موڭعوليا كونە استاناسى قاراقورىمدى قالپىنا كەلتىرمەك
موڭعوليا پرەزيدەنتى ۋحنااگين حۋرەلسۋح موڭعول يمپەرياسىنىڭ ەجەلگى استاناسى قاراقورىمدى قالپىنا كەلتىرۋ جونىندە جارلىق شىعاردى، دەپ حابارلايدى قازاقپارات مونسامە اگەنتتىگىنە سىلتەمە جاساپ.
جارلىقتىڭ ماقساتى - ازاماتتاردىڭ قاۋىپسىز ءومىر ءسۇرۋ جاعدايىن جاقسارتۋ، نەگىزگى الەۋمەتتىك قىزمەتتەرگە قولجەتىمدىلىكتى كەڭەيتۋ، وڭىرلەردىڭ تەڭگەرىمدى دامۋىن قامتاماسىز ەتۋ، مەملەكەت مۇراسىن نىعايتۋ جانە ونىڭ تاريحى مەن مادەنيەتىن قالپىنا كەلتىرۋ.
سونداي- اق، موڭعوليا پرەزيدەنتى جارلىقتا ازاماتتاردى، كاسىپورىندار مەن ۇيىمداردى يۋنەسكو- نىڭ دۇنيەجۇزىلىك مۇرا تىزىمىنە ەنگىزىلگەن موڭعول يمپەرياسىنىڭ كونە استاناسى قاراقورىمدى قالپىنا كەلتىرۋ ىسىندە كوشباسشىلىق ءرول اتقارۋعا شاقىردى.
«800 جىل بۇرىن شىڭعىس حان ورحون وزەنى اڭعارىندا موڭعول يمپەرياسىنىڭ استاناسى قاراقورىم قالاسىن قۇرۋ تۋرالى جارلىق شىعاردى. ەجەلگى استانا قاراقورىم - موڭعول يمپەرياسىنىڭ سول كەزدە الەمنىڭ ساياسي جانە ەكونوميكالىق ورتالىعى بولعانىن ايعاقتايتىن تاريحي- مادەني مۇرا. قاراقورىم قالاسى الەمدىك وركەنيەتتەردى بايلانىستىراتىن كوپىر جانە ەۋرازيانىڭ ساۋدا ورتالىعى بولدى. قاراقورىمداعى ارحەولوگيالىق زەرتتەۋلەر موڭعول يمپەرياسىندا قالالىق قونىستاردىڭ، ۇيىمداستىرىلعان اكىمشىلىك بىرلىكتەردىڭ بولعانىن، مادەنيەت پەن ءبىلىمنىڭ دامىعانىن دالەلدەيدى.
موڭعول يمپەرياسىنىڭ ورتالىعىن قورعاۋ، ۇلى شىڭعىس حان مەن ونىڭ مۇراگەرلەرىنىڭ ەرلىكتەرىن زەرتتەپ، ساقتاۋ، سونىمەن قاتار ونى ەلىمىزدە عانا ەمەس، الەمگە تانىتۋ - ءبىزدىڭ اسىل پارىزىمىز. سوندىقتان، قاراقورىم قالاسىن قالپىنا كەلتىرۋ - وراسان زور جاسامپاز ءىس جانە ول كوپ ۋاقىتتى، قارجىنى، قاجىرلى ەڭبەك پەن تاباندىلىقتى قاجەت ەتەتىنى انىق»، - دەدى مەملەكەت باسشىسى ۋ. حۋرەلسۋح قول قويۋ راسىمىنەن كەيىن.
اۆتور
سماعۇلوۆا ەركەجان
