قانت ديابەتى ومىرگە ءسابي اكەلىپ، انا اتانۋعا كەدەرگى ەمەس - دارىگەر
بۇل تۋرالى كارديولوگيا جانە ىشكى اۋرۋلار عىلىمي-زەرتتەۋ ينستيتۋتىنىڭ ماماندارى ءمالىم ەتتى، دەپ حابارلايدى قازاقپارات ءتىلشىسى.
مامانداردىڭ ايتۋىنشا، پومپالىق ينسۋلين تەراپياسىنىڭ ارقاسىندا انادا دا، بالادا دا اسقىنۋلاردى ازايتۋعا، ءتىپتى بولدىرماۋعا بولادى. پومپالىق ينسۋلين قانداعى ينسۋليننىڭ ءتيىستى دەڭگەيىن قامتاماسىز ەتەدى. ول ءۇشىن دارىگەر ءار ناۋقاستىڭ قاجەتتى كورسەتكىشتەرىن قۇرىلعىعا ەنگىزەدى.
«كارديولوگيا جانە ىشكى اۋرۋلار عزي ەندوكرينولوگتەرى بارلىق وڭىرلەردەن كەلەتىن پومپالىق ينسۋلين تەراپياسىنداعى 1 جانە 2- ءتيپتى قانت ديابەتى بار جۇكتى ايەلدەرگە، اۋىر ەندوكريندىك پاتولوگياسى بار بوسانعان ايەلدەرگە باقىلاۋ جۇرگىزەدى. اۋرۋدى ۋاقتىلى انىقتاۋ جانە ەمدەۋ جاعىمسىز سالداردىڭ الدىن الادى. 2022-جىلى جۇكتىلىكتىڭ ءارتۇرلى كەزەڭدەرىندە قانت ديابەتى دياگنوزى قويىلعان 50 دەن استام ايەل ءوتتى، ولاردىڭ بارلىعى امان-ەسەن بوساندى. قانت ديابەتى ومىرگە ءسابي اكەلىپ، انا اتانۋعا كەدەرگى ەمەس»، - دەيدى كارديولوگيا جانە ىشكى اۋرۋلار ع ز ي باسقارما ءتوراعاسى روزا قۋانىشبەكوۆا.
2016-جىلدان باستاپ ينسۋلينگە تاۋەلدى 2- ءتيپتى قانت ديابەتىمەن ديسپانسەرلىك ەسەپتە تۇرعان 38 جاستاعى الماتىلىق بۇلبۇل بولاتحان جۇكتىلىكتىڭ 13 جانە 32 اپتالىق كەزىندە ع ز ي- دا ستاتسيوناردا ەم قابىلدادى. تاڭدالعان پومپالىق ينسۋلين تەراپياسى اياسىندا گليكەميا دەڭگەيى 30%-40 عا تومەندەپ، ول وسى جىلدىڭ ءساۋىر ايىندا امان-ەسەن قىز بالانى دۇنيەگە اكەلدى.
«شىدامدىلىق، مەيىرىمدىلىك، جاناشىرلىق - بۇل وسى كلينيكا دارىگەرلەرىنە كۇن سايىن ءوز جۇمىسىن كاسىبي جانە ادال ورىنداۋعا كومەكتەسەتىن قاسيەتتەر»، - دەيدى بۇلبۇل.
