پاۆلوداردا كوشەدە مىلتىق اسىنىپ جۇرگەن جاس ءوسپىرىم ۇستالدى
29-جەلتوقساندا تۇنگى ساعات 02:52 دە پاۆلودار قالاسى تورايعىروۆ كوشەسىنىڭ بويىندا پاترۋلدىك پوليتسيا باتالونىنىڭ ينسپەكتورلارى 17 جاسار جىگىتتى ۇستادى. ودان م ت س-21-12 تەگىس ۇڭعىلى، ءبىر ۇڭعىلى، بەس وقپاندى مىلتىق تاركىلەندى. بۇل رەتتە مىلتىق قاپتالماعان تۇردە بولدى. كامەلەتكە تولماعان جىگىتتىڭ جانىندا اكەسى بولدى. ول ورتاشا ماس كۇيدە ەدى، ماستىعى مەديتسينالىق تۇردە دالەلدەندى.
انىقتالعانداي، تاركىلەنگەن قارۋدىڭ يەسى - جاسوسپىرىمنىڭ اكەسى. ونىڭ اتىنا ي ج-58 تاعى ءبىر مىلتىق تىركەلگەن.
- وسى فاكت بويىنشا 46 جاستاعى قارۋ يەسىنە قاتىستى قارۋدى الىپ ءجۇرۋ ەرەجەلەرىن بۇزعانى ءۇشىن ق ر اق ب ت ك- ءنىڭ 484-بابى بويىنشا اكىمشىلىك ءىس قوزعالدى. 10 ا ە ك مولشەرىندە ايىپپۇل سالىندى. قولدا بار ەكى قارۋ يەسىنەن تاركىلەندى. سونداي- اق يەسىنىڭ ازاماتتىق قارۋدى ساقتاۋعا جانە الىپ جۇرۋگە رۇقساتىنىڭ كۇشى جويىلدى. سونىمەن قاتار قوعامدىق ورىندا الكوگولدىك ماساڭ كۇيدە بولعانى ءۇشىن ەر ادام جاۋاپكەرشىلىككە تارتىلىپ، وعان ق ر ا ق ب ت ك- ءنىڭ 440-بابى بويىنشا 5 ا ە ك مولشەرىندە ايىپپۇل سالىندى، - دەدى پاۆلودار وبلىسى پد باستىعىنىڭ ءبىرىنشى ورىنباسارى جاسقايرات قايىروۆ.
پوليسيا جىل باسىنان بەرى قۇقىقتىق 10781 ازاماتتىق قارۋ يەسىن تەكسەردى. ناتيجەلەرى بويىنشا 693 ادام اكىمشىلىك جاۋاپكەرشىلىككە تارتىلدى. ءتۇرلى زاڭ بۇزۋشىلىقتارعا جول بەرگەن 13 قارۋ يەسىنىڭ رۇقساتى جويىلدى.
