كۇتپەگەن جاڭالىقتار: ەلدىڭ سۇيىكتى ءمينيسترى قىزمەتتە نەسىمەن ەستە قالدى؟
بۇگىن مەملەكەت باسشىسىنىڭ جارلىعىمەن وقۋ-اعارتۋ ءمينيسترى اسحات ايماعامبەتوۆ قىزمەتىنەن كەتتى. پەداگوگتەر مەن قالىڭ كوپشىلىك ءۇشىن ول ەڭ ۇنامدى شەنەۋنىكتەر قاتارىندا بولعانى جاسىرىن ەمەس. ايماعامبەتوۆ 4 جىلدىق قىزمەتتە قانداي جۇمىسىمەن ەستە قالعانىنا شولۋ جاسادى.
مينيسترلىك ەكىگە ءبولىندى
اسحات ايماعامبەتوۆتىڭ نەگىزگى ماماندىعى - تاريح مۇعالىمى. سوندىقتان وسى سالادان الىس بولماۋى تۇسىنىكتى. ول 2019 -جىلعا دەيىن ءبىلىم جانە عىلىم ۆيتسە-ءمينيسترى قىزمەتىن اتقارعان. ال 2019 -جىلعى ماۋسىمنان باستاپ 2022 -جىلعى ماۋسىمعا دەيىن ءبىلىم جانە عىلىم ءمينيسترى بولدى. بىلتىر 11-ماۋسىمدا پرەزيدەنت جارلىعىمەن ءبىلىم جانە عىلىم مينيسترلىگى وقۋ-اعارتۋ مينيسترلىگى، عىلىم جانە جوعارى ءبىلىم مينيسترلىگى بولىپ ەكىگە ءبولىندى. وسىلايشا، ايماعامبەتوۆ وقۋ-اعارتۋ ءمينيسترى بولىپ تاعايىندالدى. ال ەكىنشى مينيسترلىكتىڭ باسشىسى لاۋازىمىنا ساياسات نۇربەك كەلدى.
العاش رەت بۋللينگكە قاتىستى ەرەجە قابىلداندى
بۇگىن ەكس-مينيستر Telegram جەلىسىندەگى پاراقشاسىندا ەسكى جىلدى قورىتىندىلادى. ونىڭ سوزىنشە، بىلتىر قازاقستاندا العاش رەت ەرەجەلەر قابىلدانىپ، بالانى بۋللينگتەن قورعاۋ قۇقىعى بەكىتىلگەن.
«ساراپشىلار بۋللينگتىڭ الدىن الۋدىڭ ارنايى ەرەجەلەرىن ازىرلەپ، ال ءبىز ونى بەكىتتىك»، - دەپ جازدى ول.
بالالارعا ۇيدەن تاماق اكەلۋگە رۇقسات ەتىلدى
اسحات ايماعامبەتوۆتىڭ سوزىنشە، مەكتەپتەردەگى تاماق پىسىرەتىن ورىنداردا بەينەباقىلاۋ قويىلعان. سونداي-اق، بالالارعا ۇيدەن تاماق اكەلۋ قۇقىعى جانە مەكتەپتىڭ ولارعا قاجەت جاعداي جاساۋ مىندەتى بەكىتىلگەن.
پسيحولوگتاردىڭ جۇمىسى رەتكە كەلتىرىلدى
قازاقستاندا پسيحولوگتاردىڭ قىزمەتى رەتكە كەلتىرىلىپ، ولاردىڭ جۇمىسى جۇيەلى بولۋىنا، قاعازباستىلىقتان قۇتىلۋىنا، مىندەتىنە جاتپايتىن باسقا قىزمەتتەردى ورىنداماۋىنا جاعداي جاسالعان.
«پەداگوگ مارتەبەسى تۋرالى» زاڭ بەكىتىلدى
2019 -جىلى 27-جەلتوقساندا مەملەكەت باسشىسى قاسىم-جومارت توقايەۆ «پەداگوگ مارتەبەسى تۋرالى» زاڭعا قول قويدى. بۇل زاڭ پەداگوگتەردىڭ مارتەبەسىن ارتتىرۋ، جۇكتەمەسىن ازايتۋ سەكىلدى وزگە دە ماسەلەلەردى زاڭنامالىق دەڭگەيدە شەشۋ ماقساتىندا ەنگىزىلگەن. زاڭدا پەداگوگتەردىڭ قۇقىقتارى مەن مىندەتتەرى قاراستىرىلعان، سونداي-اق، پەداگوگيكالىق قىزمەتكە رۇقسات بەرۋ تالاپتارى بەلگىلەنگەن. «پەداگوگ مارتەبەسى تۋرالى» ق ر زاڭى 21 باپتان تۇرادى جانە ەلىمىزدەگى 500 مىڭنان اسا پەداگوگتىڭ مۇددەلەرىن قورعاۋدى كوزدەيدى.
