قازاقستاندا قانداي سالادا جالداناتىن جۇمىسكەرلەرگە سۇرانىس ارتادى
كادرلارعا قاجەتتىلىكتىڭ 2023-2030 -جىلدارعا ارنالعان ورتا مەرزىمدى بولجامى جاسالدى. وعان سايكەس، ەڭ ىقتيمال سەناريدە جالدامالى جۇمىسكەرلەرگە سۇرانىس، ونىڭ ىشىندە جاڭا سۇرانىس پەن كادردى اۋىستىرۋ بويىنشا سۇرانىس شامامەن 1,9 ميلليون ادامدى قۇرايدى.
بولجامدى جاساعان «ەڭبەك رەسۋرستارىن دامىتۋ ورتالىعى» ا ق (ە ر د و) ەكونوميكانىڭ وسۋىنەن تۋىندايتىن جالدامالى جۇمىسشىلارعا دەگەن سۇرانىستى ەسكەرگەن. سونداي-اق جالدامالى جۇمىسشىلاردى اۋىستىرۋ بويىنشا زەرتتەۋ ادامداردىڭ زەينەتكە شىعۋى مەن جۇمىس ىستەيتىن جالدامالى جۇمىسشىلاردىڭ كۇتىلەتىن ءولىم-ءجىتىمى نەگىزىندە جاسالعان.
بولجامعا سايكەس، جاڭا سۇرانىستىڭ ۇلەسى 45 پايىز (867 مىڭ ادام)، ال كادردى اۋىستىرۋ بويىنشا سۇرانىستىڭ ۇلەسى 55 پايىز (1 ميلليون ادام) قۇرايدى.
ە ر د و ساراپشىلارى وپتيميستىك سەناري بويىنشا سۇرانىس كولەمى 2,1 ميلليون ادام، ال پەسسيميستىك سەناري بويىنشا 1,8 ميلليون ادام بولاتىنىن اتاپ وتەدى.
وڭىرلىك بولىنىستە مەگاپوليستەردە حالىقتىڭ شوعىرلانۋى جانە ۋربانيزاتسيا جالعاساتىن بولادى. وسىلايشا، جالدامالى جۇمىسكەرلەرگە ەڭ ۇلكەن جيىنتىق سۇرانىس استانا جانە رەسپۋبليكالىق ماڭىزى بار قالالار - الماتى مەن شىمكەنتتە كۇتىلەدى. بولجامدى سەناريگە بايلانىستى قاجەتتىلىك 420-دان 536 مىڭ ادامعا دەيىن قۇرايدى (جالپى رەسپۋبليكالىق كولەمنەن 24-26 پايىز). ەڭ از سۇرانىس ورتالىق، شىعىس جانە سولتۇستىك وڭىرلەردە قالىپتاسادى.
«جالدامالى جۇمىسشىلارعا سۇرانىس 2028 -جىلى كۇتىلەتىن ەڭ جوعارى دەڭگەيگە جەتكەنگە دەيىن ارتادى، سول كەزدە بولجامدى قاجەتتىلىك 261 مىڭ ادامدى قۇرايدى. بۇل ءىشىنارا 2023 -جىلدان 2028 -جىلعا دەيىن ايەلدەردىڭ زەينەتكەرلىك جاسىن ارتتىرۋ توقتاتىلا تۇراتىندىعىنا بايلانىستى»، - دەپ اتاپ ءوتتى ە ر د و بولجاۋ دەپارتامەنتى ديرەكتورىنىڭ ورىنباسارى قايىربەك اياشەۆ.
سالالار بويىنشا. جالدامالى قىزمەتكەرلەرگە ەڭ ۇلكەن جيىنتىق قاجەتتىلىك ءبىلىم بەرۋ (395,6 مىڭ ادام) ، اۋىل شارۋاشىلىعى (196,3 مىڭ ادام) جانە ساۋدا (193,2 مىڭ ادام) سالالارىندا بولادى. ءبىلىم بەرۋ سالاسىنىڭ كادرلارعا دەگەن جوعارى قاجەتتىلىگى ەلدە 2000-شى جىلداردىڭ باسىنان بەرى بايقالىپ كەلە جاتقان «بەبي-بۋمعا» بايلانىستى.
تاۋارلاردى تاسىمالداۋ جانە ءبولۋ سالاسىندا (ساۋدا، كولىك جانە قويمالاۋ، تۇرۋ جانە تاماقتانۋ قىزمەتتەرى) كورسەتىلگەن كەزەڭدە جالدامالى جۇمىسكەرلەرگە سۇرانىس 336-دان 384 مىڭ ادامعا دەيىن بولادى دەپ كۇتىلۋدە.
بيزنەس- قىزمەتتەر سالاسىندا (اقپارات جانە بايلانىس، قارجى جانە ساقتاندىرۋ، جىلجىمايتىن مۇلىكپەن جاسالاتىن وپەراتسيالار، كاسىبي جانە عىلىمي قىزمەت، اكىمشىلىك جانە قوسالقى قىزمەت كورسەتۋ) جالدامالى قىزمەتكەرلەرگە كەلەشەكتەگى سۇرانىس 268 دەن 314 مىڭ ادامعا دەيىن ارتادى.
ونەركاسىپتە جالدامالى جۇمىسكەرلەرگە سۇرانىس - 219-259 مىڭ ادام (جيىنتىقتان 12 پايىز)، اۋىل شارۋاشىلىعىندا - 193-200 مىڭ ادام (10-11 پايىز)، وزگە دە قىزمەتتەر سالاسىندا - 105-130 مىڭ ادام (6 پايىز)، قۇرىلىس سەكتورىندا 91-111 مىڭ ادام (5 پايىز) دەڭگەيىندە كۇتىلەدى.
