قاڭتار تۇراقتىلىق پەن اماندىقتىڭ قانشالىق قۇندى ەكەنىن كورسەتتى - تالعات قاليەۆ
مۇنداي پىكىردى قولدانبالى ەتنوساياسي زەرتتەۋلەر ورتالىعىنىڭ ديرەكتورى تالعات قاليەۆ ءبىلدىردى، دەپ حابارلايدى قازاقپارات ءتىلشىسى.
«قاڭتار مەملەكەتتىلىكتىڭ قانشالىقتى وسال، ال تۇراقتىلىق پەن اماندىقتىڭ قانداي قۇندى ەكەنىن كورسەتىپ بەردى. باستى بايلىعىمىزدى جوعالتىپ الۋ وتە وڭاي ەكەن. مەملەكەتىمىزدى ساقتاۋ، ونى باعالاپ، ساقتاۋ وتە ماڭىزدى. مەملەكەت پەن قوعامنىڭ ءبىر-ءبىرىن ەستي ءبىلۋى دە بارىنشا ماڭىزدى. اكىمدەر ازاماتتاردىڭ سۇرانىستارىنا، ولاردىڭ قاجەتتىلىگىنە جەدەل ارەكەت ەتىپ، نارازىلىقتاردىڭ ارتۋىنا، ولاردىڭ قارسىلىققا اينالۋىنا جول بەرمەۋى ءتيىس»، - دەدى تالعات قاليەۆ.
قولدانبالى ەتنوساياسي زەرتتەۋلەر ورتالىعىنىڭ ديرەكتورى پرەزيدەنتتىڭ قوعاممەن سىندارلى ديالوگقا دايىن، ازاماتتاردىڭ سۇرانىسىنا دەر ۋاقىتىندا ارەكەت ەتەتىن «حالىق ۇنىنە قۇلاق اساتىن مەملەكەت» تۇجىرىمداما باستاماسى وزەكتى ەكەنىن باسا ايتادى.
«جەرگىلىكتى جەردەگى شەنەۋنىكتەر ازاماتتارمەن ۇنەمى بايلانىستا جۇمىس ىستەۋ قاجەتتىگىن، تۋىنداعان الەۋمەتتىك سۇرانىسقا ارەكەت ەتۋ كەرەكتىگىن وتە جاقسى ءتۇسىنۋى ءتيىس. مۇنى دا قاڭتار بارىنشا جاقسى كورسەتىپ بەرگەن سياقتى»، - دەدى تالعات قاليەۆ.
ونىڭ پايىمىنشا، مۇنداي جويقىن وقيعا مەملەكەت پەن قوعام اراسىندا سىنا قاعاتىن كەمشىلىكتەر جىبەرىلگەن كەز كەلگەن ەلدە بولۋى مۇمكىن.
«مۇنداي وقيعا كەز كەلگەن ەلدە، كەز كەلگەن جۇيەدە بولا الادى. ءتىپتى، ەۋروپا ەلدەرىنىڭ وزىندە ۇنەمى نارازىلىق تۋىنداپ، سونىڭ سالدارىنان جۇرت اينالانى قيراتىپ، تۇراقسىزدىق سەناريلەرىنە ۇلاسىپ جاتادى. ا ق ش- تاعى پرەزيدەنتتى سايلاۋدان كەيىنگى كاپيتوليدى باسىپ الۋعا تۇرتكى بولعان وقيعانى دا ايتساق بولادى. حالىق بيلىكتىڭ ديالوگقا دايىن ەكەنىن سەزىنبەگەن كەزدە نارازىلىق ورىن الادى»، - دەدى تالعات قاليەۆ.
ساراپشى قاڭتار قاسىرەتىنىڭ قايتالانۋىنا جول بەرمەۋ ءۇشىن پروبلەمانى تۋىنداعان ساتىندە بىردەن شەشىپ، ازاماتتاردىڭ الەۋمەتتىك كوڭىل-كۇيىنە مونيتورينگ جاساۋ، شىنايى الەۋمەتتىك سۇرانىس پەن الەۋمەتتىك جەلىلەردەگى شىنايى نارازىلىق كوڭىل-كۇيدى اجىراتا ءبىلۋ قاجەت ەكەنىن ايتادى.
«ازاماتتاردىڭ ناقتى پروبلەمالارىنا نازار اۋدارىپ، ماسەلەلەردى شەشۋ، حالىقتىڭ ءال-اۋقاتىن ارتتىراتىن جوبالاردى جۇزەگە اسىرۋ، جاڭا جۇمىس ورىندارىن قۇرۋ، شاعىن جانە ورتا بيزنەستى قولداۋ، جاعداي جاساۋ كەرەك»، - دەدى قولدانبالى ەتنوساياسي زەرتتەۋلەر ورتالىعىنىڭ ديرەكتورى.
