قاتتى وكىنەمىن: سوتتالۋشى دارىگەر يۋري شۋمكوۆتىڭ تۋىستارىنان كەشىرىم سۇرادى
كەزەكتى سوت وتىرىسىندا ايىپتالۋشى بولعان جايدى بايانداپ بەردى. ايتۋىنشا، دارىگەرلەر ەكى جىل بويى ونى لوردان گاستروەنتەرولوگقا جىبەرىپ، ەشكىم ناقتى دياگنوز قويا الماعان.
«الدىمەن لور دارىگەرىنە باردىم. وعان تاماعىمنىڭ قاتتى اۋىراتىنىن ايتتىم. دارىگەرلەر مەندە ءبارى جاقسى ەكەنىن ايتىپ، اسقازانىم اۋىرماسا دا، گاستروەنتەرولوگقا جىبەردى. ءبىراق ولار مەنەن گاستروەنتەرولوگتىڭ انىقتاماسىن تالاپ ەتتى. دارىگەرلەر مەنى وسىلاي ەكى جىل بويى ساندالتتى. بار اقشام مەن كۇشىم ەمدەلۋگە كەتتى. مەن بارىنەن قاتتى شارشادىم»، - دەدى سوتتالۋشى.
ايتۋىنشا، ول شۋمكوۆپەن دارىگەرلەر جىبەرگەن سوڭ تانىسقان. سودان كەيىن گاستروەنتەرولوگقا قارالا باستاعان.
ەندوسكوپيالىق تەكسەرۋدەن كەيىن جاعدايى كۇرت ناشارلاپ كەتكەن. سوتتالۋشى وسى ساتتەن باستاپ سۋ دا، تاماق تا ىشە الماي قالعان. ەكى ايدا 30 كەلىدەن استام سالماق تاستادى.
سونىمەن قاتار، ايىپتالۋشى گەرمانياعا ەمدەلۋگە بارعان، ول جەردە نەيروحيرۋرگتاردىڭ كومەگى قاجەت ەكەنىن بىلگەن.
وعان قازاقستاندا وتا جاسالدى. ءبىراق وپەراتسيادان كەيىن دە جاعدايى جاقسارماعان.
سوتتالۋشى شۋمكوۆتى قورقىتىپ، ودان شىندىقتى بىلگىسى كەلگەنىن ءمالىم ەتتى.
«مىلتىقتى وقتاپ، شۋمكوۆتىڭ كولىگىنە جاقىندادىم. قارۋدى كوتەرىپ تۇرىپ، «شىق، سويلەسۋىمىز كەرەك» دەدىم. شۋمكوۆ ماعان قاراپ، قولىمەن ءبىر نارسە ىزدەي باستادى. مەن ونىڭ قولىنان قارا زاتتى بايقادىم. قولىنداعىسى قارۋ ەكەن دەپ ويلاپ، اتىپ جىبەردىم. ول كولىكتەن تۇسكەندە تاعى ءبىر مارتە اتتىم»، - دەدى سوت بارىسىندا ايىپتالۋشى.
سونداي-اق ول بولعان وقيعاعا قاتتى وكىنەتىنىن ايتىپ، شۋمكوۆتىڭ تۋىستارى مەن جاقىندارىنان كەشىرىم سۇرادى.
ايتۋىنشا، دارىگەردى ولتىرەم دەپ ويلاماعان، تەك قورقىتقىسى كەلگەن.
بۇعان دەيىن پوليتسيا دەپارتامەنتىنىڭ پاترۋل قىزمەتكەرى مەن تاكسي جۇرگىزۋشىسىنەن جابىرلەنۋشى رەتىندە جاۋاپ الىنعان بولاتىن.
ەسكە سالايىق، بىلتىر 4- ءساۋىر كۇنى الماتىدا دارىگەر ەمدەلۋشى پاتسيەنتىنىڭ قولىنان قازا تاپتى. ونى كۇدىكتى اڭشى مىلتىعىمەن اتىپ تاستاعان.
اسا اۋىر قىلمىس قالانىڭ بوستاندىق اۋدانىندا بولعان. كۇدىكتى قالادا ەنگىزىلگەن ارنايى جوسپار بارىسىندا الاتاۋ اۋدانى اۋماعىندا ۇستالدى.
كەيىن ق ر دەنساۋلىق ساقتاۋ ءمينيسترى اجار عينيات يۋري شۋمكوۆ پەن پاتسيەنت اراسىندا قانداي دا ءبىر جانجال بولماعانىن ايتتى.