مەكتەپتە جاڭا لاۋازىم ەنگىزىلدى
ەلىمىزدەگى مەكتەپتەردە ەرەكشە بالالارعا وقۋ كەزىندە كومەكتەسەتىن جاڭا قىزمەت ەنگىزىلدى. بۇل لاۋازىم «پەداگوگ-اسسيتەنت» دەپ اتالادى. بۇل لاۋازىم ەنگىزىلگەن كەزدە ەلىمىزدىڭ بارلىق وڭىرىندە 700-گە جۋىق پەداگوگ-اسسيستەنت جۇمىسقا كىرىسكەن بولاتىن. مينيسترلىك مالىمەتىنشە، ەرەكشە بالالارعا كوبىرەك كوڭىل ءبولۋ قاجەت.
دارىندى بالاعا اقشالاي سىيلىق
حالىقارالىق ءبىلىم جارىستارىنا قاتىسقان بالالارعا اقشالاي سىياقى بەرىلدى. اسحات ايماعامبەتوۆتىڭ سوزىنشە، بۇل سىياقىنى بىلتىر 27 وقۋشى العان.
«بىلتىردان باستاپ العاش رەت حالىقارالىق پاندىك وليمپيادالاردىڭ جەڭىمپازدارى 4,5 ميلليون تەڭگەگە دەيىن سىياقى الدى. حالىقارالىق وليمپيادالاردىڭ 27 جەڭىمپازى مەن جۇلدەگەرىنە، سونداي-اق، ولاردى دايىنداعان 26 مۇعالىمگە سىياقى بەرىلدى. سونىمەن بىرگە، ولار ۇ ب ت-دان وتپەي-اق جوعارى وقۋ ورىندارىنا تۇسۋگە گرانت الدى»، - دەپ جازدى ەكس-مينيستر جىلدىڭ قورىتىندىسىن جاساپ.
مۇعالىمدەردىڭ اتتەستاتسيادان وتۋىنە قاتىستى وزگەرىستەر ەنگىزىلدى
«پەداگوگتەردىڭ اتتەستاتسيادان ءوتۋ ەرەجەسىنە وزگەرىستەر ەنگىزىلدى. اتاپ ايتقاندا، بىلىكتىلىك ساناتىن راستاعاننان كەيىن 30 جانە ودان دا كوپ جىل جۇمىس ىستەگەن مۇعالىمدەر ۇ ب ت-دان بوساتىلادى، زەينەتكە شىعۋعا 4 جىل جانە ودان از ۋاقىت قالعان مۇعالىمدەر قولدانىستاعى ساناتتى ۇزارتا الادى، ەسكى جۇيە بويىنشا ساناتتارى بار ارىپتەستەر دە ۇ ب ت- سىز مودەراتورعا اۋىسۋ مۇمكىندىگىنە يە بولدى»، - دەدى شەنەۋنىك Telegram-دا.
مەكتەپ كىتاپحانالارىنا كوڭىل بولىنە باستادى
ەلىمىزدە مەكتەپ كىتاپحانالارىنا كوڭىل بولىنە باستادى. وسىعان وراي كەيىنگى ەكى جىل ىشىندە مەكتەپتەگى كىتاپحانالارعا 4 ميلليونعا جۋىق ادەبيەت ساتىپ الىنعان.
مەكتەپ فورماسى دا وزگەرىسسىز ەمەس
ەكس-ءمينيستردىڭ سوزىنشە، مەكتەپ فورماسىنا قاتىستى بۇيرىققا وزگەرىستەر ەنگىزىلگەن. سوعان ساي، ءداستۇرلى كيىمدەردەن بولەك، وقۋشىلارعا ىڭعايلى كيىم، ياعني، كارديگان مەن تەننيسكا كيۋگە مۇمكىندىك بەرىلگەن.
