پرەزيدەنت تەلەراديوكەشەنىنىڭ «ءبارىن وزگەرتكەن قاڭتار» اتتى دەرەكتى فيلمى كورسەتىلەدى
دەرەكتى فيلم اۆتورلارى قاڭتارداعى جاپپاي تارتىپسىزدىك كەزىندە بانديتتەردىڭ ارام ويى نەگە ىسكە اسپاي قالدى، قورقىنىش اۋراسى، حاوس جانە شاراسىزدىق تۋرالى بايانداپ بەرەدى.
فيلمنىڭ باستى كەيىپكەرلەرى - بۇزاقىلىق كەزىندە ەلدى قورعاعان قازاقستاندىقتار. قاراپايىم ازاماتتار تۋىپ-وسكەن اتامەكەنىن قورعاپ ءجۇرىپ ەرلىك كورسەتتى.
سونداي-اق، دەرەكتى فيلمدە قاڭتار وقيعاسىنا قاتىستى بۇرىن-سوڭدى ايتىلماعان فاكتىلەر مەن قاتىسۋشىلاردان الىنعان ەكسكليۋزيۆتى سۇحباتتار ۇسىنىلادى.
قاڭتار وقيعاسى مەملەكەتتىك توڭكەرىستىڭ ءساتسىز ارەكەتى عانا ەمەس، قازاقستان تاريحىنداعى ەڭ ءىرى لاڭكەستىك شابۋىل بولدى. وقيعا سالدارىنان 238 ادام قازا تاپتى.
ونىڭ قاتارىندا تۇرعىندارمەن قوسا، پوليتسەيلەر، اسكەري قىزمەتكەرلەر بار.
قاڭتار وقيعاسىن ۇيىمداستىرۋشىلارعا قاتىستى قىلمىستىق ىستەر ءالى دە قارالىپ جاتىر. كەيبىر قاتىسۋشىلارعا مەملەكەت باسشىسى راقىمشىلىق جاريالادى.
Jibek Joly تەلەارناسىنىڭ ەفيرىندە «ءبارىن وزگەرتكەن قاڭتار» دەرەكتى فيلمىنىڭ تۇساۋكەسەرى استانا ۋاقىتى بويىنشا ساعات 20:30 دا بولادى.
