قاڭتار: الماتىلىق دارىگەرلەر قىزمەتتىك بورىشىن ادال ورىندادى

باس پروكۋراتۋرانىڭ مالىمەتىنشە، قانتاردا ت ج م، ءى ءى م، جەدەل جاردەم جانە باسقا دا مەملەكەتتىك ورگان جۇمىسشىلارىنىڭ 345 قىزمەتتىك جانە 116 جەكە اۆتوكولىگى بۇلىنگەن. قىلمىسكەرلەردىڭ شابۋىلىنان 16 دارىگەر، 34 ءورت ءسوندىرۋشى مەن 8 قۇتقارۋشى زارداپ شەكتى. «قازاقپارات» ح ا ا رەداكتسياسى «قاڭتار» ارنايى ايدارى اياسىندا اق حالاتتى ابزال جانداردىڭ سول كۇندەرى قىزمەتتىك بورىشىن قالاي اتقارعانى جايلى بايانداماق.

الماتى قالاسى ورتالىق قالالىق كلينيكالىق اۋرۋحاناسىنىڭ دارىگەرلەرى بانديتتەردىڭ شابۋىلىنا قاراماستان جۇمىسىن جالعاستىردى. ولار جارالانعانداردى قابىلداپ، ولارعا كاسىبي مەديتسينالىق كومەك كورسەتىپ، وتا جاساۋ بولمەلەرىندە تاۋلىك بويى تىك تۇرىپ قىزمەت ەتتى.

الماتى قالاسى ورتالىق قالالىق كلينيكالىق اۋرۋحاناسىنىڭ قابىلداۋ ءبولىمىنىڭ مەڭگەرۋشىسى داۋلەت ريزابەك ۇلى قاڭتار وقيعاسى كەزىندە مەديتسينا قىزمەتكەرلەرىنىڭ باسىنان وتكەرگەن قيىن ساتتەرىن ەسكە الدى.

«5-قاڭتار كۇنى مەديتسينالىق كومەككە جۇگىنگەن ازاماتتاردىڭ سانى كوپ بولدى. تۇسكى ساعات 2-3 تەردە باستاپ، تاڭعى 4-5 كە دەيىن توقتاعان جوقپىز. ءبىر كەلگەن كەزدە 10 ادامعا دەيىن الىپ كەلگەن كەزدەر بولدى. جاعدايلارى وتە اۋىر. باس جاراقاتى، كەۋدە جاراقاتى، اياق- قولدىڭ جاراقاتتارىمەن. ەس- ءتۇسسىز الىپ كەلگەن ناۋقاستار بولدى. جالپى ولاردىڭ ىشىندە قاراپايىم تۇرعىندار مەن پوليتسيا قىزمەتكەرلەرى دە بار»، - دەدى دارىگەر.

قارۋلى قىلمىسكەرلەر قالا اۋرۋحاناسىن اينالا قورشاعان كەزدە دارىگەرلەردىڭ باتىلدىعى مەن كاسىبي بورىشىنا دەگەن ادالدىعى زارداپ شەككەندەردىڭ ءومىرىن ساقتاپ قالۋعا كومەكتەستى.

رەداكتسيادان

قازاقپارات كومانداسى الماتىدا، جالپى قازاقستاننىڭ وزگە وڭىرلەرىندە قاڭتار قاسىرەتى كەزىندە قىلمىسكەرلەر مەن توناۋشىلاردىڭ ارەكەتىن ءوز كوزىمەن كورگەن وقىرمانىمىز از ەمەس ەكەنىنە سەنىمدى.

وقىرماندى ءوز وقيعالارى جايلى اڭگىمەلەپ بەرۋگە شاقىرامىز. بىزگە مىنا ەلەكتروندى پوشتا ارقىلى حات جازۋعا بولادى:

kazred@inform.kz

rusred@inform.kz

بىزبەن الەۋمەتتىك جەلىلەر ارقىلى دا بايلانىسۋعا بولادى:

Telegram: @qazaqparat_kz, @kazinform_news

Facebook: @KazakparatKZ، @كازينفورم

Instagram: @qazaqparat_kz, @kazinform.

قاڭتار قاسىرەتى جايلى ايتىلماعان وقيعا قالماۋى كەرەك.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى