - دەدى ادۆوكات.
ماسەلەن، ونىڭ دەرەگىنشە، كەيبىر وڭىرلەردە مەملەكەت باسشىسىنىڭ قاڭتار وقيعاسىنا قاتىستى ىستەردىڭ ءادىل تەرگەلۋى، ازاماتتاردىڭ كونستيتۋتسيالىق قۇقىقتارىنىڭ قاتاڭ ساقتالۋى تۋرالى بەرگەن تاپسىرماسىنا قارسى ديۆەرسيالىق سيپاتتاعى ءىس-ارەكەتتەر ورىن العان.
«وڭتۇستىك وبلىستاردىڭ بىرىندە ق ر قىلمىستىق كودەسىنىڭ 272-بابىنىڭ 2-بولىگىمەن، ياعني جاپپاي تارتىپسىزدىككە قاتىسقانى ءۇشىن ازاماتتى ازاپتاپ، ۇرىپ-سوعۋ، ارقاسىنا ۇتىك باسىپ، تىرناق استىنا ينە جۇگىرۋ تۋرالى اقپارات كوميسسيا تاراپىنان تەكسەرىلىپ، تولىق انىقتالدى. وسىدان كەيىن ءبىزدىڭ تاراپتان وبلىستىق ىشكى ىستەر ورگاندارى باسشىلىعىنا ول ازاماتتى بوساتۋ، ياعني باس شاراسىن وزگەرتۋ تۋرالى تالاپ قويىلدى. الايدا، ولار ءبىزدىڭ ۇسىنىسىمىزبەن كەلىسپەي، ازاپتاۋعا ۇشىراعان ازامات اۋىر قىلمىس جاسادى دەگەن جەلەۋمەن ونى بوساتۋعا، ءتيىستى ەم-دوم الۋىنا كەدەرگى كەلتىرىپ باقتى. قولدانىستاعى زاڭناماعا سايكەس، ادام قانداي قىلمىس جاسادى دەپ ايپتالسا دا، وعان قارسى كۇش قولدانۋعا قاتاڭ تىيىم سالىنعان. ۇزاق ۋاقىتقا سوزىلعان ازاپتاۋ فاكتىسى باسقا ەمەس، سول قۇقىق قورعاۋ ورگانى قىزمەتكەرلەرى تاراپىنان ورىن العان. ال باسشىلىق قۇرام وسىعان كوز جۇما قاراعان»، - دەدى ابزال قۇسپان.
ونىڭ اتاپ وتۋىنشە، وسىدان كەيىن كوميسسيا بۇل جايىندا پرەزيدەنت اكىمشىلىگىنە حابارلاۋعا ءماجبۇر بولعان. ناتيجەسىندە وبلىستىق پوليتسيا دەپارتامەنتى باسشىلىعى جۇمىسىنان بوساتىلىپ، بىرنەشە قىزمەتكەردىڭ ۇستىنەن ازاپتاۋ فاكتىسى بويىنشا قىلمىستىق ءىس قوزعالعان.
«ال ازاپتاۋعا ۇشىراعان ازاماتقا سوت شەشىمى شىعىپ، راقىمشىلىق قولدانىلىپ، بوستاندىققا شىقتى. ءتيىستى ەم-دومىن الۋدا»، - دەدى ول.