5 كۇندىك جۇمىس اپتاسى ەنگىزىلدى
«ءۇش اۋىسىمدا وقيتىن مەكتەپتەردى قوسپاعاندا، مەكتەپ ديرەكتورلارى مەن ورىنباسارلارى، مەكتەپ مۇعالىمدەرى ءۇشىن 5 كۇندىك جۇمىس اپتاسى ەنگىزىلدى. سەنبى ەندى مينيسترلىك بۇيرىعىمەن وتباسىنا، ساۋىعۋعا، ءوزىن- ءوزى دامىتۋعا ارنالعان دەمالىس كۇنى بولىپ بەكىتىلدى»، - دەلىنگەن Telegram-داعى حابارلامادا.
قازاق ءتىلىنىڭ مارتەبەسى تۋرالى
بىلتىردان باستاپ مەملەكەتتىك تىلدە وقىتاتىن 1-سىنىپتاردا وقۋشىلار تەك قازاق تىلىندە وقيتىن بولدى. ال ورىس تىلىندە وقىتاتىن سىنىپتاردا مەملەكەتتىك تىلدە جانە ورىس تىلدەرىندە وقي باستادى. 2-سىنىپتان باستاپ قازاقشا وقىتاتىن مەكتەپتەردە ورىس ءتىلى قوسىلادى. اعىلشىن ءتىلى بارلىق مەكتەپتە 3-سىنىپتان باستاپ وقىتىلادى.
پەداگوگتەردىڭ جالاقىسى ءوسىپ جاتىر
2023 -جىلعى 1-قاڭتاردان باستاپ بالاباقشا تاربيەشىلەرىنىڭ، مەكتەپتەر مەن كوللەدج پەداگوگتەرىنىڭ، سونداي-اق، قوسىمشا ءبىلىم بەرۋ جۇيەسى ماماندارىنىڭ جالاقىسى 25 پايىزعا وسەتىنى بەلگىلى بولدى.
سونىمەن قاتار، مۇعالىمدەر الاتىن جالاقىعا قوسىمشا تولەمدەر بەلگىلەنەدى. وعان بىلىكتىلىك ساناتى ءۇشىن جالاقىنىڭ 30 پايىزىنان 50 پايىزىنا دەيىنگى مولشەر، ماگيستر دارەجەسى ءۇشىن، اعىلشىن تىلىندە پاندەردى جۇرگىزۋ، داپتەرلەردى تەكسەرۋ، سىنىپ جەتەكشىلىگى جانە تالىمگەرلىك ءۇشىن قوسىمشا تولەمدەر جاتادى.
«الىپپە» ورالدى
2019 -جىلى مينيسترلىكتىڭ ەكس- باسشىسى مەكتەپتەرگە الىپپەنى قايتارۋعا ۋادە بەرگەن ەدى. ول 2021 -جىلى قازاق تىلىنە بەيىمدەلگەن احمەت بايتۇرسىن ۇلىنىڭ ادىستەمەسى نەگىزىندە ەنگىزىلەتىنىن مالىمدەگەن بولاتىن. وسىلايشا، 2021 -جىلعى قىركۇيەكتەن باستاپ قازاقستاندىق مەكتەپتەرگە «الىپپە» قايتارىلدى.
ۇ ب ت ەلەكترون فورماتقا اۋىستىرىلدى
مەكتەپ تۇلەكتەرى ۇلتتىق ءبىرىڭعاي تەستىلەۋدى ەلەكترون فورماتتا تاپسىرىپ ءجۇر. بۇل 2022 -جىلى تولىق ەنگىزىلدى.
«ءيا، بيىلدان باستاپ ۇ ب ت ەلەكترون فورماتقا كوشىرىلدى. ءبىراق كامەرالار مەن باقىلاۋ جۇيەسى بولا بەرەدى»، - دەگەن ەدى اسحات ايماعامبەتوۆ.
اتتەستات پەن ديپلوم QR-كود ارقىلى بەرىلەدى
اسحات ايماعامبەتوۆ قازاقستاندا اتتەستات پەن ديپلوم QR-كود ارقىلى بەرىلەتىنىن ايتقان بولاتىن. بۇل دا ءبىلىم بەرۋ سالاسىنداعى جاڭالىقتاردىڭ ءبىرى بولدى.
«اتتەستات پەن ديپلوم QR- كود ارقىلى سيفرلى فورماتتا بەرىلەدى. ءاربىر ستۋدەنتتىڭ جەكە سيفرلى پروفيلى بولادى»، - دەگەن ەدى ەكس-مينيستر.
ماسساگەت
