قانات مۋسين جاڭا قىزمەتكە تاعايىندالدى
«كونستيتۋتسياعا سايكەس پارلامەنتتىڭ ءار پالاتاسى كونستيتۋتسيالىق سوتتىڭ ءۇش سۋدياسىن قىزمەتكە تاعايىندايدى. ولار ءوز قىزمەتىنە 2023 -جىلدىڭ 1-قاڭتارىنان باستاپ كىرىسەدى»، - دەدى ءماجىلىس ءتوراعاسى ەرلان قوشانوۆ.
وسى ورايدا ق ر كونستيتۋتسياسىنىڭ 58-بابى 3-تارماعىنىڭ 7) - تارماقشاسىنا سايكەس، ق ر كونستيتۋتسيالىق سوتىنىڭ سۋدياسى لاۋازىمىنا قانات سەرگەي ۇلى مۋسيندى، ەركىن ءانۋار ۇلى وڭعاربايەۆتى جانە سەرگەي فەدوروۆيچ ۋدارتسيەۆتى تاعايىنداۋ تۋرالى پارلامەنت ءماجىلىسى ءتوراعاسىنىڭ ۇسىنىسى ەنگىزىلدى.
ءوز كەزەگىندە دەپۋتات ارمان كوجاحمەتوۆ ۇسىنىلعان كانديداتۋرالار زاڭ جانە قۇقىقتىق سالادا كوپ جىل ەڭبەك ەتكەن بىلىكتى ءارى تاجىريبەلى ماماندار ەكەنىن ايتتى.
«قانات سەرگەي ۇلى مۋسيندى وزدەرىڭىز جاقسى بىلەسىزدەر، قۇقىقتىق قورعاۋ، ادىلەت ورگاندارىندا كوپ جىل ەڭبەك ەتتى، پارلامەنت ءماجىلىسىنىڭ دەپۋتاتى، كوميتەت ءتوراعاسى بولدى. ەركىن ءانۋار ۇلى وڭعاربايەۆ ايگىلى عالىم، زاڭ عىلىمدارىنىڭ دوكتورى، كونستيتۋتسيالىق رەفورما بويىنشا جۇمىس توبىنىڭ مۇشەسى. قازىرگى ۋاقىتتا ەۋرازيا ۇلتتىق ۋنيۆەرسيتەتىنىڭ پرورەكتورى. سەرگەي فەدوروۆيچ ۋدارتسەۆ تە اتاقتى عالىم، زاڭ عىلىمدارىنىڭ دوكتورى، كونستيتۋتسيالىق رەفورما بويىنشا جۇمىس توبىنىڭ مۇشەسى. بۇرىن كونستيتۋتسيالىق سوتتىڭ سۋدياسى بولعان. قازىرگى تاڭدا م. س. نارىكبايەۆ اتىنداعى كازگيۋۋ ۋنيۆەرسيتەتىنىڭ عىلىمي زەرتتەۋ ينستيتۋتىنىڭ ديرەكتورى. اتالعان كانديداتۋرالاردى قاراۋ ناتيجەلەرى بويىنشا كوميتەت وڭ قورىتىندى ازىرلەدى. كونستيتۋتسيانىڭ 57-بابى 1) - تارماقشاسىنا سايكەس، قر كونستيتۋتسيالىق سوتىنىڭ سۋدياسى لاۋازىمىنا پارلامەنت ءماجىلىسىنىڭ ءتوراعاسى ۇسىنعان ق. مۋسيننىڭ، س. ۋدارتسيەۆتىڭ جانە ە. وڭعاربايەۆتىڭ كانديداتۋرالارىن 2023 -جىلعى 1 قاڭتاردان باستاپ تاعايىنداۋدى قولداۋلارىڭىزدى سۇرايمىن»، - دەدى ا. قوجاحمەتوۆ.
جالپى وتىرىستا پالاتا دەپۋتاتتارى اتالعان ادامداردى كونستيتۋتسيالىق سوتىنىڭ سۋدياسى قىزمەتىنە تاعايىنداۋ تۋرالى ۇسىنىستى قولدادى.
ايتا كەتەيىك، بۇگىن مەملەكەت باسشىسىنىڭ جارلىعىمەن قانات سەرگەي ۇلى مۋسين قازاقستان رەسپۋبليكاسىنىڭ ادىلەت ءمينيسترى لاۋازىمىنان بوساتىلدى.
بۇدان بۇرىن حابارلانعانداي، بۇگىن پرەزيدەنت قاسىم-جومارت توقايەۆ كونستيتۋتسيالىق سوتتىڭ ءتوراعاسى قىزمەتىنە ەلۆيرا ءابىلحاسىم قىزى ازيموۆانى ۇسىندى.
سەنات دەپۋتاتتارى اشىق داۋىس بەرۋ ارقىلى ە. ازيموۆانىڭ كانديداتۋراسىن ءبىراۋىزدان قولدادى.
سونىمەن قاتار، بۇگىن سەناتتىڭ جىلپى وتىرىسىندا ق ر كونستيتۋتسيالىق سوتتىڭ سۋديالارى تاعايىندالدى.
