ۇسىك شالعان بالاعا قالاي كومەكتەسۋ كەرەك؟

ءۇسۋ - تومەن تەمپەراتۋرالار اسەرىنەن تىندەردىڭ زاقىمدالۋى. ءبىراق ەگەر دالادا جەل سوعىپ تۇرسا جانە اۋا ىلعالدىعى جوعارى بولسا، بالالاردا ول نولدىك تەمپەراتۋرا كەزىندە دە بولۋى مۇمكىن. سونداي-اق، اۋا رايى بىردەن وزگەرسە جانە اۋا تەمپەراتۋراسى اياقاستى تومەندەسە، ۇسىك شالۋ قاۋپى جوعارىلاي تۇسەدى.

مۇنداي كەزدە ەڭ الدىمەن دەنەنىڭ اشىق بولىكتەرىنە زاقىم كەلەدى: بەت، مۇرىن، قۇلاق، قول بىلەگى. ءبىراق اياق كيىمنەن دە تابان توڭىپ قالادى. ەگەر بالا اۋا رايىنا ساي كيىنبەسە، كيىمى ايازعا ارنالماعان بولسا جانە تار اياق كيىم كيسە، ونى ۇسىك شالۋى مۇمكىن. سونىمەن قاتار، ۇسىك شالۋعا ۇزاق ۋاقىت قوزعالماۋ، اياق-قولدىڭ اۋىرۋى، جالپى السىزدىك (ينفەكسيالىق جانە بۋىن اۋرۋلارى، اشتىق، فيزيكالىق دامۋدىڭ جەتىسپەۋشىلىگى، زاقىمدار جانە ت. ب) ىقپال ەتەدى.

بالانى ۇسىك شالعانىن قالاي بىلۋگە بولادى؟

ءۇسۋدىڭ العاشقى بەلگىلەرى:

- تەرىنىڭ بوزارۋى؛

- تەرىنىڭ سالقىنداۋى؛

- تەرى سەزىمتالدىعىنىڭ تومەندەۋى.

ءۇسۋ پروتسەسى بالالاردا ەرەسەكتەرگە قاراعاندا جىلدام جۇرەدى. ول ولاردىڭ تەرى قاباتى قۇرىلىمىنىڭ جانە ولاردىڭ قانمەن قامتاماسىز ەتۋ ەرەكشەلىگىمەن بايلانىستى.

سەرۋەن كەزىندە بەتتىڭ اشىق تۇرعان جەرلەرىنىڭ قىزارۋى - سۋىق اسەرىنە تەرى قانتامىرلارىنىڭ تابيعي رەاكسياسى. اتا-انالاردى تەرىنىڭ اياقاستى بوزارۋى ويلاندىرۋى كەرەك. سونداي-اق بالا شانشۋ، كۇيۋ نەمەسە سەزىمتالدىقتىڭ جوعالۋىنا شاعىمدانۋى مۇمكىن.

ۇسىك شالۋ العاشقى ساعاتتاردا زاقىمدالعان جەردىڭ اۋماعى مەن تەرەڭدىگىن انىقتاۋ مۇمكىن ەمەستىگىمەن قاۋىپتى.

ۇسىك شالۋدىڭ دەڭگەيلەرى:

1-دەڭگەي: تەرى قاباتىنىڭ جايلاپ اۋىرۋى، ال جىلىنۋدان سوڭ قىزارۋ جانە باياۋ ءىسىنۋ. 5-7 كۇننەن كەيىن تەرى كورىنىستەرى تولىقتاي كەتەدى.

2-دەڭگەي: 24-48 ساعاتتا كۇلدىرەۋىكتەر پايدا بولادى، قاتتى اۋىرادى جانە قىزادى. تەرى جاعدايى 7-14 كۇننەن كەيىن تولىقتاي قالپىنا كەلەدى.

3-دەڭگەي: تەرى سەزىمتالدىعى جوعالادى، اۋىرتاتىن كۇلدىرەۋىكتەر قاپتاپ كەتەدى. ناتيجەسىندە تەرىدە تىرتىق قالادى.

4-دەڭگەي: تەرىنىڭ جانە استىنداعى تىندەردىڭ تولىق نەكروزى. زاقىمدالعان جەر كوگەرىپ كەتەدى جانە بىردەن ىسەدى. تەرى سەزىمتالدىعى قالپىنا كەلمەيدى.

ۇيدە تەك 1-دەڭگەيدەگى ۇسىكتى عانا ەمدەۋگە بولادى.

العاشقى كومەك:

- بالانى جىلدام جىلى جەرگە اپارۋ؛

- جەدەل جاردەم شاقىرۋ (سەبەبى ۇسىككە شالۋدىڭ العاشقى ساعاتتارىندا ونىڭ دەڭگەيىن انىقتاۋ مۇمكىن ەمەس)؛

- زاقىمدالعان تەرى بولىگىن بىردەن قىزدىرۋعا بولمايدى! تەك جايلاپ قولمەن نەمەسە جۇمساق ءجۇن ماتامەن مۇقيات ۋقالاۋعا بولادى؛

- بالاعا جىلى شاي نەمەسە سۋ بەرىپ، ۇستىنە كورپە جابۋ؛

- زاقىمدالعان جەردى بەلگىلەپ قويۋ.

ۇسىك شالعاندا نە ىستەۋگە بولمايدى؟

- ۇسىگەن دەنە بولىكتەرىن قارمەن، قاتتى ماتامەن، سپيرتپەن، مايمەن ۋقالاماڭىز؛

- ۇسىگەن جەردى ىستىق سۋمەن، جىلىتقىشپەن بىردەن قىزدىرماڭىز؛

- كۇلدىرەۋىكتەردى وزدىگىڭىزبەن جارماڭىز.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى