تۇركىستاندا التىنمەن اپتالعان تاقساي حانشايىمىنىڭ كوشىرمەسى ساقتاۋلى تۇر

قازاقستاندا تابىلعان 4 التىن ادامنىڭ ءبىرى سانالاتىن قۇندى جادىگەردى قالا تۇرعىندارى مەن قوناقتارى «ۇلى دالا ەلى» ورتالىعىنان تاماشالاي الادى.

حانشايىمنىڭ باسىندا تاۋ ەشكىسى بەينەلەنگەن التىن باس كيىم بار.

موينىنا ەكى سالپىنشاقتى شەكەلىك جانە تۇتاس قۇيىلعان گريۆنا تاعىلعان.

ال كيىمنىڭ كەۋدە تۇسىنا ءتورتبۇرىشتى، سوپاقشا ءپىشىندى باراق ءيت، قويدىڭ باسى بەينەلەنگەن التىن جاپسىرمالى اشەكەيلەر مەن دوڭگەلەك ءپىشىندى التىن مونشاقتار تىگىلگەن.

كيىمنىڭ جەڭدەرىنە دە التىن قالىپتاعى قاسقىردىڭ ازۋ تىستەرى بەينەسىندەگى التىن سالپىنشاق تىگىلگەن.

ال بىلەكتەرىنە قيال-عاجايىپ جانۋار، ياعني ءمۇيىزدى مىسىقتۇقىمداس جىرتقىشتىڭ بۇزاۋمەن ايقاسى بەينەلەنىپ، التىننان قۇيىپ جاسالعان ەكى بىلەزىك تاعىلعان.

«2012-جىلى ارحەولوگيالىق قازبا جۇمىسى كەزىندە باتىس قازاقستان وبلىسى اۋماعىنان ب. ز. د. IV-VI عاسىرعا ءتان ەجەلگى سارمات كەزەڭىنە جاتاتىن بەكزات ايەلدىڭ قابىرى تابىلعان بولاتىن. عالىمدار ونى قازبا تابىلعان جەردىڭ اتىمەن «تاقساي حانشايىمى» اتاپ كەتتى. اسا باي التىن بۇيىمدارمەن كومكەرىلگەن سارمات حانشايىمىنىڭ سالتاناتتى ءتۇر-تۇلعاسىن بەلگىلى رەستاۆراتور قىرىم التىنبەكوۆ قالپىنا كەلتىرىپ، ەلورداداعى ۇلتتىق مۋزەي مەن ورال وبلىستىق تاريحي-ولكەتانۋ مۋزەيىنە سىيعا تارتقان بولاتىن. كەيىن كوشىرمەسى تۇركىستان قالاسىنا تارتۋ ەتىلدى»، - دەيدى «ۇلى دالا ەلى» ورتالىعىنىڭ عىلىمي قىزمەتكەرى ايمان ميرزابەكوۆا.

مۋزەي قىزمەتكەرلەرىنىڭ ايتۋىنشا «التىن ايەل» قابىرىن اشقان كەزدە ونىڭ سول قولىندا تولقىندى ورنەكتەرى بار كوكشىل ءتۇستى شىنى ىدىس بولعان.

ال، وڭ قولىنا قولادان جاسالعان، باراق ءيتتىڭ باسى بەينەلەنگەن، تۇتقاسى جۋان، التىن ساپتى اينا تابىلعان.

اينانىڭ سابى جاڭعاق اعاشىنان جاسالعان قاپپەن قۇنداقتالعان.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى