سولتۇستىك پەن شىعىستى گازداندىرۋدا رەسەيمەن كەلىسسوز جالعاسۋدا - مينيستر

بۇل تۋرالى ق ر ەنەرگەتيكا ءمينيسترى بولات اقشولاقوۆ ءمالىم ەتتى، دەپ حابارلايدى قازاقپارات ءتىلشىسى.

«تەحنيكالىق تۇرعىدان العاندا، ەلدىڭ سولتۇستىك-شىعىسى مەن شىعىسىن گازداندىرۋ ءۇشىن جىلىنا شامامەن 10 ميلليارد تەكشە مەتر گاز جەتكىزۋگە مۇمكىندىك بەرەتىن قۇبىر قاجەت. ەگەر قوسىمشا وڭتۇستىككە جەتكىزۋ قىزىعۋشىلىعى تۋىنداسا، وندا 20-30 ميلليارد تەكشە مەتردەن استام گاز قاجەت. ءبىراق بۇل كەلىسسوز بارىسىندا قارالاتىن جايت»، - دەدى بولات اقشولاقوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

ءمينيستردىڭ ايتۋىنشا، ەلىمىزدىڭ سولتۇستىك-شىعىس جانە شىعىس وبلىستارىن گازداندىرۋدىڭ بىرنەشە جولى بار.

«ايتار بولساق، بارناۋىل گاز قۇبىرى ارقىلى رەسپۋبليكانىڭ سولتۇستىگى ودان ءارى پاۆلودار، وسكەمەن، سەمەي جانە وعان جاقىن اۋداندارعا كوگىلدىر وتىن جەتكىزۋگە بولادى. سونىمەن قاتار گاز قۇبىرىن ترانزيت ءۇشىن پايدالانۋ مۇمكىندىگى بار. ءبىراق كەلىسسوزدەر ءالى اياقتالعان جوق»، - دەيدى ول.

بۇعان دەيىن ەنەرگەتيكا ءمينيسترى بولات اقشولاقوۆ ەلىمىزدىڭ سولتۇستىگى مەن شىعىسىن گازداندىرۋدىڭ ەڭ وڭتايلى نۇسقاسى - گازدى رەسەيدەن تارتۋ دەگەن ەدى.

ەسكە سالا كەتەيىك، بيىل قاراشادا قازاقستان مەن رەسەي پرەزيدەنتتەرى كرەملدە «ۇشتىك گاز وداعىن» قۇرۋ ماسەلەسىن تالقىلادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى