شاحماتتان الەم چەمپيونى اتانعان ءبيبىسارا اساۋبايەۆا قازاقستاندىقتارعا العىس ايتتى

«ءبىر وزەنگە ەكىنشى مارتە تۇسە المايسىڭ دەگەن ءسوز بار. دەگەنمەن ول وزەن، ال بۇل شاحماتتان الەم چەمپيوناتى. ونىڭ ۇستىنە چەمپيونات وتانىم - قازاقستاندا ءوتتى. چەمپيوندىقتى ساقتاپ قالىپ، ەكىنشى رەت شاحماتتان بليتس بويىنشا ايەلدەر اراسىندا الەم چەمپيونى اتانۋ - ۇلكەن جاۋاپكەرشىلىك. مەنىڭ قولىمنان كەلدى. بۇل جولى 13 سانى جەڭىس اكەلدى، مەن وسىنشا ۇپاي جيناپ، ءبىرىنشى ورىنعا يە بولدىم.

مەنەن «جەڭىسكە جەتۋدىڭ باستى قاعيداسى نە؟» دەپ ءجيى سۇرايدى. ايتارىم، بۇل جەردە ءبارى ماڭىزدى. دايىندىقتان باستاپ، پسيحولوگيالىق تۇرعىدان ءازىر بولۋ، جاقىندارىم مەن جانكۇيەرلەردىڭ قولداۋىنا دەيىن»، - دەپ جازدى ءبيبىسارا اساۋبايەۆا Instagram-پاراقشاسىندا.

شاحماتشى قىز بۇل جولعى دايىندىقتى عارىشقا ساپارعا ازىرلىكپەن تەڭەدى.

«انام ۇزدىك جاتتىقتىرۋشىلارمەن دايىندىق ۇيىمداستىردى. كۇندەلىكتى تىڭعىلىقتى دايىندالدىم، سوڭىندا... اۋىرىپ قالدىم. جارىس كۇندەرى ىستىعىم جوعارى بولدى. كوڭىل-كۇي ءتۇستى. ءبىراق، اناشىم دەر كەزىندە قولداۋ كورسەتتى. «سارا، ءبارى ويداعىداي بولادى»، - دەدى انام. ايتقانى كەلدى. انام نە ايتادى راسىندا سولاي بولادى. مەن باقىتتىمىن، شاحماتتان الەم چەمپيوناتىنىڭ قازاقستاندا وتكەنىنە قۋانىشتىمىن. «التىندى» تۋعان جەرىمدە قالدىردىم»، - دەيدى الەم چەمپيونى.

جاس الەم چەمپيونى كەزەكتى جەڭىسىن اتا-اناسىنا ارنايدى.

«ماعان سەنىم ارتقاندارعا العىسىم شەكسىز. مەنى قولداعان، جەڭىسكە جەتۋدە جىگەرلەندىرگەن بارشا قازاقستاندىقتارعا، شاحماتشىلار مەن جانكۇيەرلەرگە العىس ايتامىن. سىزدەردى قۇرمەتتەيمىن. قولداۋسىز قيىنعا تۇسەر ەدى»، - دەدى ءبيبىسارا اساۋبايەۆا.

ايتا كەتەيىك، كەشە 18 جاستاعى قازاقستاندىق شاحماتشى ءبيبىسارا اساۋبايەۆا الماتىدا وتكەن بليتستەن الەم چەمپيوناتىندا جەڭىمپاز اتاندى.

ونى ايتۋلى جەڭىسپەن پرەزيدەنت قاسىم-جومارت توقايەۆ قۇتتىقتادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى